OWM THURAI MIHUÜA HAI TARA ¹ Enni pungma dawng kowi lowra maru akengmiuüa tara uowi khai e dow, maru achim asaima miuüa pur kowi chetah dowi matching kowi, maru tachih tanawm dowi miuüa pur kowi enni nauam chet kown bow? ² Nahanow, maru achim asaima miuüa dow lusa tara nachet pe kown pami enni tuk dowi bow? Now, lusa khowm padow enni nachet pe tara kown hanow alup lang sowm nowm nowm mih kowi paw na chet pe dowi kown enni takla dowi pabow? ³ Akawmat kow singuowi sakuowi khe kowm dow tekah dowi tak; kramamuuüa prakowi khowm dow a-i na chet pe tara kown pami enni tuk dowi bow? ⁴ Nahanow akawmat kow sing uowi sakuowi khe kow chowm krang uowi krang laiklow ün uowi mih Thurai maruuüa pungma dawng kowikow maru e-ah klowkah dowi miuüa kowi dow enni paw pe tara ka-kat tak bow? ⁵ Enni na rukrai la kownkow ang tek enni mih chekhai, Tainauuüa pungma dawng kowi nowngia chet tara mih chanlai mih maru lowkia chowh khowm padow uowi dowi reng tak bow? ⁶ Aia tainau mih aia tainau tara na chetla kownkow tara chetra kowi pawla reng, nami dow owm dowi miuüa pur kowi chekhai hing chetah reng. ⁷ Enni mih lowk kow lowk tara chet kown nau mih dow enni piak müah chekhai, matawng palawng kachow lowk kow lowk enni ia takham sum ria ria dowi? ⁸ Angak chekhai enni chang mih, enni tapuan mih paw na chekhai, nami dow enni tainauuüa kowi enni chang mih chekhai. ⁹ Nahanow maru tachi-tanawm dowi miuüa dow Thurai pren kowi tawi uowi büah kownnadowitham pami enni tuk dowi bow? Puanra kowi hang uowi büah diah, tapawk nanau mih chepaw, arup achup miuüa chepaw, iangchang miuüa chepaw, maru aleuma miuüa chepaw, likua leuma miuüa chepaw, ¹⁰ Kuk miuüa chepaw, maru alawphama miuüa chepaw, tapring tanang nauma miuüa chepaw, abüm asua nauma miuüa mih dow Thurai pren kowi tawi uowi büah dowi tham. ¹¹ Now, enni matawng mih chabak dow naiawng mih maru enni nane chadiah, nachenganchepaw CHAKRAMANG Isu Krista ming kowi hai a-i Thurai lümla kowi dow siahah sauah mih enni na khai bowt, pachim pasai enni khai bowt, kuaah asum dowi mih enni uang na khai bowt. CHANG IANG MIHUÜA ¹² Alup lowra mih chap ang mih dow iung chang khai, nachenganchepaw lowra lup nachangah kown mih iung bowk dowi; Alup lowra chap ang mih iung chang khai, nachenganchepaw matawng mih nar kowi dow ang tape dowi. ¹³ Nachang kown mih dow mu vüi chekhai, nachenganchepaw, Thurai kowi dow natamata kown. Now, buk kowh mipaw tapawk tanau (chang iang) kown mihnadowichekhai, CHAKRAMANG vüi chekhai, CHAKRAMANG kow vüi chekhai. ¹⁴ Now, Thurai mih CHAKRAMG kowi dow kowngra hownia awr krungah mih chekhai, a-i kowi paw aia lowra nowngia changla mih hai nauang krüng a-i kown chekhai. ¹⁵ Enni kowh dow Krista hown taprek ta-owi pami enni tuk dowi bow? Krista hown kow taprek ta-owi mih dow paw tape hanow chawkkrawma taprek ta-owi kowi ang na thawpah kown chekhai bow? Nami dow alakma pacham uowi lah. ¹⁶ Nahanow, chawkkrawma kowi tatawm mih dow aiamat hai lawm pabuk panga chak na chekhai pamih enni tuk dowi bow? “Amatchi preia mih pabuk panga chak nauang na iüah bowt kown.” pa tek chekhai. ¹⁷ CHAKRAMANG hai tatawm mih tarap chedow, aia buk kowh hai lümla hai lawm pabuk pangasang uang na mih chekhai. ¹⁸ Lusa maru alup piakmi sarui mih kowh uat pra kowi chekhai; cham-iua maru mih tarapche dow aiamat kowh lukkowi aia piakta alup mih chekhai. ¹⁹ Enni tukah dowi chekhai bow, enni kowh kowi tarapche dow achim asaima mih Lümla kim pami, enni saktuak lak kowikowuowi mih pami, Thurai hownia kow enni kaah mih dow? ²⁰ Kowmatia kowh paw enninadowibowt chekhai, asung hown kow ranah mih enni nakhai bowt, naiawng rakowi enni kowh nga hown dow Thurai kowi ringkawah diah.