THURAI MARUUÜA TUT-E KOW PRING HAWIRA ¹ Enni pungma dawng kowi tapawk tanau (changiang) mih satang ang tah khai, naiawng mih tapawk tanau (iangchang) krang Jentailuüa dawng kowi khowm katpaw hing uowi dowi chowdiah, enni pungma dawng kowi maru lowkia mih aia pa kow masi kowi paw tape khai. ² Now, nami lupchang miia dow enni pungma dawng hownia naprüta kownkow aprüa dikma na uowi mih lak-e enni kut plan changla bawri rowt khai (kut plan awmrawm la rowt khai). ³ Ang matia ngengche mih kow hai ang tawi uowi chepaw, lümla kowi tarapchedow ang tawi uowi khai, lup naiawng khowt patma chang khai miia dow akawmat mih paw CHAKRAMANG Isu ming hai enni pungma dawng kowi tawi uowi khai mih powmiawng ang kituak tah khaowk. ⁴ Enni matia hai ang lümla dow a-i CHAKRAMANG Isu lowra nowngia changlami hai takua talawmah hanow, ⁵ Maru naiawng mih kowi dow, aia lümla CHAKRAMANG ni kowi dow lawngra kowi na nowngia uowila kownkow aia kow ngak süngnam kowi ap taah e dow na iung, ang pah chekhai. ⁶ Enni changla bawri mih iung dowi chekhai, Tua didcha mih hai kawmpa kluh kowi dow ia puala khai pami enni tuk dowi chekhai bow? ⁷ Thepe tua dowi mih paw enni na khai iawng kawm kluh sar enni na uang nowngia la kownkow tua prim mih dow kirta kuakta büah diah, a-i taklo pawi changla mih kowi paw ngen tah büah khai bowt chekhai rakowi, Krista ngengche kowi dow. ⁸ Naiawng mira kowi i chang bowt diah sik, tua prim mih hainadowiiawng angak uowi dowi mih kawm, The pe tua dowi mih hai i chang pawi rowt bowt diah sik. ⁹ Ang kow chasak kowi ang rui enni mih dow, Taklawp taiua (iangchang) mih hown hang ka taiua uowi büah diah. ¹⁰ Mami lusa kowi tapawk tanau (changiang) mih chepaw, lawpha hai kukpa chang marat miuüa ün chepaw, arup chup miuüa ün kowi mih dow mapaw na taklawp taiua dowi kown pami nadowi chekhai,nadowinow lusa pren hownia chamlang powt khe chiang. ¹¹ Akawmt tarapchedow lowra maru, tainau ming kowi hai, tapawk tanau (changiang) mih chepaw, lawpha mami chepaw, arup chup mih chepaw, tapring tanang nau mih chepaw nowngia kham iu arak mih chepaw, abum asua chak miuüa kowi chepaw, na klawp naiua dowi bowt kownkow enni tut-e ang rui ami chekhai; naiawng mih maru tut-e dow cha paw na tawi cha dowi kownkow. ¹² Tawngchow maratra nauowi kown prang kowikow maru tara ang chet-e? Thurai mih na tuk ang kown chatai. ¹³ Enni pungma dawng kowikow maruuüa kowi dow enni matia natuk kownnadowitham pabow? Maru ngakma kowi dow enni pungma dawng hownia prütta büah diah.