¹ Anging kowi mih Krista lupchangmiia kowi maru mih pacham ming anging lah. Now Thurai laipet lawnguan ming khet miia lukkowi peah kurdik mih chekhai. ² Mami re-e mih mingkhet miia dow maru mik kowi kaah sakowm mih powm iawng dow hau khai. ³ Nachenganchepaw enni matia mih chaing anging mih hai lusa maru tukah mih hai kow chin angiang mih ra dow achalachow (asowm lowmchow) chekhai; kowmatia khowm padow katpaw ang hing ta chaing dowi. ⁴ Matawngpaw aprawng aren ang hing tuk dowi chekhai; Nachenganchepaw nami kowi dow mapaw kuakah sum dowi; chaing mih ia dow CHAKRAMANG chekhai rakowi. ⁵ Nahanow akhin uang ting dowi rawn tak khe matawng mih paw hang chaingah büah diah, CHAKRAMANG uangiu uang dowi mowr mih dow, aiamat dow aiu kowikow laipet lawngun dow anowi kowi nauang phuang kown hanow saktuak kowikow laipet paw nauang phuang kown nami khin khe Thurai tut-e bowk bowk mih pamatia kiowrira naka kown. ⁶ Now Tainauuüalow, enni mih nanowng ia tukla kownkow chakowi ruita khowk mih klen kowi dow akeng mih lai nachün dowi kownkow ang hai Apawla ang ching hownia aku nowngia müla kownkow ang uang phuang enni mih chekhai, pamatia chowlowk kow nowngia changla bawri dowi kownkow. ⁷ Akeng mih lak-e enni iung pami amiaiawng mih paw tuak enni dowi. Tawng iawngmi takchow en kow uowi dowi uaniawng peknadowikow enni kami? En ka khowk kow ka dowi pami matawng iawng mih tak chow uowi en nanowngia changla bawri kown mih? ⁸ Akawmat dow enni du khai bowt, kureng paw kureng khai bowt, anging hownnadowimatchang paw nowngia chowng mang khai bowt; nowngia chowng mang khai-e dow na iuang kown chadiah, anging paw enni matia hown na tawi nowngia chowng mang kown. ⁹ Thurai mih angiang chintakmiuüa mih na kowng kownkow khowmah bowkah mih ia powmiawng krawng hai mukuang kramamu hai maru maiow na muah tammasa kownkow uowi, akung amowi chow kowi tow anging mih chünchü ang pa reng khai. ¹⁰ Kristara kowi thuk mamih anging na chekhai, enni mih tarapchedow, Krista kowi chanlai mih maru enni na khai, anging dow akür apaa uowi dowi mih chekahi, enni tarapchedow kür ah uowi mih chekhai, enni dow maru rowsi hai uowi khai, anging tarapchedow maru e-ah mih hai anging uowi rowt mih chekhai. ¹¹ Akawmat pat mih paw angiang hawm sakkrai hai tui sakkrai hai khupdip-tawngklai uowi dowi hai maru nowng chang powng chang re kowi anging uowi khai, uowira nowm mih paw anging tawika dowi chakhai. ¹² kowmatia rut hai lup anowmma anging chang khai; maru mih nang anging chepaw anging peah prasi reng khai; maru mih chang anging anowng apowng chepaw anging kham sum reng chekhai. ¹³ Maru chawktowk chenganchepaw aklangiungma anging klowpah klangah khai. Akawmat pat, plawktua, lusa asür alawk towta-plut mih powmiawng nüla anging khai. ¹⁴ Enni na rukraila kownkow ang rui enni mih na dowi, ang sakrauah mih chauüa kowikow napring nahawila kownkow ang ruiah mih chekhai. ¹⁵ Krista kowi tüngsang mih patasawng (hamüt thawng) ia uowi chenganchepaw, pa mih dow akawmma enni kow hing uowi mih chatai na dowi, ang mih Krista Isu ming kowi dow satangiung hai ang pen (ka) enni mih chekhai. ¹⁶ Nahanow ang lü enni mih dow enni mih mü ang aku hanow ang iawng uowi büah diah. ¹⁷ Nami rakowi dow Timawthe, CHAKRAMANG kowikowang sakrauah mih cha hai kaah pasakowm mih dow enni tut-e ang uang krawi chinah mih chekhai; aiamat dow Krista kowi ang uowi mih krang pren towng kowi Thurai maru hawm powchak towng kowi tüngsangah reng mih powmiawng na petuk na petah enni kown iawk kown tai. ¹⁸ Now, enni tut-e ang uang nowng uang dowi pamih enni tuk rakowi tawngbak mih tarapchedow changla bawri chekhai. ¹⁹ Nachenganchepaw CHAKRAMANG mih nauta ang khai hanow, nawngcha mih kung kowi dow enni tut-e ang na uang kown, nahanow chang bawri mih laiklow mih downadowimiiawng, amatni lowra nowngia changla mih kowi dow na uang na rowt büah kown chekhai. ²⁰ Thurai pren laiklow chatai uowinadowichekhai, natarapcheow lowra nowngia changlami na rowt mih chekhai. ²¹ Matawng mih chow enni nau rowt? Abawp mua hailawm bow enni tut-e ang na uang kown? Sakraura hai khamsum khamdaw hai lümlai hai bow enni nau rowt?