THURAI NARUÜA ¹ Now, Tainauuüa low, Lümla maruuüa tut-e kow tek powmiawng dow enni tut-e laiklow ang nowngia tek enni dowi chekhai, kowh prüa hai kow maruuüa tut-e tek powmiawng dow ang tek khai rowt, Krista prakowi ingrikchowhuüa tut-e kow tek powmiawng dow tek iawk mih chekhai. ² Hawm na dowi, iawntui hai dow ang thum enni khai, Hawm mih enni hing nowngiachah dowi reng tak; na chow, akawmat paw enni hing nowngiachah dowi reng tak chekhai. ³ Kowh prüa kowikow maru enni na reng tak rakowi; enni pungma dawng kowi irsi-karchanra hai taiüa tanangra uowi reng tak rakowi dow kowh prüa maru enni na khai tak lusa maru powmiawng enni uowi reng tak chekhainadowibow? ⁴ Maru lowkia mih, “Pawl powchak ang na,” akeng mih dow, “ang dow Apawla powchak ang na,” pa tek mowr dow lusa maru enninadowitak pa bow? ⁵ Apawla dow amiaiawng mih chow? Pawl dow amiaiawng mih chow? Amatchi dow lupchang (chintak) miia, enni matia kowi pa owm enni mih krowng chatai na khai; nami khowm dow CHAKRAMANG iuaah iüah ria ria mih iawng chekhai. ⁶ Ang mih dow chowkah khai, Apawla dow tui hai thumah khai, nachenganchepaw Thurai mih dow peawr iuk peawr sownah mih chekhai. ⁷ Nahanow, awr pa iuk sownah mih dow Thurai chatai klen kowi dow, achowk miia dow matawngpawnadowimih chekhai, tui hown kow thumah miia paw matawng paw hingnadowichekhai. ⁸ Now, achowk miia hai tui hai kow thumah miia dow pabuk pangasang na iüah khai, nachenganchepaw amatchi kawmah mih iawng kowi awmrawm sung mih dow naka ria ria iüah kown. ⁹ Angching dow Thurai lup chang auiua krowng chatai, enni dow Thurai kow kheti, Thurai kimchak ia paw na khai. ¹⁰ Thurai sanara uang pe ang iawng kun changmi alucha lang chanlai mih powmiawng ang mih hua mih ang awr lüpah khai, akeng mih dow namih luk kowi kim uang chang büah khai, Nachenganchepaw lawngtow büarüa nami lukkowi amatni nachang mih krang kowi dow kaneucha pa cham paw pe atuak lah. ¹¹ Hua lüpta khowk mih klen kowi dow, akeng hua lüpta khowk mih luk kowi amiaiawng mih paw nowngia lüp kownnadowitham; nami hua lüp mih dow Isu krista na chekhai. ¹² Now, nami hua lüp lukkowi dow lowra maru kuh hai chepaw, tai hai chepaw, maiak hai chepaw sing hai chepaw, pram hai chepaw, chahau hai chepaw chang khai-e dow, ¹³ lawngtowng büarüa lup chang mih dow na uangtüng bowt kown. Sat mih na tungah kown chekhai rakowi; mami na uang tatüng kown chekhai rakowi; maih ngengche mih dow lawngtowng büarüa lup chang dow matawngiawng chow na khai mih na chaingah bowt kown. ¹⁴ Amiaiawng mih lupchang mih paw nami luk kowi chang kow uowi reng mih dow awmrawm sung naka kown. ¹⁵ Amiaiawngmi lupchang mih chow kam khai mi dow naiawm kown chekhai; nachepaw lawngra nauowi kown, natrapche dow maih dawng hownia kow uang plai mih iawng dow na-own kown. ¹⁶ Thurai kim enni na khai now, Thurai Lümla enni matia kowi uowi pami enni tuk dowi bow? ¹⁷ Amiaiawngmi chow Thurai kim piakta khai hanow, aiamat kowi paw Thurai mih paw napiaktaah kown chakhai; Thurai kim dow achim asaima chekhai rakowi nami kim dow enni matia chekahi; ¹⁸ Amiaiawng mih paw pamatia kowi hang pa chang tapuan lah; Enni puangma dawng kowi lowra maru mami lusa kowi chanlai mih kowi tanü takhai hanow na nowngiachanlai lah kownkow, thuk mih kowi pacham chowng lah. ¹⁹ Lusa kowikow chanlaira dow Thurai tut-e thuk mami chekhai, “aia dow chanlai miuüa kowi prengia hown chatai na khümah kown.” Pah ruita khowk mih powm iawng dow. ²⁰ CHAKRAMANG dow maru chanlai miuüa saktuak ün mih dow aiaiawngma (kaah atawng akeng dowi) chekhai pami aia plan kutruiah khai iawk. ²¹ Naiawngra kowi amiaiawngmi lusa maruuüa kowi hang patow sakowm lah, lowra mih enni kow na bowk chekhai rakowi; ²² Pawl chepaw, Apawla chepaw, kipha chepaw, lusa chepaw, siangra chepaw, kowngra chepaw, alup uowi mih chepaw, alup nauang ting kown mih chepaw, bowk bowk mih enni matia kow chekhai rakowi; ²³ Enni paw Krista kow enni na chekhai; Krista mih paw Thurai kow chekhai. KRISTA CHINTAKMIUÜA