¹ Tainauuüa low, enni tut-e satangiung ang uang tek enni khowk ke, laiklow aiung mami chainnadowiang uang tek enni, now chanlai mami maru powm iawngnadowiang uang tek enni lai klow. ² Krista Isu aiamat ngengche kowi tarah khai mih laiklow chataih klen kowi dow enni pungma dawng kowi matawng mih paw na tuk na tek kown mih paw ang tuak dowi. ³ Now, kür uowi mih hai kram hai kaneuma kowhchür luk kowi enni pungma dawng kowi ang uowi khai. ⁴ - ⁵ Now, enni owmra dow lusa maru chanlaira mih lukkowi enni neplawng nesak dowi hai, Thurai lowra nowia changlami lukkowi enni na nowngia neplawng nesak lah rowt kownkow ang nawr hownia kow lai lawt mih hai tek enni chia enni mihnadowichekhai, Lümla hai lowra nowngia chanla mih hai petuk petala enni mih na khai rowt. THURAI CHANLAIRA ⁶ Natarapche dow angiang tachi miuuüa pungma dawng kowi dow chanlai laiklow hai dow ang tek reng, nachenganchepaw, mami lusa chanlai laiklow hai mih dow na dowi, mami lusa tara chetmiuüa na tama kown ünmi chanlai laiklow mih dow hing na dowi. ⁷ Thurai chanlai laipet laiklow, ang tek rowt mih chekhai, chanlai laiklow tapet mih, a-i kraingra na ownla kownkow Thurai mih lusa uowi dowi khe kow rik khowm rik bowk ta khowk mih dow. ⁸ Nami dow mami lusa tara chetmiuüa maiow mih dow tuk büah dowi; tuk khai panü dow kraingra CHAKRAMANG kowi dow tarah büah dowi tham. ⁹ “Mik kowi katpaw khaiah dowi, param hai katpaw taah dowi, maru saktuak kowi katpaw kup dowi, Thurai mih aia sakruah miuüa vüi aia kamrüt pemi sarui kowi dow.” Ruiah mi iawng dow. ¹⁰ Nahanow Thurai tarapche dow lümla hai a-i tut-e uang petuk petah a-i khai, Lümla mih dow bowk bowk kowi krawi chamah reng, nami klen kowi Thurai lawng uang kowi apub mami paw krawi cham reng chekhai. ¹¹ Lusa maru lawnguan kowi miaiawng mih maru chow nowngiatuk? Maru saktuak kowikowLümla chatai ia tuk; nami powm iawng dow Thurai lawnguan kowi paw amiaiawng mih paw tuk dowi, Thurai lümla chatai tuk mih uowi. ¹² Nachenganchepaw, Lusa kowikowLümla ngak a-i kamih na dowi, Thurai lümla chatai a-i kami; Thurai sakraura uang pe a-i mih nowngia tukla kownkow. ¹³ Lusa maru chanlai laiklow tatüng tasang mih laiklow kowi dow tekla dowi iawng, Lümla tatüng tasang mih laiklow kowi tekah rowt hanow, lümla pra kow laiklowündow lümla pra maruuüa tut-e phuang hanow, na ünmi laiklow pe a-i mih laiklow ün paw a-i tek kahai. ¹⁴ Lusa maru dow Thurai lümla pra kowikow laiklow ün dow howrah reng dowi, amatni tuak kowi dow athukma nami chekhai rakowi; lümla hai kow petuk petaah mih nami rakowi kow tuk paw mapaw tukta dowi chekhai. ¹⁵ Tarapchedow miaiawng mih chow lümla hownka nakhai mih dow, aia dow bowk bowk mih lawnguan kowi ia tuk khai; natarapche aia kowi dow, akengmi maru hownia nowng tukah dowi chekhai. ¹⁶ Amiaiawng mih chow CHAKRAMANG saktuak tuk khowk kow aiamat kowi nowngia tüngah sangah mih uowi? A-i tarapche dow Krista sangching iawng uowi mih chekhai.