¹ Wenno saanyo kadi nga ammo, kakabsat, (ta agsasaoak kadagiti tattao a makaammo iti linteg), a ti linteg ti mangtengtengngel iti maysa a tao kabayatan nga agbibiag isuna? ² Ta inggalut ti linteg ti naasawaanen a babai iti asawana a lalaki kabayatan a sibibiag daytoy, ngem no matay ti asawana a lalaki, mawayawayaan isuna manipud iti linteg ti panagasawa. ³ Ngarud, kabayatan a sibibiag pay ti asawana a lalaki, no makitipon isuna iti sabali pay a lalaki, maawagan isuna a mannakikamalala a babai. Ngem no matay ti asawana a lalaki, nawaya isunan manipud iti linteg, isu a saan isuna a mannakikamalala no makitipon isuna iti sabali a lalaki. ⁴ Ngarud kakabsatko, nagbalinkayo met a natay iti linteg babaen iti bagi ni Kristo. Daytoy ket tapno mabalinkayo a makitipon iti sabali, dayta ket, kenkuana a napagungar manipud iti patay, tapno makapagbungatayo para iti Dios. ⁵ Ta idi addatayo iti lasag, dagiti managbasol a tarigagay, nga niriing ti linteg, ket agtrabtrabaho iti paset ti bagitayo tapno agbunga iti ipapatay. ⁶ Ngem ita ket nawayawayaantayon manipud iti linteg. Nataytayo iti dayta a nakatengngelantayo. Daytoy ket tapno makapagserbitayo iti kinabaro ti Espiritu, ken saan nga iti kinadaan ti surat. ⁷ Ania ngarud ti ibagatayo? Ti linteg kadi ket basol? Saan koma. Nupay kasta, saanko koma a naammoan ti basol, no saan a babaen iti linteg. Ta saanko koma a naammoan ti kinaagum no saan nga imbaga ti linteg a, "Saanka nga agag-agum." ⁸ Ngem innala ti basol ti gundaway babaen iti bilin ken impataudna amin a kita ti kinaagum kaniak. Ta iti kinaawan ti linteg, natay ti basol. ⁹ Iti naminsan, nagbiagak nga awan ti linteg, ngem idi immay ti bilin, nagbiag manen ti basol ket natayak. ¹⁰ Ti bilin koma nga mangyeg iti biag ket nagbalin nga ipapatay kaniak. ¹¹ Ta innala ti basol ti gundaway babaen iti bilin ket inallilawnak. Babaen iti bilin ket pinataynak. ¹² Isu a nasantoan ti linteg, ken ti bilin ket nasantoan, nalinteg ken nasayaat. ¹³ Ngarud, nagbalin kadi a patay kaniak ti nasayaat? Saan koma. Ngem ti basol, tapno maipakita a basol daytoy, nangyeg iti ipapatay kaniak babaen iti nasayaat, ken babaen iti bilin, maipakita a ti basol ket basol a saan a marukod. ¹⁴ Ta ammotayo a naespirituan ti linteg, ngem addaak iti lasag. Nailakoak iti pannakatagabu ti basol. ¹⁵ Ta ti ar-aramidek, pudno a saanko a maawatan. Ta ti kayatko nga aramiden, saanko a maaramid, ken ti kagurgurak, isu ti ar-aramidek. ¹⁶ Ngem no aramidek ti diak kayat, umanamongak iti linteg a nasayaat ti linteg. ¹⁷ Ngem ita ket saanen a siak ti mangar-aramid, ngem ti basol nga agnanaed kaniak. ¹⁸ Ta ammok kaniak, dayta ket ti lasagko, a saan nga agnaed iti nasayaat a banag. Ta ti tarigagay para ti pagimbagan ket adda kaniak, ngem diak maaramid. ¹⁹ Ta ti nasayaat nga kayat ko, saanko nga ar-aramiden, ngem ti dakes a diak kayat, dayta ti ar-aramidek. ²⁰ Ita, no aramidek ti diak koma kayat nga aramiden, ket saanen a siak ti mangar-aramid ngem ketdi, ti basol nga agnanaed kaniak. ²¹ Ngarud, naammoak a daytoy nga linteg: No kayatko nga aramiden ti nasayaat, ti dakes ket adda kaniak. ²² Ta agrag-oak iti linteg ti Dios babaen iti akin-uneg a kinataok. ²³ Ngem makitak ti naidumduma a paglintegan kadagiti paset ti bagik. Busbusorenna dayta a baro a paglintegan iti panunotko. Pagbalbalinennak a balud babaen iti paglintegan ti basol nga adda laeng kadagiti paset iti bagik. ²⁴ Nakakaasiak a lalaki! Siasino ti mangispal kaniak manipud iti daytoy a bagi ti patay? ²⁵ Ngem agyamanak iti Dios babaen kenni Jesu-Kristo nga Apotayo! Ngarud, agserserbiak iti linteg ti Dios iti panunotko. Nupay kasta, babaen iti lasag ket pagserbiak ti paglintegan ti basol.