¹ Awan ngarud itan ti pannaka-ukom kadagiti adda kenni Kristo Jesus. ² Ta ti paglintegan iti Espiritu ti biag kenni Kristo Jesus ket winayawayaannaka manipud iti paglintegan ti basol ken patay. ³ Ta inaramid ti Dios ti saan a kabaelan ti linteg nga aramiden gapu ta nakapuy daytoy iti lasag. Inbaonna ti bukodna nga Anak iti kas iti langa ti managbasol a lasag tapno agbalin a daton para iti basol, ken inukomna ti basol iti lasag. ⁴ Inaramidna daytoy tapno matungpal kadatayo dagiti sapsapulen ti linteg, datayo a magmagna a saan a maiyannurot iti lasag, ngem maiyannurot iti Espiritu. ⁵ Dagiti agbibiag a maiyannurot iti lasag ket ipangpangronada dagiti banbanag ti lasag, ngem dagiti agbibiag a maiyannurot iti Espiritu ket ipangpangronada dagiti banbanag ti Espiritu. ⁶ Ta ti panagpanpanunot ti lasag ket patay, ngem ti panagpanpanunot ti Espiritu ket biag ken talna. ⁷ Daytoy ket gapu ta ti panagpanpanunot ti lasag ket sumalungasing iti Dios, ta awan daytoy iti panangituray iti linteg ti Dios, wenno saanna a kabaelan a paiturayan iti lasag. ⁸ Dagiti adda iti lasag ket saanda a maparagsak iti Dios. ⁹ Nupay kasta, awankayo iti lasag ngem addakayo iti Espiritu, no pudno nga agnanaed ti Espiritu ti Dios kadakayo. Ngem no adda ti awan ti Espiritu ni Kristo kenkuana, saan isuna a kukua ni Kristo. ¹⁰ No adda ni Kristo kadakayo, natay ti bagi no maipapan iti basol, ngem sibibiag ti espiritu no maipapan iti kinalinteg. ¹¹ No agnanaed kadakayo ti Espiritu a nangpagungar kenni Kristo, isuna a nangpagungar kenni Kristo manipud kadagiti natay ket mangted met iti biag ti nainlasagan a bagiyo babaen iti Espirituna, nga agnanaed kadakayo. ¹² Ngarud kakabsat, nakautangtayo, ngem saan nga iti lasag tapno agbiag a maiyannurot iti lasag. ¹³ Ta no agbiagkayo a maiyannurot iti lasag, agtungpalkayo iti patay, ngem no babaen iti espiritu ti panangpapatayyo kadagiti aramid ti bagi, agbiagkayonto. ¹⁴ Ta kas kaadu iti indalan ti Espiritu ti Dios, dagitoy dagiti annak ti Dios. ¹⁵ Ta saanyo manen a naawat ti espiritu ti pannakatagabu tapno agbutengkayo; ngem ketdi inawatyo ti espiritu ti pannakaampon, isu nga ipukkawtayo ti, "Abba, Ama!" ¹⁶ Ti Espiritu ti mangsaksi iti espiritu tayo nga annaknatayo ti Dios. ¹⁷ No datayo ket annak, tagatawidnatayo met ngarud ti Dios. Ken makipagtawidtayonto kenni Kristo, no pudno a makipagsagabatayo kenkuana tapno mapadayawantayo met a kaduana. ¹⁸ Ta ibilangko a saan a maikari dagiti sagsagabaentayo iti daytoy agdama a tiempo a maikompara iti dayag ti Dios a maiparangarangto kadatayo. ¹⁹ Ta nagagar nga agur-uray a namnamaen dagiti naparsua iti pannakaiparangarang dagiti annak ti Dios. ²⁰ Ta naikeddeng nga awan serserbina ti sangaparsuaan, saan nga iti bukodna a pagayatan, ngem kenkuana a nangikeddeng iti dayta, iti panangnamnama ²¹ a maispalto ti sangaparsuaan manipud iti pannakatagabu iti panagrupsa, ket maipanto iti pannakawaya-waya ti dayag dagiti annak ti Dios. ²² Ta ammotayo nga agas-asug ken agrigrigat ti sangaparsuaan agingga ita. ²³ Saan laeng a dayta, ngem uray pay datayo mismo, nga addaan kadagiti immuna a bunga ti Espiritu, uray agas-asugtayo iti kaunggantayo, nga agur-uray iti pannakaampontayo, ti pannakasubbot ti bagitayo. ²⁴ Ta naisalakantayo babaen iti daytoy a namnama. Ngem ti namnamaentayo a mapasamak ket saan pay a nakitkita nga namnama, ta siasino ti sinanama nga agur-uray iti makitkitanan? ²⁵ Ngem no sinanamatayo maipanggep iti saantayo pay a nakita, aguraytayo ngarud a siaanus para iti daytoy. ²⁶ Iti isu met laeng a wagas, tumultulong met ti Espiritu kadagiti pagkapuyantayo. Ta saantayo nga ammo ti rumbeng a panagkararagtayo, ngem ti Espiritu mismo ti mangibabaet kadatayo nga addaan kadagiti saan a maibalikas nga asug. ²⁷ Ti mangsuksukimat kadagiti puso ket ammona ti panpanunoten ti Espiritu, gapu ta isuna ti mangibabaet kadagiti namati segun iti pagayatan ti Dios. ²⁸ Ammotayo nga kadagiti agay-ayat iti Dios, aramidenna amin a banbanag para iti pagimbagan, para kadagiti naayaban segun iti panggepna. ²⁹ Gapu ta dagiti sigud nga am-ammona, dinutokanna met ida a maiyasping iti langa ti Anakna, tapno agbalin isuna nga inauna kadagiti adu nga agkakabsat. ³⁰ Kadagiti pinilina, inayabanna met ida. Dagiti inayabanna, pinalintegna met ida. Dagiti pinalintegna, pinadayawanna met ida. ³¹ Ania ngarud, ti maibagatayo maipanggep kadagitoy a banbanag? No kaduatayo ti Dios, siasino ti bumusor kadatayo? ³² Isuna a saan a nangispal iti Anakna ngem inyawatna ketdi isuna a para kadatayo amin, kasano a saannanto met nga ited kadatayo nga awan bayadna dagiti amin a banbanag? ³³ Siasino ti mangiyeg iti pammabasol kadagiti pinili ti Dios? Ti Dios ti mangpalpalinteg. ³⁴ Siasino ti mangukom? Ni Kristo ti natay iti krus— ken saan laeng a dayta, napagungar met isuna—isu nga adda iti makannawan nga ima iti Dios, ken isuna ti mangibabaet kadatayo. ³⁵ Siasino ti makaisina kadatayo manipud iti ayat ni Kristo? Pannakaparigat kadi, wenno panagtuok, wenno pannakaidadanes, wenno bisin, wenno kinalamo-lamo, wenno peggad, wenno kampilan? ³⁶ Ta kas naisurat, "Mapapataykami iti agmalem para iti pagimbaganyo. Naibilangkami a karnero a maparti." ³⁷ Kadagitoy amin a banbanag ket naaddaan tayo iti naan-anay a panagballigi babaen iti maysa a nangayat kadatayo. ³⁸ Ta naallukoyak nga uray ni patay, wenno biag, wenno dagiti anghel, wenno ti gobierno, wenno dagiti banbanag nga adda, wenno dagiti banbanag nga umay, wenno pannakabalin, ³⁹ wenno kinangato, wenno kinauneg, wenno dadduma pay a naparsua, ket saannatayo a maisina manipud iti ayat ti Dios nga adda kenni Kristo Jesus nga Apotayo.