¹ Ania ngarud ti ibagatayo? Agtultuloytayo kadi nga agbasol tapno umado iti parabur? ² Saan koma. Datayo a natay iti basol, kasano nga agbiagtayo pay latta iti daytoy? ³ Saanyo kadi nga ammo a ti kaadu iti nabautisaran kenni Kristo Jesus ket nabautisaran iti pannakatayna? ⁴ Kaduanatayo ngarud a naitabon babaen iti pannakabautisar iti ipapatay. Napasamak daytoy tapno kas iti pannakapagungar ni Kristo iti patay babaen iti dayag ti Ama, kasta met a magnatayo iti kinabaro ti biag. ⁵ Ta no nakipagmaymaysatayo kenkuana iti ipapatayna, makipagmaymaysatayonto met iti panagungarna. ⁶ Ammotayo daytoy, nga ti daan a kinataotayo ket nailansa kenkuana tapno iti bagi ti basol ket madadael. Napasamak daytoy tapno saantayon nga agbalin a tagabu iti basol. ⁷ Ti siasinoman a natay ket naideklara a nalinteg no maipapan iti basol. ⁸ Ngem no nataytayo a kadua ni Kristo, mamati tayo a makipagbiagtayo met kenkuana. ⁹ Ammotayo a napagungar ni Kristo manipud kadagiti natay, ken saanen a natay isuna; saanen nga agturay ti patay kenkuana. ¹⁰ Ta maipapan iti ipapatay a nakatayanna iti basol, natay isuna a naminpinsan para iti amin. Nupay kasta, ti biag a pagbibiaganna, pagbibiaganna daytoy a para iti Dios. ¹¹ Iti isu met laeng a wagas, masapul met nga ibilangyo dagiti bagbagiyo a natay iti basol, ngem sibibiag iti Dios kenni Kristo Jesus. ¹² Ngarud, saanyo nga itulok nga agturay ti basol iti nainlasagan a bagiyo tapno pagtulnoganyo ti gartemna. ¹³ Saanyo nga idatag dagiti paset ti bagiyo iti basol a maaramat iti kinakillo. Ngem idatagyo dagiti bagbagiyo iti Dios kas sibibiag manipud iti patay, ken idatagyo dagiti paset ti bagiyo iti Dios nga maaramat a maipaay iti kinalinteg. ¹⁴ Saanyo nga ipalubos nga agturay ti basol kadakayo. Ta awankayon iti linteg no di ket iti parabur. ¹⁵ Ania ngaruden? Agbasoltayo kadi gapu ta awantayo iti panangituray ti linteg, ngem iti panangituray ti parabur? Saan koma. ¹⁶ Saanyo kadi nga ammo a ti pangidataganyo iti bagiyo kas adipen, isu dayta ti nagbalinanyo nga adipen iti rumbeng a pagtulnoganyo? Pudno daytoy nga adipennakayo man ti basol, a mangiturong kadakayo iti patay, wenno adipennakayo ti panagtulnog, a mangiturong kadakayo iti kinalinteg. ¹⁷ Ngem agyamanak iti Dios! Ta nagbalinkayo nga adipen ti basol, ngem nagtulnogkayo a sipupuso iti kita ti sursuro a naited kadakayo. ¹⁸ Nawayawayaankayo manipud iti basol, ken napagbalinkayon nga adipen ti kinalinteg. ¹⁹ Agsasaoak a kas tao gapu iti kinakapuy ti lasagyo. Ta idi indatagyo dagiti paset ti bagiyo kas tagabu iti kinarugit ken iti kinadakes, nangyeg iti ad-adu pay a kinadakes, iti isu met laeng nga wagas, idatagyo ti bagiyo a kas tagabu ti kinalinteg para iti pannakapasanto. ²⁰ Ta idi adipennakayo ti basol, nawayakayo manipud iti kinalinteg. ²¹ Iti dayta a tiempo, ania a bunga ti naadda kadakayo manipud kadagiti banbanag nga ibainyo ita? Ta patay ti pagbanagan dagitoy a banbanag. ²² Ngem ita ta nawayawayaankayon manipud iti basol ken nagbalinkayo a tagabu ti Dios, adda kadakayo ti bungayo para iti pannakapasanto. Agnanayon a biag ti pagbanaganna. ²³ Ta patay ti bayad ti basol, ngem ti sagut ti Dios ket agnanayon a biag kenni Kristo Jesus nga Apotayo.