¹ Agsipud ta napalintegtayo babaen iti pammati, addaantayo iti kappia iti Dios babaen kenni Apotayo a Jesu-Kristo. ² Babaen kenkuana naaddaantayo met iti dalan babaen ti pammati iti daytoy a parabur a pagtaktakderantayo, ket agpannakkeltayo iti namnama ti dayag iti Dios. ³ Saan laeng a daytoy, ngem agpannakkeltayo met kadagiti panagsagsagabatayo. Ammotayo a patauden ti panagsagsagaba iti panagibtur. ⁴ Patauden iti panagibtur ti kababalin, ken patauden iti kababalin ti talged, ⁵ ken saan a makaupay daytoy a kinatalged gapu ta naibukbok iti ayat ti Dios kadagiti puspusotayo babaen iti Espiritu Santo, a naited kadatayo. ⁶ Ta kabayatan a nakapuytayo latta, natay ni Kristo iti umno a tiempo para kadagiti saan a nadiosan. ⁷ Ta narigat para iti maysa a tao a matay para iti nalinteg a tao, wenno nalabit nga adda natured a matay para iti naimbag a tao. ⁸ Ngem panpaneknekan ti Dios ti bukodna nga ayat kadatayo, gapu ta bayat a managbasoltayo pay laeng, natay ni Kristo para kadatayo. ⁹ Ngarud, ad-adda pay ita a napalintegtayo babaen iti darana, maisalakantayo babaen iti daytoy manipud iti pungtot iti Dios. ¹⁰ Ta bayat a kabusornatayo, nakikappiatayo iti Dios babaen iti pannakatay ti Anakna, ad-adda pay a kalpasan a nakikappiatayo, maisalakantayonto babaen iti biagna. ¹¹ Saan laeng a daytoy, ngem agrag-otayo met iti Dios babaen kenni Apotayo a Jesu-Kristo, naawattayo ita babaen kenkuana daytoy a pannakaikappia. ¹² Ngarud, simrek ti basol iti lubong babaen iti maysa a tao, iti daytoy a wagas immay ni patay babaen iti basol. Ken nagsaknap ti patay iti amin a tattao, gapu ta nagbasol ti amin. ¹³ Ta agingga nga adda iti linteg, ket adda ti basol iti lubong, ngem awan maibilang a basol no awan iti linteg. ¹⁴ Uray no kasta, nagari ti patay manipud kenni Adan agingga kenni Moises, uray kadagiti saan a nagbasol a kas iti panagsukir ni Adan, a kas kenkuana nga umayto. ¹⁵ Ngem ti sagut ket saan a kas iti panagsalungasing. Ta no ti nakatayan ti kaadduan ket gapu iti panagsalungasing ti maysa, ad-adda pay a nawadwad ti parabur ti Dios ken ti sagut babaen iti parabur ti maysa a tao, a ni Jesu-Kristo, a nagsaknap iti kaadduan! ¹⁶ Ta iti sagut ket saan a kas iti nagbanagan ti nagbasol. Iti pannakaukom nga suruten iti maysa a panagbasol ket mangyeg iti pannakailunod, ngem iti sagut nga suruten iti adu a panangbasol ket mangyeg iti pannakailinteg. ¹⁷ Ta no, babaen iti basol iti maysa, nagturay ti patay maigapo iti maysa, ad-addanto pay nga agturay dagiti umawat iti aglaplapusanan a parabur ken agturay ti sagut iti kinalinteg babaen iti biag ti maysa, a ni Jesu-Kristo. ¹⁸ Kasta ngarud, iti panagbasol ti maysa ket mangiturong iti pannakadusa ti amin a tattao, kasta met a babaen iti maysa nga aramid iti kinalinteg ket immay ti pannakailinteg ken biag para kadagiti tattao. ¹⁹ Ta iti saan a panagtulnog ti maysa a tao ket nagbalin a managbasol iti amin a tao, kasta met nga adunto ti mapalinteg babaen iti panagtulnog iti maysa. ²⁰ Ngem immay ti linteg tapno mapaado iti panagbasol. Ngem iti panangdakkel ti basol, ad-adda pay nga dimmakkel iti parabur. ²¹ Napasamak daytoy, tapno kas agturay ti basol kenni patay, kasta met a mabalin nga agari ti parabur babaen iti kinalinteg a para iti agnanayon a biag babaen kenni Jesu- Kristo nga Apotayo.