¹ Ania ngarud iti ibagatayo a natakkuatan ni Abraham, nga amaentayo segun iti lasag? ² Ta no napalinteg ni Abraham babaen kadagiti ar-aramid, addaan koma isuna iti rason nga agpasindayag, ngem saan nga iti sangoanan ti Dios. ³ Ta ania iti ibagbaga ti Nasantoan a Surat? "Pinati ni Abraham ti Dios, ket naibilang kenkuana daytoy a kas kinalinteg." ⁴ Ita para kenkuana nga agtrabtrabaho, saan a naibilang a kas parabur ti tangdan, ngem kas nateggedan. ⁵ Ngem para kenkuana a saan nga agtrabtrabaho ngem ketdi mamati iti daydiay mangpalpalinteg iti saan a nadiosan, naibilang ti pammatina a kas kinalinteg. ⁶ Ibagbaga met ni David ti kinagasat ti tao nga ibilbilang ti Dios a nalinteg uray awan ti ar-aramidna. ⁷ Kinunana, "Nagasat dagiti napakawan dagiti basbasolda, ken nakalluban dagiti basbasolda. ⁸ Nagasat ti tao a saanto nga ibilang ti Apo ti basolna." ⁹ Naibalikas laeng kadi ngarud daytoy a bendision kadagiti adda iti pannakakugit, wenno kasta met kadagiti awan iti pannakakugit? Ta ibagatayo, "Pammati ti nakaibilang kenni Abraham iti kinalinteg." ¹⁰ Isu a kasano a naibilang daytoy? Idi adda ni Abraham iti pannakakugit wenno idi awan iti pannakakugit? Saan nga idi nalpasen, ngem ketdi kasakbayanna! ¹¹ Inawat ni Abraham ti pagilasinan ti pannakakugit. Daytoy ket selyo iti kinalinteg ti pammati a natagikuanan idi awan pay iti pannakakugit. Ti nagbanagan daytoy a pagilasinan ket nagbalin isuna nga ama dagiti amin a mamati uray pay no addada iti saan a pannakakugit, tapno maibilangto ti kinalinteg para kadakuada. ¹² Nagbalin pay isuna nga ama ti pannakakugit saan laeng nga para kadagiti nakugit ngem kasta met kadagiti sumurot kadagiti addang ni amatayo nga Abraham nga adda kenkuana idi awan pay iti pannakakugit. ¹³ Ta saan a babaen iti linteg a naited ti kari kenni Abraham ken kadagiti kaputotanna, daytoy a kari nga agbalindanto a tagatawid ti lubong ngem ketdi babaen iti kinalinteg ti pammati. ¹⁴ Ta no tagatawid dagiti adda iti linteg, nagbalinen nga awan serserbi ti pammati, ken awan metten ti nagmamaayan ti kari. ¹⁵ Ta iyeg ti linteg ti pungtot, ngem no sadino ti awan linteg, awan met ti panagsalungasing. ¹⁶ Ta gapu iti daytoy, mapasamak daytoy babaen iti pammati, tapno iti kari ket mapasamak babaen iti parabur ken maipanamnama kadagiti henerasyon ni Abraham— saan laeng kadagiti makaammo ti linteg, ngem kasta met dagiti nagtaud iti pammati ni Abraham. Ta isuna ti Amatayo amin, ¹⁷ a kas naisurat, "Inaramidka nga ama iti adu a pagilian." Adda ni Abraham iti presensiana a nagtalkanna, dayta ti Dios, a mangmangted iti biag kadagiti natay ken mangpaadda kadagiti banbanag nga awan. ¹⁸ Iti namnama namati isuna maibusor iti namnama, nga agbalin isuna nga Ama ti adu a pagilian, segun iti naibaga, "... Kas met kadagiti kaputotamto." ¹⁹ Saan isuna a nakapuy iti pammati, binigbigna a natayen ti bagina (gapu ta agarup sangagasut ti tawenna), Binigbigna met ti kinaawan serserbi ti aanakan ni Sarah. ²⁰ Ngem gapu iti kari ti Dios, saan a nagduadua ni Abraham iti panamati . Ngem ketdi, napapigsa iti pammatina ken nangted iti pammadayaw iti Dios. ²¹ Naan-anay a nakumbinsi iti inkari ti Dios, nabaelanna met nga inleppas. ²² Daytoy ngarud ket "naibilang kenkuana a kas kinalinteg." ²³ Ngem dagiti sao, "naibilang kenkuana" ket saan laeng a naisurat para iti pagsayaatanna. ²⁴ Naisurat met daytoy a para kadatayo, nga maibilang iti Dios a nalinteg kadatayo a mamati kenkuana a nangpagungar kenni Jesus nga Apotayo manipud patay. ²⁵ Daytoy ti naiyawat a para kadagiti basbasoltayo ken napagungar para iti pannakapalintegtayo.