¹ Ania ngarud ti pagimbagan nga adda kadagiti Judio? Ken ania ti pagsayaatan ti pannakakugit? ² Nasayaat daytoy iti amin a wagas. Umuna iti amin, naitalek kadagiti Judio ti paltiing manipud iti Dios. ³ Ta no ngay awanan pammati ti sumagmamano a Judio? Agbalin kadi nga awan kaes-eskanna ti kinapudno ti Dios gapu iti saanda a panamati? ⁴ Saan koma a pulos. Ngem ketdi, masarakan koma a napudno iti Dios, uray pay no ulbod ti tunggal tao. A kas iti naisurat, "Tapno maiparangka koma a nalinteg kadagiti sasaom, ken mangabakka koma inton umay ti panakaukommo." ⁵ Ngem no iparparang ti kinakillotayo ti kinalinteg iti Dios, ania ti makunatayo? Saan a killo ti Dios iti panangidisdissuorna ti pungtotna, saan kadi? (Agsasao-ak segun iti argumento ti tao.)v 6 Saan koma a pulos! Ta kasano ngarud nga ukomen ti Dios ti lubong? ⁷ Ngem no babaen iti kinaulbodko ti kinapudno ti Dios ket maad-adda pay iti gloriana, apay nga maukomak paylaeng a kas managbasol? ⁸ Apay a ditay ibaga, kas iti inuulbod a naipadamag, ken kas panpaneknekan iti sumagmamano nga ti ibagbagami, "Agaramidtayo iti dakes, tapno umay iti nasayaat"? Nalinteg ti pannakaukom kadakuada. ⁹ Ania ngarud? Ilaklaksidtayo kadi dagiti bagbagitayo? Saan a pulos. Ta pinabasoltayon dagiti Judio ken Griego, aminda, nga adda da iti basol. ¹⁰ Daytoy ket kas iti naisurat: "Awan ti nalinteg, awan uray maysa; ¹¹ awan iti makaaw-awat; awan iti mangbirbirok ti Dios. ¹² Timmallikudda amin; nagbalinda amin nga awan serserbina. Awan ti agar-aramid iti nasayaat, awan, awan uray maysa." ¹³ Silulukat a tanem dagiti karabukobda. Nangallilaw dagiti dildilada. Adda kadagiti bibigda ti gita dagiti uleg. ¹⁴ Napno iti panangilunlunod ken kinapait dagiti ngiwngiwatda. ¹⁵ Napardas a mangpadara dagiti saksakada. ¹⁶ Pannakadadael ken panagsagsagaba ti adda kadagiti daldalanda. ¹⁷ Saan a naammoan dagitoy a tattao iti dalan iti kappia. ¹⁸ Awan panagbuteng iti Dios kadagiti matada." ¹⁹ Ita, ammotayon nga aniaman nga ibagbaga ti linteg, ibagbagana daytoy kadagiti adda iti linteg, tapno ti tunggal ngiwat ket agulimek koma, ken ti amin a lubong ket sungsungbatanda iti pannusa ti Dios. ²⁰ Gapu ta awan lasag a mapalinteg iti imatangna babaen iti ar-aramid ti linteg. Ta babaen iti linteg umay ti pannakaammo iti basol. ²¹ Ngem ita malaksid iti linteg, naipakaammo ti kinalinteg ti Dios, napaneknekan daytoy iti linteg ken dagiti profeta— ²² ti kinalinteg iti Dios babaen iti pammati kenni Jesu-Kristo a maipaay kadagiti amin a mamati. Ta awan ti nagdudumaan, ²³ ta nagbasol ti amin ken nagkurang iti dayag iti Dios, ²⁴ ken siwawaya a napalintegda babaen iti paraburna gapo iti pannakasubbot nga adda kenni Kristo Jesus. ²⁵ Ta impaay iti Dios ni Kristo Jesus a kas pannakapakawan dagiti basbasol babaen iti pammati iti darana. Indatonna ni Kristo a kas pammaneknek iti kinalintegna, gapu ti panangilaksidna kadagiti napalabas a basbasol ²⁶ iti kinaanusna. Napasamak amin dagitoy tapno maipakita iti kinalintegna iti daytoy agdama a tiempo, tapno mapaneknekenna a nalinteg isuna ken tapno ipakitana a palintegenna ti siasinoman gapu iti pammati kenni Jesus. ²⁷ Sadino ngarud ti ayan iti panagpaspasindayag? Naikkaten daytoy. Iti ania a kita ti linteg? Kadagiti aramid? Saan, ngem gapu iti linteg ti pammati. ²⁸ Ibilangmi ngarud a napalinteg ti maysa a tao babaen iti pammati uray awan dagiti ar-aramid ti linteg. ²⁹ Wenno ti Dios laeng aya ti Dios dagiti Judio? Saan kadi met nga isuna ti Dios dagiti Hentil? Wen, kadagiti Hentil met. ³⁰ No pudno a maymaysa iti Dios, palintegenna ti pannakakugit babaen iti pammati, ken ti saan a pannakakugit babaen iti pammati. ³¹ Pagbalinentayo kadi nga awan serserbi ti linteg babaen iti pammati? Saan koma a pulos! Ngem ketdi, agtultulnogtayo iti linteg.