¹ Ngarud awan pagpambarmo, sika a tao, sika nga aguk-ukom, ta uk-ukomem ti bagim gapu iti panaguk-ukommo iti sabali. Ta sika a manguk-ukom ket ar-aramidem met laeng dagiti isu met laeng a banbanag. ² Ngem ammotayo a ti panangukom ti Dios ket segun iti kinapudno inton maidissuor dagitoy kadagiti agar-aramid iti kasta a banbanag. ³ Ngem ibilang mo daytoy, sika a tao, sika a manguk-ukom kadagiti agar-aramid iti kasta a banbanag no man pay ar-aramidem dagiti kastoy met laeng nga banbanag. Makalibaskanto kadi iti panangukom ti Dios? ⁴ Wenno tagtagibassitem kadi ti kinabaknang iti kinaimbagna, ti maitantantan a panangdusana, ken ti kinaanusna? Saanmo kadi nga ammo a naipakita ti kinaimbagna a mangidalan kenka iti panagbabawi? ⁵ Ngem agingga iti kinatangkenmo ken saan a managbabawi a puso ket agur-urnongka para ti bagim iti pungtot inton aldaw iti panagpupungtot, dayta ket, ti aldaw a panangipakaammo iti nalinteg a panangukom ti Dios. ⁶ Subadannanto ti tunggal tao iti isu met laeng a rukod dagiti ar-aramidna: ⁷ kadagiti maipapan iti panagibtor para iti nasayaat nga aramid a napadayawan, pannakaitan-ok, ken saan a pannakadadael, ikkannanto iti agnanayon a biag. ⁸ Ngem kadagiti bukbukodda laeng ti panpanunotenda, nga agsuksukir iti kinapudno ngem agtultulnog iti kinakillo, umayto ti pungtot ken nakaro nga unget. ⁹ Mangiyegto ti Dios iti nalabes a panagrigrigat ken riribuk iti tunggal kararua ti tao a nangaramid iti dakes, umuna kadagiti Judio, ken kasta met kadagiti Griego. ¹⁰ Ngem pammadayaw, pannakaitan-ok ken kappia ti umayto kadagiti amin nga agar-aramid iti naimbag, umuna kadagiti Judio, ken kasta met kadagiti Griego. ¹¹ Ta awan ti naidumduma iti Dios. ¹² Kas kaadu ti nagbasol nga awan iti linteg ket matayto met nga awan iti linteg, ken kas kaadu ti natay nga nangraem iti linteg ket maukom met babaen iti linteg. ¹³ Ta saan a dagiti dumdumngeg iti paglintegan iti nalinteg ti sangoanan ti Dios, ngem dagiti agar-aramid iti paglintegan ti mapalintegto. ¹⁴ Gapu ta dagiti Hentil, nga awan kadakuada ti linteg, ket gagangay nga ar-aramidenda dagiti banbanag ti linteg, isuda, ket lintegda kadagiti bagbagida, no man pay awan kadakuada ti linteg. ¹⁵ Babaen iti daytoy ket ipakpakitada a naisurat kadagiti pusoda dagiti ar-aramid a sapsapulen ti linteg. Ti konsensiada ti mangsaksi met kadakuada, ken akusaran wenno idepensa ida dagiti panpanunotda ¹⁶ iti aldaw inton ukomento ti Dios dagiti palimed dagiti amin a tattao, segun iti ebangheliok, babaen kenni Jesu- Kristo. ¹⁷ Ngem no kunam sika ket Judio ka ken agtaltalekka iti paglintegan ken agpanpannakel ka iti Dios, ¹⁸ ken ammom ti pagayatanna ken anamongam dagiti banbanag a naidumduma gapu ta nasuroanka babaen iti linteg; ¹⁹ ket no makumbinsi ka iti bagim a mangiturong iti bulsek, maysa a silaw kadagiti adda iti kinasipnget, ²⁰ mangngatur kadagiti maag, manursuro kadagiti ubbing, ken adda kenka iti linteg ti langa iti pannakaammo ken iti kinapudno, kasano ngarud daytoy nga apektaranna ti wagas iti panagbiag mo? ²¹ Sika ngarud a mangisursuro iti sabali, saanmo kadi a sursuroan ti bagim? Sika a mangikaskasaba a saan nga agtakaw, agtaktakawka kadi? ²² Sika a mangibagbaga a saan a makikamkamalala, makikamkamalalaka kadi? Sika a manggurgura kadagiti didiosen, taktakawam kadi dagiti templo? ²³ Sika nga agpanpanakkel iti linteg, ibabainmo kadi ti Dios babaen iti panaglabsingmo iti linteg? ²⁴ Ta "naibabain ti nagan ti Dios kadagiti Hentil gapu kadakayo," a kas naisurat. ²⁵ Ta pudno nga adda pagimbagan ti pannakakugit kenka no agtulnogka iti linteg, ngem no managlabsingka iti linteg, ti pannakakugitmo ket saan nga agbalin a pannakakugit. ²⁶ No tungtungpalen ngarud ti saan a nakugit a tao dagiti kasapulan ti linteg, saan kadi a maibilang a pannakakugit ti saanna a pannakakugit? ²⁷ Ken saannakanto kadi nga ukomen ti gagangay a saan a nakugit, no tungtungpalenna ti linteg? Daytoy ket gapu ta adda kenka dagiti naisurat nga linteg ken pannakakugit, ngem managlabsingka latta iti linteg! ²⁸ Ta saan a Judio isuna iti ruar a kinataona; wenno saan nga iti pannakakugitna iti akinruar a lasag. ²⁹ Ngem Judio isuna iti kaungganna, ken ti pannakakugit ket ayan dayta iti puso, iti espiritu, saan nga iti letra. Ti pammadayaw iti tao ket saan a naggapu iti tao ngem naggapu iti Dios.