¹ Ni Pablo, maysa nga adipen ni Jesu-Kristo, naayaban nga agbalin nga apostol ken nailasin para iti ebanghelio ti Dios, ² Daytoy ti ebanghelio nga inkarina sakbay iti amin babaen kadagiti profetana iti Nasantoan a Sursurat. ³ Maipapan daytoy iti Anakna a naipasngay manipud kadagiti henerasyon ni David segun iti lasag. ⁴ Babaen iti Espiritu ti kinasanto ket nabileg a naipakaammo nga isuna ti Anak ti Dios gapu iti panagungar manipud iti patay, ni Jesu- Kristo nga Apotayo. ⁵ Inawattayo ti parabur ken panagbalin nga apostol babaen kenkuana para iti panagtulnog iti pammati kadagiti amin a nasion, a maigapu iti naganna. ⁶ Kadagitoy nga nasion, naayabankayo met nga agbalin a kukua ni Jesu-Kristo. ⁷ Dagiti amin idiay Roma nga ay-ayaten ti Dios ken naayaban nga agbalin a nasantoan a tattao: Parabor koma ti adda kadakayo ken kappia manipud iti Dios nga Amatayo ken ni Apo Jesu-Kristo. ⁸ Umuna, agyamanak iti Diosko babaen kenni Jesu-Kristo gapu kadakayo amin, gapu ta naiwaragawag ti pammatiyo iti entero a lubong. ⁹ Ta ti Dios ti saksik, a pagserserbiak iti espirituk iti ebanghelio ti Anakna, no kasano nga itultuloyko nga dakdakamatenkayo. ¹⁰ Kankanayonko a kidkiddawen kadagiti kararagko a babaen iti aniaman a wagas ket agballigi-ak koman ita babaen iti pagayatan ti Dios nga umayak kadakayo. ¹¹ Gapu ta tartarigagayak a makitakayo, tapno mangitedak koma kadagiti naespirituan a sagut, tapno mapapigsakayo. ¹² Dayta ket, kalkalikagumak a makipinnabileg kadakayo, babaen iti pammati ti tunggal maysa, pammatiyo ken pammatik. ¹³ Ita, saanko a kayat a saanyo nga ammo, kakabsat, a masansan a pangpanggepek nga umay kadakayo (ngem malaplappedanak agingga ita), tapno met koma maaddaanak kadagiti bunga kadakayo, a kas kadagiti nabatbati nga Hentil. ¹⁴ Adda pagrebbengak kadagiti Griego ken kadagiti gangannaet, kadagiti masirib ken kadagiti maag. ¹⁵ Ngarud, no maipapan kaniak, nakasaganaak met a mangiwaragawag iti ebanghelio kadakayo nga adda dita Roma. ¹⁶ Gapu ta saanko nga ibain ti ebanghelio, agsipud ta daytoy ti pannakabalin ti Dios a maipaay iti pannakaisalakan iti amin nga mamati, umuna ket para kadagiti Judio ken kasta met kadagiti Griego. ¹⁷ Ta iti daytoy, naipakaammo ti kinalinteg ti Dios manipud pammati agingga iti pammati, a kas naisurat, "Agbiagto dagiti nalinteg babaen iti pammati." ¹⁸ Ta naipakaammo ti pungtot ti Dios manipud langit a maibusor kadagiti amin a saan a nadiosan ken kinakillo dagiti tattao babaen iti kinakillo nga igawidna ti kinapudno. ¹⁹ Daytoy ket gapu iti naammoan a maipanggep iti Dios. Ta linawlawagan ida ti Dios. ²⁰ Manipud pay idi naparsua daytoy a lubong, dagiti makita nga kababalinna, kas iti mataginayon a panakabalin ken kinadiosna, ket nalawag a makita, gapu ta mailasin kadagiti banbanag nga naaramid. Isunga awan pagpambarda. ²¹ Gapu iti daytoy, uray no ammoda ti Dios, saanda nga intan-ok isuna kas Dios, wenno saanda a nagyaman kenkuana. Ngem ketdi, nagbalinda a maag iti panpanunotda, ken ti pusoda nga awan marikna na ket simmipnget. ²² Ibagbagada a masiribda, ngem nagbalinda a maag. ²³ Insukatda ti dayag ti saan nga madadael a Dios iti kaas-asping iti langa iti madadael a tao, kadagiti billit, kadagiti uppat ti sakana nga ayup, ken kadagiti agkarkarayam a banbanag. ²⁴ Ngarud, binaybay-an ida ti Dios kadagiti pusoda nga aggartem iti kinarugit, para iti pakaibabainan dagiti bagbagida met laeng. ²⁵ Isuda dagiti nangisukat iti kinapudno ti Dios para iti inuulbod, ken nagdayaw ken nagserbi iti naparsua imbes nga iti Namarsua, nga agnanayon a maidaydayaw. Amen. ²⁶ Gapu iti daytoy, binaybay-an ida ti Dios kadagiti nakababain a kinaderrep, ta insukat dagiti babbaida ti gagangay a pakaaramatanda iti maibusor ti kinasiasinoda . ²⁷ Kasta met, pinanawan met dagiti lallaki ti gagangay a pakaaramatanda kadagiti babbai ket sinumgedda kadagiti kinaderrepda iti maysa ken maysa. Dagitoy dagiti lallaki a nangaramid iti saan nga umno kadagiti padada a lallaki ken nangawat ti rumbeng a dusa kadagiti pannakaiyaw-awanda. ²⁸ Gapu ta saanda nga immanamong iti pannakaadda ti Dios iti pannakaammoda, binaybay-anna ida iti dakes a panunot, tapno aramidenda dagitoy saan a maiparbeng. ²⁹ Napnoda kadagiti amin a kinakillo, kinadakes, kinaagum ken gura. Napnoanda iti kinaapal, kinamammapatay, kinamanagaapa, kinamanangallilaw, ken dakes a pangpanggep. ³⁰ Mannaritada, mammaperdi, ken managgura iti Dios, naranggasda, natangsit, ken napangas, isuda dagiti agar-aramid kadagiti dakes a banbanag; ken nasukirda kadagiti nagannakda. ³¹ Awan iti pannakaawatda, awanan pammati, awanan panagayat, ken saan a manangngaasi. ³² Maawatanda dagiti annuroten ti Dios, a maikari iti patay dagiti agar-aramid iti kasta a banbanag. Ngem saanda laeng nga ar-aramiden dagitoy a banbanag, anamonganda met dagiti dadduma nga agar-aramid kadagitoy.