¹ Guyugoyenkayo ngarud kakabsat, babaen iti asi ti Dios, nga idatagyo dagiti bagiyo a kas daton a sibibiag, nasantoan, ken makaay-ayo iti Dios. Daytoy ti rumbeng a panagserbiyo. ² Saankayo nga umanamong iti daytoy a lubong, ngem ipalubosyo a mabalbaliwankayo babaen iti pannakapabaro iti panunotyo. Aramidenyo daytoy tapno maammoanyo ti nasayaat, makaay-ayo ken naan-anay a pagayatan ti Dios. ³ Ta ibagak gapu iti parabor a naited kaniak a tunggal maysa kadakayo: Saanda koma a panunoten nga ad-adda a nangato ti bagbagida, ngem ketdi, agpanunotda koma iti nainsiriban a panangukom, segun iti panangrukod iti pammati nga inted ti Dios kadakayo. ⁴ Ta adu ti kamkamengtayo iti maysa a bagi, ngem saan nga amin a kamkameng ket agpapada ti pakaaramatanda. ⁵ Iti isu met laeng a wagas, datayo nga adu ket maysa a bagi kenni Kristo, ken saggaysa a kamkameng iti tunggal maysa. ⁶ Addaantayo kadagiti agduduma a sagsagut segun iti parabur a naited kadatayo. No panangipadto ti sagut ti maysa, maaramid koma daytoy segun iti rukod ti pammatina. ⁷ No panagserbi ti sagut ti maysa, bay-anyo nga agserbi isuna. No panangisuro ti sagut ti maysa, bay-anyo nga agisuro isuna. ⁸ No panangparegta ti sagut ti maysa, bay-anyo a mangparegta isuna. No pannangted ti sagut ti maysa, bay-anyo nga aramidenna a sibubuslon. No panangidaulo ti sagut ti maysa, maaramid koma nga addaan panagannad. No panangaasi ti sagut ti maysa, maaramid koma nga addaan ti kinaragsak. ⁹ Awan koma ti hipokrito nga ayat. Guraenyo ti dakes; agtalinaed kayo iti nasayaat. ¹⁰ No maipapan iti panagayat kadagiti kakabsat, naayatkayo koma iti tunggal maysa. No maipapan iti panangdayaw, raemenyo koma ti tunggal maysa. ¹¹ No maipapan iti kinagagaget, saankayo nga agduadua. No maipapan iti espiritu, nagagarkayo koma. No maipapan iti Apo, agserbikayo kenkuana. ¹² Agrag-okayo iti namnama, agibturkayo kadagiti pakariribukanyo, kankanayonkayo nga agkarkararag. ¹³ Makipagpasetkayo kadagiti kasapulan dagiti namati. Mangsapulkayo kadagiti adu a wagas a mangipakita iti panangsangaili. ¹⁴ Bendisionanyo dagiti mangidadanes kadakayo; mangbendisionkayo ken saankayo a mangilunod. ¹⁵ Makipagragsakkayo kadagiti agragragsak; makipagsangitkayo kadagiti agsangsangit. ¹⁶ Masapul nga agpapada ti kapanunotanyo iti tunggal maysa. Saankayo nga agpanunot iti napasindayag a wagas, ngem awatenyo dagiti napakumbaba a tattao. Saankayo a mammasirib kadagiti bukodyo a panpanunot. ¹⁷ Saanyo a bayadan iti dakes ti dakes. Agaramidkayo kadagiti naimbag a banbanag iti imatang ti amin a tattao. ¹⁸ No mabalin, agingga iti kabaelanyo, makikappiakayo iti amin a tattao. ¹⁹ Patpatgek, saanyo nga balesan dagiti bagbagiyo, ngem wayaanyo ti pungtot iti Dios. Ta naisurat, "Kukuak ti panangibales; sukatakto,' kuna ti Apo. ²⁰ Ngem "no mabisin ti kabusormo, pakanem. No mawaw isuna, ikkam ti inumenna. Ta no aramidem daytoy, agurnongkanto kadagiti beggang ti apuy iti ulona." ²¹ Saanka nga agpaabak iti dakes, ngem abakem ti dakes babaen iti nasayaat.