¹ Agtulnog koma ti tunggal kararua kadagiti nangatngato a turay, gapu ta awan iti turay malaksid no nagtaud iti Dios. Ken dagiti turay nga dinutokan iti Dios. ² Ngarud siasinoman a sumukir iti dayta a turay ket salsalungasingenna ti bilin iti Dios; ken dagiti mangsalungasing iti daytoy ket awatendanto ti pannakaukom kadagiti bagida. ³ Ta saan a pagbutngan kadagiti naimbag ti aramidna dagiti agtuturay, ngem dagiti dakes ti ar-aramidenda. Tartarigagayanyo kadi ti saan nga agbuteng iti turay? Aramidenyo iti nasayaat, ket dayawendakayonto gapu iti daytoy. ⁴ Gapu ta isuna ket adipen ti Dios kadakayo para iti pagsayaatan. Ngem no aramidenyo iti dakes, agbutengkayo; gapu ta saanna nga alaen ti kampilan nga awan iti makagapu. Gapu ta adipen ti Dios isuna, a mangibales iti pungtot kadagiti agar-aramid iti dakes. ⁵ Masapul nga agpaituraykayo ngarud, saan laeng a gapu iti pungtot, ngem gapu met koma iti konsensia. ⁶ Agbaybayadkayo met kadagiti buis gapu iti daytoy. Ta ad-adipen ti Dios dagiti mangiturturay, nga agtultuloy a mangar-aramid iti daytoy a banag. ⁷ Bayadanyo ti tunggal maysa ti rumbeng a bayadan kadakuada: buis para kadagiti rumbeng a pagbayadan ti buis, bayad para kadagiti rumbeng a pagbayadan ti bayad; pagbutngan ti rumbeng a pagbutngan; padayawan ti rumbeng a padayawan. ⁸ Awan koma ti pakautanganyo iti uray ania a banag, malaksid iti panagiinnayatyo. Gapu ta ti mangay-ayat iti kaarrubana ket natungpalna ti linteg. ⁹ Ta ti bilbilin, "Saanka a makikamalala, saanka a pumatay, saanka nga agtakaw, saanka nga umapal," ken no adda pay iti aniaman a bilin, naipamaymaysaen ti kastoy: "Ayatenyo ti kaarrubayo kas panagayatyo iti bagiyo." ¹⁰ Ti ayat ket saanna a dangran iti kaarubanna. Ngarud, ti ayat ti nakatungpalan ti linteg. ¹¹ Gapu iti daytoy, ammoyo ti tiempo, a tiempon ti panagriingyo iti pannaturog. Gapu ta as-asidegen ita ti pannakaisalakantayo ngem idi damo a namatitayo. ¹² Malmalpasen ti rabii, ket umas-asidegen ti aldaw. Saantayo ngaruden nga aramiden dagiti aramid ti kinasipnget, ken ikawestayo ti armas ti lawag. ¹³ Magnatayo iti umno a wagas, a kas iti aldaw, saan nga iti nalabes a panagramrambak wenno panagbarbartek; ken saantayo a magna iti naderrep wenno saan a matengngel a gartem, ken saan nga iti apa wenno imon. ¹⁴ Ngem ikawesyo ketdi ni Apo Jesu-Kristo, ken saanyo a pagustoan ti kasapulan iti lasag, a mangpennek kadagiti gartemna.