¹ Ibagak ngarud, linaksid kadi ti Dios dagiti tattaona? Saan. Gapu ta maysaak met nga Israelita, a kaputotan ni Abraham, iti tribu ni Benhamin. ² Saan a linaksid ti Dios dagiti tattaona, nga am-ammona idi pay laeng. Saanyo kadi nga ammo iti kinuna iti Nasantoan a Surat maipanggep kenni Elias, no kasano ti panagpakpakaasina iti Dios a maibusor iti Israel? ³ "Apo, pinatayda dagiti profetam, dinadaelda dagiti altar mo. Sisiak laeng ti nabati, ket sapsapulenda ti biagko." ⁴ Ngem ania ti kuna iti sungbat ti Dios kenkuana? "Nagilasinak para iti bagik iti pito a ribo a lallaki a saan a nagparintumeng kenni Baal." ⁵ Uray pay no kasta, iti daytoy met nga agdama a tiempo, adda ti nabati gapu iti panangpili ti parabur. ⁶ Ngem no babaen iti parabur, saanen a babaen iti ar-aramid. ⁷ Ta no saan, pulos a saanen a parabur ti parabur. Ania ngarud? Ti banag a birbiruken ti Israel, saanna a nagun-od, ngem nagun-od daytoy dagiti napili, ken ti dadduma ket napatangkenen. ⁸ Daytoy ket kas iti naisurat: "Inikkan ida ti Dios ti espiritu ti kinakuneng, matmata tapno saanda a makakita, ken laplapayag tapno saanda a makangngeg, agingga iti daytoy nga aldaw." ⁹ Ken kinuna ni David, "Adda koma maaramid nga iket iti lamisaanda, palab-og, pakaitibkolan, ken panangbales kadakuada. ¹⁰ Sumipnget koma dagiti matada tapno saanda a makakita. Kankanayonna ida a pagkubboen iti Dios." ¹¹ Ibagak ngarud, "Naitibkolda kadi tapno matnagda?" Saan. Ngem ketdi, gapu iti nagkuranganda, immay iti pannakaisalakan kadagiti Hentil, tapno paapalen ida. ¹² Ita, no ti nagkuranganda ket dagiti kinabaknang ti lubong, ken no ti pukawda ket isu iti kinabaknang dagiti Hentil, dinto aya dakdakkel ti pannakaan-anayda? ¹³ Ket agsasaoak ita kadakayo a Hentil, yantangay ta apostolak kadagiti Hentil, ipagpannakkelko ti ministeryok. ¹⁴ Nalabit a mapaapalko dagiti naggapu iti lasagko. Nalabit a maisalakantayo dagiti dadduma kadakuada. ¹⁵ Ta no ti pannakailaksid dagitoy ket ti panagkakappia ti lubong, anianto ti pannakaawatda no di ket biag manipud iti patay? ¹⁶ No nailasin dagiti umuna a bunga, kasta met ti masa a maaramid iti tinapay. No nasantuan ti ramut, kasta met dagiti sanga. ¹⁷ Ngem no natukkol dagiti dadduma a sanga, no sika, nga atap a sanga ti olibo, ket naisilpo kadakuada, ken no nakibingayka kadakuada iti nabaknang a ramut iti puon ti olibo, ¹⁸ saanka nga agpasindayag kadagiti sanga. Ngem no agpasindayagka, saan a sika iti mangtultulong iti ramut, ngem ti ramut ti mangtultulong kenka. ¹⁹ Ket ibagamto ngarud, "Natukkol dagiti sanga tapno maisilpoak." ²⁰ Pudno dayta. Natukkolda gapu iti saanda a panamati, ngem sititibkerkayo a nakatakder gapu iti pammatiyo. Saanyo a panunoten a nangato unay ta bagiyo, ngem agbutengkayo. ²¹ Ta no saan nga inispal ti Dios dagiti gagangay a sanga, saannakayo met nga ispalen. ²² Kitaenyo ngarud, dagiti naimbag a tignay ken ti panangibtor ti Dios: immay ti panangibtor kadagiti Judio a natinnag, ngem immay iti kinaimbag ti Dios kadakayo, no agtultuloykayo iti kinaimbagna. No saan, maputedkayonto met. ²³ Ken kasta met, no saanda nga agtultuloy iti saanda a panamati, maisilpodanto manen. Ta kabaelan ti Dios nga isilpo manen ida. ²⁴ Ta no naputedkayo manipud iti naggapuanyo a puon ti atap nga olibo, ken iti sabali a bangir ti gagangay nga napintas a puon ti olibo, saan kadi nga ad-adda pay kadagitoy a Judio, nga isuda dagiti pudno a sangsanga, a maisilpoda manen iti bukodda a puon ti olibo? ²⁵ Ta saanko kayat a saanyo a maammoan, kakabsat, iti daytoy a palimed, tapno saankayo nga agbalin a nasirib iti bukodyo a panagpanpanunot. Daytoy a palimed ket adda napasamak a sangkapaset a pannakapatangken iti Israel agingga a dumteng ti pannakaan-anay dagiti Hentil. ²⁶ Maisalakanto ngarud amin nga Israel, kas iti naisurat: "Umayto manipud ti Sion ti Mangisalakan. Ikkatennanto iti kinadakes manipud kenni Jacob, ²⁷ ken daytoyto ti tulagko kadakuada, inton ikkatek dagiti basbasolda." ²⁸ No maipapan iti ebanghelio, nagbalinda a kalaban gapu kadakayo. Iti sabali met a bangir segun iti panangpili ti Dios, naay-ayatda gapu kadagiti kapuonan. ²⁹ Ta saan a mabaliwan dagiti sagut ken ayab ti Dios. ³⁰ Ta sigud a nasukirkayo iti Dios, ngem ita naawatyo ti asi gapu iti saanda a panagtulnog. ³¹ Kasta met nga ita, nagbalin a nasukir dagitoy a Judio. Ti nagbanaganna dayta ket babaen ti asi a naipakita kadakayo ket umawatda met ita iti asi. ³² Ta pinagtalinaed ida ti Dios iti kinasukir tapno maipakitana ti asina iti amin. ³³ Anian iti kinauneg dagiti kinabaknang ti sirib ken kinalaing ti Dios! Anian a saan a mabirukan dagiti panangukomna, ken saan a matakwatan dagiti wagasna! ³⁴ "Ta siasino ti nakaammo iti panunot ti Dios wenno siasino ti nagbalin a manangbalakadna? ³⁵ Wenno siasino ti immuna a nangted iti uray ania a banag iti Dios, tapno masubadan daytoy kenkuana?" ³⁶ Ta manipud kenkuana, ken babaen kenkuana, ken kenkuana ti amin a banbanag. Kenkuana ti dayaw iti agnanayon. Amen.