¹ Kakabsat, ti tarigagay iti pusok ken kiddaw ko ti Dios para kadakuada, ti pannakaisalakanda. ² Ta agsaksiak maipanggep kadakuada nga addaanda iti regta para ti Dios, ngem saan a maitunos iti pannakaammo. ³ Maigapu ta saanda nga ammo ti kinalinteg nga aggapu iti Dios, ken pinadasda nga ipasdek ti bukodda a kinalinteg, saanda a nagpaituray iti kinalinteg ti Dios. ⁴ Gapu ta ni Kristo iti nakatungpalan iti linteg para kadagiti amin a mamati. ⁵ Gapu ta insurat ni Moises ti maipanggep iti kinalinteg nga agtaud iti linteg: "Agbiag ti tao nga agar-aramid kadagitoy a banbanag." ⁶ Ngem ibagbaga daytoy ti kinalinteg a nagtaud iti pammati: "Saanyo nga ibaga dita pusoyo, 'Siasino iti umuli idiay langit?' (dayta ket, panagbaba ni Kristo iti daga); ⁷ ken saanyo nga ibaga 'Siasino iti bumaba sadiay yuyeng?" (dayta ket, panangiyuli kenni Kristo manipud ken patay.) ⁸ Ngem ania iti ibagbagana? "Asideg ti sao kadakayo, iti ngiwatyo ken iti pusoyo." Dayta ti sao ti pammati, nga iwarwaragawagmi. ⁹ Gapu ta no bigbigenyo kadagiti ngiwatyo ni Jesus a kas Apo, ken mamatikayo iti pusoyo a pinagungar isuna ti Dios manipud iti patay, maisalakankayonto. ¹⁰ Ta gapu iti puso a mamati ti tao iti kinalinteg, ken bigbigbigenna ti pannakaisalakan babaen iti ngiwat. ¹¹ Ta ibagbaga ti Nasantoan a Surat, "Saan a maibabain ti amin a mamati kenkuana." ¹² Ta awan iti nagdumaan iti Judio ken Griego. Ti Apo met laeng ti Apo iti isu-amin, ken parang-ayenna iti amin nga umaw-awag kenkuana. ¹³ Ta maisalakan amin nga umawag iti nagan ti Apo. ¹⁴ Kasano ngarud nga umawagda kenkuana iti saanda a pinati? Ken kasanoda a mamati kenkuana a saanda pay a nangngegan? Ken kasanoda a makangngeg no awan iti mangasaba? ¹⁵ Ken kasanoda a mangasaba, malaksid no naibaonda? —Kas iti naisurat, "Anian a nagpintas dagiti saksaka dagiti mangiwaragawag iti naimbag a banbanag!" ¹⁶ Ngem saanda amin a dimngeg iti ebanghelio. Gapu ta kinuna ni Isaias, "Apo, siasino ti namati iti mensahemi?" ¹⁷ Ngarud, agtaud ti pammati manipud iti panagdengdengngeg, ken panagdengdengngeg iti sasao ni Kristo. ¹⁸ Ngem kinunak, "Dida kadi nangngeg?" Wen, ken awan duadua. "Naiwaras ti timekda iti sangalubongan, ken dagiti sasaoda kadagiti pagpatinggaan ti lubong." ¹⁹ Maysa pay, Ibagak, "Saankadi a naammoan ti Israel?" Umuna, ibagbaga ni Moises, "Paapalenkayo babaen iti maysa a saan a nasion. Babaen iti nasion nga awan pannakaawatna, pagpungtutenkayo." ²⁰ Ken natured ni Isaias a nagkuna, "Nasarakandak dagiti saan a nangbiruk kaniak. Nagparangak kadagiti saan a nangdawat kaniak." ²¹ Ngem iti Israel kunana, "Iti agmalem, inyunnatko dagiti imak kadagiti saan a natulnog ken kadagiti nasukir a tattao."