YESUS PILATUS O SEAR MI 1 Mang lalami, name mate, tumo' bar, torat o omhul nun, om'ra aeru, mede soldaij sipi barpi taunung sara gahain. horo hee sipi Yesus apec, ara sam Pilatus O sear mi. 2 Horo, Pilatus Atan, "Ari horo Yahudi hinung o Afen ho? Horo, Ai o'bor, "ari so na ubang eh." 3 Mang horo hee, mate nun, om'ra aernu, Yesus o ahal bit ta'foi foi. 4 Horo, Pilatus foil atan, "Nabai e fe a e'bor nene? edun, sipi o'hal lap mang tofang bi puin Aratoh Oselap." 5 Honin sobo, Yesus e'bor nene horo ei fe Pilatus di saher. YESUS MED BARABAS 6 Haer mate Paskah araham, Pilatus o asala panen serang bar ei lol, name sapiri mi ho nu ano' il. 7 Ai nu ani Barabas sapiri mi name riing nun ho ara asel sipi name amine, na asain karang ohaer nu mi. 8 Name tofang ho' Pilatus abang, honin e sa so asala foil panen sipi araham. 9 Horo, Pilatus sipi ara mateng ubang ho, "I inung em haai, na Yahudi o afen hoo ro ano' il ie reeng?" 10 Asel sa ahol tumo' om'ra nun Yesus ara ho o searmi asel sipi om ataain. 11 Honin sobo, mate nun, om'ra aernu ho serang om med honin sipi Pilatus abang, Barabas fe ano' il. 12 Horo hee, Pilatus foil serang nun atan, "Naba honin horo na uil panen ai ba i ubang Yahudi o afen hoo araham?" 13 Horo hee, sipi mang beat, "A'ri hel haleng!" 14 Horo hee, Pilatus sipi ara mateng, "Taroni fe? nasah otaroro Sa panen am?" Sobo, sipi mang beat biing-biing ta, "A'ri hel haleng!" 15 Asel name tofang om anono' Pilatus Barabas fe ad ano' il sipi ereeng, horo Yesus ho heifi' puin par no' med sipi en arasam hel haleng. YESUS ELELE' MED ARIASARA 16 No' horo hee, soldaij nun Yesus ara sam afenbang, ong Hu'botang dasing ap obang mi, soldaij nun solofe taunung. 17 Horo, sipi Nofang duilou med en mang, no' hee sipi hide mang nu di hanang med Yesus en putang. 18 No' horo hee, sipi aba-aba u ada'hol ubang ho, "Adamahen, Name Yahudi o afen!" 19 Horo hee, sipi ul bo' nu puin Elafung mi beh, malei o pahur, E'fa fan. 20 Sipi Yesus elele' no horo hee, Nofan duilou ho hing, ofen fede' foil en mang. horo sipi arahel luling mi arasam hel haleng. YESUS HELTI TAHIL 21 Horo hee, sipi name selol amumuin taten-ten Kirine hinung ani Simon hodi mong so lelang mi ho' Alexander Rufus omang, ahou helti ho tefang. 22 Horo hee, sipi arasam eleme nu ani Golgota mi, olel he bite "lafung tarop eleme" 23 sipi araka mur sei gau med en, sobo sa e med nene. 24 Horo, sipi hel haleng, no' hee, Sipi ofen med sedalam, o kara feu ano so fen o taroni' ho med sarian. 25 Sel ho'raham, od tou hee, sipi hel haleng. 26 Horo hee, sipi nahul puin o'hal lap o pa' ho, "Yahudi Hinung o afen" 27 horo hee, sipi name tau alo di hel ara haleng, name tau nu tani 'lol e name tau nu ho fiing 'lol. 28 Honin fe, Sura' bolang ho ano' an. ba ubang bite, "Sari ai ho name taudur ara taan." 29 Horo hee, name selol eh ho eng el, sipi safel feu ubang ho, "Hoi! ari horo Lahtal obang ho ari'bahite, bo tareng tou le hee a aten pir faleng, 30 Adai obobom ano' il, e helti ho ta hel. 31 Name mate, om'ra aernu di Yesus eng el, u sara hu'tang bite, "Sa name beng ho ano' il no' hoe, sobobom sano' il sah! 32 Se honi sa Mesias ba Israel o afen ho helti ta hel honin e pi o tino' bit." Name tau alo ba Yesus alol hel haleng hodi ebit eng el. YESUS O MIN 33 Ho'raham ho, od o mitalang mi pali'mate pana sam od o mi tieinu mi. 34 Mang od o tieinu ho mi hee, Yesus lofe biing-biing "Eloi, Eloi, Lama sabakhtani." o lel hee, "No Lahtal, No Lahtal minaba ei fe a nari feu? 35 Mang maeh horo hee, Name oinu homi tufeh ho sara hu'tang bite, "Edun, Sa Elia o lofe eh," 36 Horo, ai nu teeng li bung med araka aruhuin mi bal, ul bo' nu mi te' atel med Yesus en ahou na, sa ubang ho, "Sei honi pi mang edun ahal Elia ho' sona arahel." 37 Horo hee, Yesus aheu mate-mate horo hee aeng muij. 38 Mang horo hee, Nofang mate ba ara tong Lahtal obang palol mi ho peh talaang o alo, tong lafining homi sam pong lama ho lehel. 39 So horo hee, Soldaij nun ho o lafung, fa Yesus ahoi ho mitoh Yesus O aeng ta'hol ho, ubang bite, "Atino' Ai ho Lahtal ai" 40 Ho araham ho, ob bar oinu, ara homi, let-let dun ho eh, sipi ho, Maria Makdalena, Maria Yakobus afor Ofo, Yoses med Salome. 41 Ho araham Yesus mong Galilea mi, sipi atain, u baleta. hemo mi ho ob bar beng tofang ho Yesus ara sam Yerusalem. YESUS APOT 42 Sari ho'raham dilpana am, asel haer sadia tining rameng fa haer Sabat ho lefa, 43 Yusuf Arimatea ho, sari name mate, name u ada'hol, bo sari di Lahtal o bang bolang oho' oma ho adanang eh, Som ano' dume sam Pilatus Abung, Yesus o bein ho bang. 44 Pilatus so mi siud asel Yesus o min ho maeh. Horo hee, sa soldaij nun o lafung olofe atan, "Atino' Yesus ho so min am?" 45 Pilatus mang soldaij nun o lafung abung maeh, horo he sa Bein ho med Yusuf en. 46 Horo, Yusuf sabo afel fel, Yesus o bein ho arahel sabo afel ho puin baloi, med derelafo ba foi doe fe aping ho om mi atarang. horo sa foi mate aol ma derelafo sear ho atelang. 47 Maria Magdalena, med Maria Yoses ofo, sipi Yesus eleme mi atarang ho ahol.