¹ Paulu pia inén memblu di konxê diné zudê só ê flá: "Iné manu ê, hun tá ka vivê ni wê di Desú ku kunxensa pulu antê ôzé". ² Sósó sumu sasedotxi Anania flá dá inén ungê ku tava pétu di Paulu pá inén pô fliê ni bóka. ³ Anton Paulu flá: "Deus ká bá fili bô, palêdê ku sá blanku! Bô sá nai pá pô zugamu kumá a ka mandá ni alê, maxi bô mé ká mandá pá a fili mú kua ku sá kontla alê?" ⁴ Inén ungê ku tavá nálá flá: Kumá bô ká flá mali axém ku sumu sasedotxi Desú?" ⁵ Paulu flá: " Ami ná tavá sêbê, inén manu, ku ê sá sumu sasedotxi fá. Pundá sá sklitu: Na flá mali di uwã atolidadji di pôvô bô fá". ⁶ Ola Paulu pia ku patxi di iné konxê sá di iné sadusê ôtlô patxi sá di inén falizê, ê lantá vóji dê só ê flá: "Inén manu ê ami sá uwã falizê, miná di falizê. Sósó nansê tá ká zugá mu pundá hun ixká gwadá lesuléson di motxí." ⁷ Olá ê flá kua sê, ê sluji nômê diné faslizê uwã diskuson ku inén sadusê, sósó sembléia sé dividi. ⁸ Pundá iné sadusê ná ká kê ni lêsulêson fá, nê anzú Desú, nê suplitu, andékimé iné falizê ká kê ni tudu kua sê. ⁹ Axém ê dá uwã konvuzon, sósó iné Iskliba ku ká pêtensê patxidú diné falizê, lantá pá iné pô tomé paxti, só inê fla: "Non ná bê niuwã mali ni ômé sé. Kêngê só sê xí ê ná sá suplitú ô anzú Dêsu ku flá kuê"? ¹⁰ Sósó kwa tava kuwã konfuzon, ku komandantxi tavá ku memdú pundá ê ká posá ku iné ungê sê ká pô matá Paulu. Sósó ê mandá iné sôdé txilá Paulu ku fosá ni ômé di konxê sê pá iné bé kuê bá fotaleza. ¹¹ Ni ôtlô notxi, Sun tavá opé Paulu só Ê fla: "Selá bô sê fotxi, ná disanimá fá, Axém kumá bô fô testemunha mu ni Jiluzalen, axém tembêtê, bô ká bá Loma bá testemunha Ji mú nálá. ¹² Olá ê mansê, uwã uwã Zudê zulá, ku ká kê kwa mali ni Úbuê diné xi inén ná matá Paulu fá, iné ná ká kumé nê bêbê anté fé kwa sé. ¹³ Iné sá maxi di kwalentá ku fé zulamentú sé. ¹⁴ Inén fô bá inén sasedotxi ku inén ansion, só iné flá: 'Mali ká bi ni libá nón, nón ná ká kumé nê bêbê anté ku nón ká matá Paulu. ¹⁵ Sósó, nón ká piji pá nansê flá Komandatxi zuntu ku iné konxê pa iné pô bi ku Paulu, pá non pô fé modá non ká investigé, sósó axém no ká pô matê." ¹⁶ Maxi Paulu tavá ku uwã sublinhu dê, ku tava ká têndê tudu kwá ku inén tavá lúmá pá inén matá Paulu, só ê letlá ni fotalezá bá visá Paulu. ¹⁷ Sósó Paulu samá uwã sôdé di plison só ê flá: "Bé ku mósú sê dá komandatxi, pudá ê tê uwã kua pê pô flá ê" ¹⁸ Sósó, sôdé sé tomá mósú sê bé kuê bá komandantxi só ê flá: "Paulu, ku sá plison, ê samamú pan pô bi ku Mósú sé bi flá ku bô. Pundá ê tê uwã kua pá fadá bô". ¹⁹ Komandatxi pégê ni môn bé kuê niuwã lugê plivadú só ê punté: "Kêkwá ku bô mêsê fadá mú"? ²⁰ Só mósú flá: Iné zudê, ixká kombiná pá iné pô bí piji bô pá bô bé ku Pualu amanhã, ni konxê pá fé dikontá ku iné ixká intelogé, ²¹ Maxi bô ná ká têndê inén fá, pundá inén tê maxi di kwalentá ômé ku sá plepaladú pa iné pô pô matá Paulu, pundá iné fé uwã zulamentú, ku mali ká kê libá diné, só iné ná ká kumé nê bêbê anté inén pô maté. Miôlá uô iné sá plôntu, ixká kwadá ku bô ká têndê pijidú diné. ²² Anton komandantxi, désá mósú bê dê, maxi ê fádé: "Ná flá niuwã ungê ku bô flá kua sé damú". ²³ Só komandantxi sámá dôsú sôdé só ê flá: "Désá plépaladú, giná vintxi ólá ku sá notxi, uwã duzentú sôdé di kuaté, duzentú ku ká ndá kaválú, ku ôtlô duzentú ku ká lansá fléxa, pá iné pô bé bá Sesáleia". ²⁴ Ê tembêtê fá pá iné pô plontá kalú pá bê ku Paulu pê põ viajá pá ê pô bé ku ségulansá antê govenadô Félix. ²⁵ Axém ê fé uwã katá: ²⁶ "Kláudiu Lísia dá Selentisimú govenadô Félix! ²⁷ Ômé sé fô plésú pundá iné zudê, ê tavá pétú di môlê ni môn diné, sósó olá hun têndê kua sé hun bi ku sôdé kun tava kuê pán pô livlé, pundá hun fiká sêbidú ku ê sá sidadon Lomanu. ²⁸ Hun tavá mêsê sêbê pundá kê kwa ku ê tavá ká sê akusadú, só hun bé kuê dá inén konxé diné. ²⁹ Sósó hun fiká sêbidu ku ê tavá ká sê akusadú ni kua ku ká toká alê diné mé, maxi ni akusason sé ná bê nadaxi ku ká kondéné dá motxi nê plison. ³⁰ Tembêtê hun fika sêbidu ku iné tavá ká kôlô môdú di máté. Axém hun mandá iné sôdé bé kuê dá bô, hun tembêtê flá ku iné ungê ku ixká kusé pa iné pô bá wê bô mostlá akusason ku inén ixká fé. Mantxán." ³¹ Anton iné sôdé fé kua ki komandatxi flá: inén pegá Paulu, fô bé kuê olá tavá notxi dá Antipátlidi. ³² Djá xiguintxi, inén sôdé ku ká ndá ni kavalú bé ku Paulu, s´´osó iné ôtlô sôdé bilá bá tlaxi bá fotalezá. ³³ Olá inen sôdé ku ixká ndá ni kavalú xigá Sesaleia, inén tlégá katá dá govenandô, só inén plesentá Paulu dé. ³⁴ Olá kovenadô tává ká lê katá sé, ê puntá di kwali distlitú Paulu sá jidê. Olá ê têndê kuê sá di Silisia, ³⁵ ê flá: " hun ka têndê bô olá iné ungê ku ixká kusá bô bi nai". Anton ê madá pê Paulu ni palaxu di Helodis.