¹ " Inén ku inén Pé, têndê lazon mun, ku hun mêsê flá dá nansê".

² Olá multidon têndê Paulu ká flá ku Iné ni Lunguá Heblaika, inén ka bôká tudaxi. só ê flá: ³ Hun sá zudê, ku nasê ni télá di Tasú di Silisia, maxi hun fô edukadú ni poson sé ni mon di Gamalieli, Hun fô xtluidu kumá a ká mandá ni alê di iné ungê non pasadú. Hun sá zelosu di Desu, axém kuma nansê sá. ⁴ hun plixigui iné ungê di camiã sé pá pô matá inén; hun plêndê inén, ômé ku muwala, hun bé ku inén bá plison. ⁵ Sumu sasedotxi ku iné ansion, tembêtê pô flá dá nansê pundá hun lêsêbê kata ni mon pá hun pô bê kuê dá iné manu di Damasku. Sá pá hun pô bi ku inén unguê di caminhu sé plêsu ni kolentê bá Jiluzalen, pá inén sê kastigadú. ⁶ Ê kontesê olá hun tava ká viaja, olá hun xika petú Damasku, olá tava meiu djá, sósó uwã kandjá fotxi d'ôsé, tava ká luji ni bôdô mú. ⁷ Hun kê ni són, sósó hun tendê uwa vós ku tava ká flá ku ami:'Saulu, Saulu, Pundá kê kua bô ixká plixigui mú?' ⁸ Só hun kuji: 'Kenguê sá Sun, Sumuê?' Só Ê flá: 'Hun sá Jizú di Nazalé, ku bô ixká plixigui.' ⁹ Inén tudaxi ku tavá ku ami, bê kandjá sé, maxi inén ná tava têndê vós sé ku tavá ká fla ku ami. ¹⁰ Sósó hun flá: Kekua hun ká pô fé Sumú ê?' Sósó Sun flá mú: 'Lantá fôbá Damasku; nálá a ká bá flá bô kua ku bô tê ku fé. ¹¹ Ami ná pôji pia pindá luji di kandjá sé, anton hun bá fô Damasku, di mon dadu ku iné unguê ku tava ku ami. ¹² Olá hun xigá nálá hun kontla uwã ômé ku ká sama Nania, sungê ku sá devotó dá alê ku testemunhu buadú di tudu Zudê ku ká vivê nálá. ¹³ Ê bi ni ópé mú. fiká ni uwê mu, só ê flá: 'manú Saulu, bilá piá'. miôlá sé mé hun tavá ká pia. ¹⁴ Sósó ê flá: 'Desú di iné ungê non tempu koiê bô pá bô pô konê Vonté Sun, pá bô pia Zuxtu, pá bô pô têndê voji ku ixká bi ni bóka dê Mé. ¹⁵ Pundá bô ka bilá testemuniã Dê dá tudu ômé, di tudu kua ku bô ixká têndê ku bô ixká pia. ¹⁶ Miôlá uô kekua bô ixká kwadá? Lantá, fô batizadú lavá pekadú bô, ni nomi Dê. ¹⁷ Olá hun bi di Jeluzalen, olá hun tavá ká fé olason ni templu, hun tava ku uwã vison. ¹⁸ Hun têndê Sun flá ku ami: 'Fé sédú xé ni Jeluzalen, pundá nainhen a na ka kêlê ni testemunhu Mu ku bô ká flá dá inén fá', ¹⁹ Hun kuji: 'Sumuê, iné sêbê kuma ami plêndê dá sotxi ni tudu iné ku tavá ni sinagoga ku kêlê ni Sun. ²⁰ Olá sangi di Isteva, testemuniã Bô, fô blokadú, ami tembêtê tavá nálá, hun konxintxi hun gwadá lôpá diné ungê ku tava ka maté'. ²¹ Sósó; Ê flá mu: 'Bê, pundá hun ixká bê ku bô bá lonji fô bá iné pôvô ku ná sá Zudê fá, (ku a ka sama Gentiu") ²² Iné ungê désé flá anté momentu sé, sósó iné glita ká flá: "Sun sé na ká pô vivê ni télá sé fá, Maté butá" ²³ Olá iné tava ká klitá iné txilá lôpá lantá puelá fô ôsé, ²⁴ Sósó xefé di inén gwadá mandá pá pê bé ku Paulu bá fotaleza, pá ê pô sê intelogadu ku sotxi ni ubuê, punda xefi mê sêbê pundá kekwa, pôvô tavá glitá kuê di modú sé. ²⁵ Olá inén sôdé plêndê Paulu ni tlônkô, Paulu flá Sôdé ku tava nálá: "Bô tê diletú di damú sotxi sabêdô kun sá sidandon Lomanu, ami ná sá kondenadu fá?" ²⁶ Olá sôdê têndê kua sé ê bá kapiton xefi só ê fadé: "Kukwa bô ixká fé? Ômé sé ku sá nai sá sidadon Lomanu". ²⁷ Sósó kapíton xefi bi só ê fadé: "Fadámú, bô sá védé mé sidadon Lomanu?" Só Paulu kuji ê: "Hun sá!" ²⁸ Sósó kapiton xefi flá: "Hun tê sidadania Lomana pundá hun pagá yô jêlú", Só Paulu fádé han: "Ami nasê sidadon Lomanu". ²⁹ Anton, iné Ômé ku tavá ká intelogé, miôlá sé iné désé. kapiton tava ku mendú, olá ê sêbê ku Paulu sá sidadon Lomanu, andejimé ku ê malé ³⁰ Ni ôtlô djá, Kapiton tavá mêsê sêbê pundá kekwa inén Zudê lantá kusason kontla Paulu. Anton, txilá Paulu ni malason kuê tavá nê, só ê fla para iné plinsipali di inén sasedotxi ku tudu konxé diné zudê fô zuntá. Axém ê bi ku Paulu, ni wê diné.