¹ xinko dja vala, sumu sacedotxi Nania, ku uwã dosú plesbitelu ku uwã adivogadú samadú Tértulú bé antê Sezareia. Iné ômé sé bé ku akuzason kontla Paulu da govenadô. ² Olá Paulu tava ni wê govenadô, Tértulú ê komesá ká pontá dédú ka flá: "Govenadó, punda sun mé non ná tê meme paji, plomê sun kua novu ixka bi dá nanson sé; ³ Axém, Desú ká paga sun da tudu kua ku sun fé, ó eselentisimu Félix. ⁴ yôlá, pá ná pô tomá tempu sun, hun ixka piji sun, pá sun tendê mum ku paxensa. ⁵ Punda non pia sê ômé sé uwã plesti ku ka fé tudo pôvô non lebelá. ⁶ Ê sá uwã lidé di sêtá sé di nazalé, ê témbété tava kêlê plofaná templu, anton non plendê ê. ⁷ olá bô ka punta Paulu tudu kua sé ku non ixká fla, bô ká bá fika sêbidu ku tudu kua ku non ixká pontá dédú dé sá védé". ⁸ Iné Judeú témbété zuntá pá kuzá Paulu, ⁹ iné fadãn kuma iné kua sé kua axká kuzá sá védé. ¹⁰ Andejémé olá govenadó, faá Paulu pê pô flá, ê fla: "Ami sá sebidu ku bô sá Zuji di nanson sê, sósó ami gôgô lumadu pá hun pô flá dá sun. ¹¹ Sun pôji pia ku, ná ká fé maxi ku dózé djá ku súbli pá pô adolá ni Jiruzalém; ¹² olá iné pia mú ni témplú, ami ná fé konfuson ku ni uwã ngê, nê témbété hun flá pôvô pá non fé. nê ni sinagoga nê ni póson; ¹³ iné ná ká pô plová iné kua ku iné ixka kuzá mu ni wê sun fá ¹⁴ Maxi hun ká kunxinti ni wê sun, kuma camiã sé ku iné ixka samá setá, ni camiã sé só kun ixká stlivi Desú, di iné pé non ku môlê. hun sá zuxtu ku tudo plêsêtu ku sá ni alé, ku sá ni ixklitú diné plofetá. ¹⁵ Spelansá mu ni Desú ná muda fá, axén ku iné mansé sê ixká kwadá lesuleson diné motxi, diné zudê ku iné inzuxtu, ¹⁶ ni kuasé hun ixká góló undá ku wã kunxensá limpu ni wê di Desú ni wê diné ômé tudaxi. ¹⁷ olá Yô danú pasa hun bi zudá nason mú hun bi ku jêlú. ¹⁸ Olá hun fê kua sê, uwã Zudê ká sá ni Ázia kontlamu ni serimônia di purifikason di templú, iné ná bê mu ku yô multidon ixká fê tumultu fá. ¹⁹ Iné ômé sê kun ixká flá toká sá ni wê sumú miôlá uô, pá iné pô fla kwa ku iné tê kontlá ami, xi iné té kwa mé ²⁰ Anton, kwa ku toká iné ômé sé sá iné bi nai flá kua ku iné bê di mali námi, olá hun tavá ni wê diné konxê diné Zudê. ²¹ A ká pô sá ku sá kua sé kun flá olá hun tavá ni wê diné; 'Plóvia lesuleson di iné ungê ku sá molidú ku sá zulgadú ôzé ni món nansê". ²² Felix, tavá sêbidú di caminhu sé, sósó ê ná dá sentensá di Paulu fá. ^DE fla: "olá komandati Lisias ká xiká di Jeluzalem hun gá bá disidi kasu bô". ²³ Anton ê fla iné sódé pê pô plendê Paulu, maxi ná dê pankadá fá, nê fé ku iné migu dê ná ká pô bi pié ô zudé. ²⁴ Djá Pasá, Felix bi ku mualá dê, ku sá zudia, só ê mandá bi ku Paulu, só ê tava ka tendê dá afé ni Klixtu Jizú. ²⁵ Olá Paulu tava ká konvensé Felix di Zuxtisa, dominiu di vida, zugamentu de Desú ku ixká bi, Felix fika ku mendú só ê flá: "Miôlá uô, bô pô bé, Ola hun ka tê tempu hun ka sá bô ôtlô vê". ²⁶ Ni momentú sé, ê tava konvensidu ku Paulu ká pô dé uwã Jêlú, plovia kua sê ê tava ká samá Paulu ku flékuensa, pê pô fla kuê. ²⁷ Sósó olá dôsú anu válá, Pórcio Festu, bilá govenadô ni lugué di felix, só ê tava kêlê tê uwã leputason buadú ni wê dinpe zudé, ê mantê Paulu ni plison.