¹ Boholabenyke ariwinykre-ò kia Deuxu riwinykre-ò aweribireny aõkõ rarurunykre. Myike, Deuxu dori adee riwahinykre rybewi aõkõ hãwalò hãwalò tule hãwalò rariehekỹ roholakre irybe-ò. ² Hãwalò dori bede wararu rare, bohobenyke kia ibinahãkỹ kanakre-ò Israeli mahãdu òludumy tahe tii aõbo ijõdire riwinykremy tii heka ibinahãkỹ riwahinykre Israeli mahãdu-ò. ³ Deuxu rarybere: Waijoi, aõbohe jiarỹ rewinyre òbitimy aõkõ? Sõwemy aõbo rewinywãhãre umyrehy? Bidirawyònybenyke! ⁴ Jiarỹ anatadenykre Ejito hãwã ribi anahedỹỹdenykre uri taaõmysỹnymahãtenyte ribi, reteònyra Moseisi, Araõ tule Miriỹ-di riyrubunymy rakremy aõ tai ijõõhõdi. ⁵ Waijoireny õhõtireny itxi reake kia Balake, wedu Moabi riwinyre aõludurenymy kia Balaõ, kia Beti riòre wahe adee riwahinyre, ibutumy õhõtireny itxi reake aõ ròhònyremy kia tai tatxitenyte ribi ròhònyre Akaxia-ò tahe tule rehemynyre Giogaõ ò hãwãhãkỹ. õhõtireny lusaõmy tiu dori Deuxu tõhõti rusaõtyhy aõbo riwahire tarasana. ⁶ Aõbo tahe jiarỹ adisuhokre tiubo deuxumy areàlàkre-u? Aõbo adiwahinykre Deuxu biuludu tyhy-ò? Tamy aõbo adite òsinykre broreni riòre hãbu Deuxu-ò sohoji beòra tamy kedookremy. ⁷ Kia aõbo Deuxu kedeysakre tamy budoeni sõwetyhy-di da bee awihikỹsõwetyhy-di aõ kedeysakre? Kia aõbo tamy wariore dela adiwahinykre xiwenamy reakremy waaõna binabina òwydỹỹnamy tule waòraru owydỹỹnamy? ⁸ Tahe Deuxu riteòsinyre aõbo awi, tii rarybere kia widỹỹna inyribireny. Aõmybo ruruke inyboho rikiwinyrenyke aõbo òbiti inohõrõrenytyhy, kia wiiluumy sõwe tyhymy rikatxirenyke tule awimy ywimy òbitimy rikarenyke iny tybyreny-ò. Deuxu-ò wahe. ⁹ Deuxu rarybereri Jerusale hãwã mahãdu-ò, moõbo ibedeerymy ratxireri roholake tyhyna-di Deuxu tuu rarybereri. Tii rarybereri: Iny Juda mahãdu tule Jerusalemy sỹdu mahãdu boholabenyke. ¹⁰ Iny bina mahãdu heto kia ityhy mahãdu rexibutunyrenyre iny òeòe mahãdu. Tiiboho riuherenyre urihixina òbiti aõkõ, ibinamy tai rahare. ¹¹ Timy tahe jiarỹ iòraru arisuhòõtyhy tii dori ibinatyhymy riwinyre tule iutxietyhymy sõwemy ibinabina-di rare? ¹² Jerusale-ki hãbu iaõdi tyhy mahãdu sõwemy aõhõkỹmy risỹnyre, ibutumy tai sỹdu mahãdu ruihikỹ tule iaõnaõna mahãdu. ¹³ Tai tahe, jiarỹ reeryre aõhõkỹmy arasanynyrenykremy, aòrarunareny òraru-ki wahe, arahurenykre kaiboho. ¹⁴ Kaiboho tiu byrena-di awihikỹ-di matxibenyõtyhy kiamy boibekre rama arasahyymy. Biijebenykre bibutunybenykre atyhynareny ihãreleta aõ akireny ijõõkre ijõõkre; kia aõbo biyrubunybenykre wana adihukre iwese aõbina-ki rehuwãhãrewesele. ¹⁵ Bòbròbenyke ihãreta aõ birasỹbenyõtyhy; bisurusunybenykre ihãreta uweruny tahe tiu tamy bitehemynybenyõtyhy kia tiu biuhebenyõtyhy bewitxira bederatysõ tyre biriranybenykre, tahe tiu ibemy aworenyõna. ¹⁶ Kia heka ibutumy kynyikre aõhekibo kaiboho dori aõ ibinahãkỹ teryrymahãtenyte ibinatyhy kia wedu iòlò õri tule iriòre, wedu iòlò Akabe, itõhõdỹỹna heki tatximahãtenyteki wahe. Tai tahe, arihukre Jerusale ibutumy heka rexihukre tai sỹdu mahãdu wahe. Kaiboho heka ibutumy aõ akireny rariõtyhy.