¹ Jerusale mahãdu bexiywinybenyke kaiboho bexihedỹỹnybenykemy kia aòludureny ahãwãreny rirurawonymy ratxirenyreri tiiboho Israeli wedu iòlò rubudỹỹmy ratxirenyreri. ² Tahe Deuxu rarybere: Bele-Efrata kai hãwã iyja- ò tate Juda hãwã-ki. Tahe ariwinykre ahãwãrenyyribi heka ijõ ròhònykre Israeli wedu iòlòmy ratxikremy. Tii heka juhuu rybena heto riòrunyre riokore-le rarekre juhuu ihetxiutyhy mahãdu irehetyhyludu. ³ Deuxu riwahinykre Israeli mahãdu iòludureny debò wo-ò tuhyy tureny rasaõsaõmy roirekre tiu hãwyy riòre reakreu hukỹle tahe tii tamyreny loosahãkỹ riwahinykre. Tai tahe Israeli mahãdu heka rotena-ki iny rỹimyhỹre wesemy roiremyhỹ iribi tahe kidexibutunydenykre kia Su Wihikỹtamyreny ritidire-ò. ⁴ Kia wedu iòlò kdobikre kia aõbohe deuxumy rybedu wamahãdule rare, riwedunymy tarurumy tahe Deuxu tahe tamy rawihinyre tanimy, tabedeywinatyhy Deuxu riwahinyre. Aijoi tahe rasỹnyrenykre iijesedudimy kia heka tamy rehemynykre tarurumy irehetyhytyhymy bedebina ribi. ⁵ Tahe kidiwykre aõwityhyhykỹ. Tiubo axiria mahãdu iny hãwãreny rihurenyre ròtarenyre iny rurureyribi, inyboho tahe rikiteonyrenykre hãbu ruruterehekỹ tiiboho wana resurenykremy. ⁶ Tiiboho Neroji mahãdu hãwa-ò rirònyrenyre, kia heka rare, axiria, tahe rotarenykre. Kiamyre heka, tiubo axiria mahãdu inydeereny raaõbinamy renykreu inyhãwãreny-ò tahe inywedureny inyboho kidihedỹỹnykre. ⁷ Israeli mahãdu tahe iruhyy roirekre kia iny iwira mahãdu- ò tamyreny nonoe kiditeònykre isureny ò Deuxu riwahinykre, aõhebo biu alòbrònatyre resemyhỹre wese. Tiiboho rawinyrenykre Deuxu riwiòhenanyrenyraki aõ inymy aõkõ rawowydyrenyre. ⁸ Israeli mahãdu heka iruuhyy roirekre tuhyy iny mahãdu yki aõhebo iròdu deburehekỹ bederahy ludu wesemy, aõhebo iròdu debure itomora budoeni mynymy reamyhỹre tahe rimymyhỹre tahe riyreyrenymyhỹre tiu iny iribi rihedỹỹnyõtyhy. ⁹ Kia wesemy heka Israeli mahãdu ròtamy ròrubydỹỹnymy roirekre ibutumy taòludureny rahumy roirekre. ¹⁰ Tahe Deuxu rarybere Israli mahãdu-ò. — Kia txuu, tahe arirubunykre aawarureny adibinanykre aaõbinareny ityti heòty. ¹¹ Adirikre ahãwãreny ibinatyhymy adehukre arurunareny-di. ¹² Adihukre ãhàrireny tule aaõresydurenyõlemy beòbenykre. ¹³ Adihukre kia iòtaòta rityhymyhỹre tule adeuxureny Baa-ò , tiu heka tuu beàlàbenyõtyhy awidỹỹnarenymy. ¹⁴ Adihukre ibutumy adeuxureny deòsena asera-ki tule adihukre ahãwãreny. ¹⁵ Wanonanamy, wahõrõtyhymy, jiarỹ adiòwynytyhykre ibutumy bedebede warybe rityhyõrenyre-ki wahe.