¹ Kia waribi! Jiarỹhãbu byretyhy rare tahe uritere tuu bederatymy rarunyre ibutumy lobrona figomy tule bederaty somy tomy tahe aõkõ ijõtxi reaõhyyre aõrekibo isona bedemy rỹimyhỹreu dori ibutumy risihimyhỹre. ² Ibutumy bedebedemy hãbu ibiti ijoõkre, tule deuxu rybe kidityhynoõkre. Ibutumy iwitxira rubu dỹỹle kanarunydenykre iny sohoji sohoji tarotenalemy rỹikre rotenawoki. ³ Ibutumy rexiywinymy aõbo ibina widỹỹmy. Hãbu ruruterehekỹtahe iubewerile riwahinykemy, bede erydu tahe kiale tamy rehemynymyhỹre bedeywinale kia iruterehekỹmahãdu tahe timybo tamyremy riwahinykremy rõhõtinymyhỹrenyre. Ibutumynkia riywinyrenyre riwinyrenykremy ibinahakỹ. ⁴ Iwese tyhyle hãbu wihikỹmahãdu, kia hãbu obiti mahãdu, aõmy ratxiõhyymyhỹrenyre kia edeho wesemy. Tiubo Deuxu kedehemynykreu tahe aõhõkỹmydỹỹnana ityrerimy riatykre kia idireny dori retehemyhỹre obitimy, kia heka Deuxu rybedu mahãdu tuu rarybere. Iu tahe, kynyikre aõna aõna binabina ibutumy bedeki. ⁵ Retyhynyõre wabireludu, tule wabiowa retyhynyõwãhãre. Iny sohoji sohoji bexiõhãruny mahãbeny tule ahãwyy manamanareny-ò marybemahãbeny. ⁶ Wiji bedemy uladu mahãdu tyby rityhynyõhyymyhỹre tule tariolahi wana raaõbinanymyhỹre, tahe ibinatyhymy oludumy ratxikre seriore woludu tyhyle wana wahe. ⁷ Jiarỹ, kia retidiwãhãre wararosona Deuxu-ò, tii heka retyhyny wãhãre inatyhytyhymy tii dori kidiwatakre. Wadeuxu dori kidiwawiohenanykre. ⁸ Waõludureny, uritere wadireny nohõtiõmy! Inatyhymy rejuxunyrenyre, tahe ixybylemy retamynyrenyre lamamy, katahe, wiji watxirenyreri bedeluru-ki, tahe Deuxu iny loosonarenymy rare. ⁹ Inyboho rexiora runyrenyre Deuxu ribi tahe wiji inyboho rkexiywinyke tamy rokoikremy. Tii dori iny riywinyrenykre inyorarurenyki inydeereny ywina riwahinykre. Tii inyboho ridykre loosonahãkỹ-ò, tahe inyboho ritakre. ¹⁰ Tiubo inyoludureny inymyreny robirenykreu tahe raixyrurenykre, arieryrenykre arotarenykre; tiiboho heka ityrereny arariakre iwese subruru hãwakỹeryesy-di reamyhỹre wese. ¹¹ Jerusale mahãdu rehemynyreri wahe otity relekre txu-ò itamoramy hãwaki tahe rexirahorekre irehetyhymy kia iwitxira bedebede ribi. ¹² Kia txuule, inywedutyhyreny kodoosekre Jerusale-ò. Tiiboho robirenykre Axiaramy, tule Ejitumy tule Eufratxi mahãdu beraludu ijoimy; tule robirenykre beronihikỹmahãdumy tule hãwalo rariehekỹirehemy. ¹³ Kia tahe ibutumy bedebede rexirahorekre aõ tai ijõõhõkỹmy kia oraruna oraruki wahe tu sỹdu mahãdu ibutumy. ¹⁴ Deuxu, inydireny itxeredu, iny ywisidỹỹdu inyboho ihõrõ roire ibroreni. Inyboho irehemy ratximyhỹrenyre iribi bedeyxeke suu wihikỹotity woki tule su wihikỹtyhy-ki. ¹⁵ Ariwinykre aõwihikỹtyhy inylahanarenyki, iwese adiwinykre tiubo aritarenykre-u Ejitu ribi. ¹⁶ Bedebede ruruterehekỹtuu robirenykre, kia ibutumy tarururiny ribi tiiboho raixỹrurenykre. Ijõ mahãdu tahe urile ruberurenykre, taryreny rarutxinykre kedexihetenydenykre tõhõtireny-ò. ¹⁷ Tii bededi rexirureherenykre brybymy, tiiboho roirenykre taruruterena ribi, tỹxihikỹle ibinahãkỹdi, riòòserenykre inytybyreny-ò inydeuxureny-ò wahe. ¹⁸ Deuxu heka ijõõre iwitxira Deuxu iwese, tahe riixare imahãdu ribi irumy ratxirenykremy. Kai uritere tuhyy nõmy, tahe kiamy inydeereny aluuna biteosinykre. ¹⁹ Itamora rayky inydireny kanaruxetoe denykre, kanahudenykre iny aõbinabinareny-di kedehukre iny orarureny-di ahu bero nihikỹ-txi. ²⁰ Timybo adeereny retidire juhuu inykorenymy roiremyhỹ-ò mahãdu-ò, kai òbitityhymy mabekre tule biteòsinykre aluna wadeereny, Abraõ, Ijaò (Jacó) riòre riòre wahe.