¹ Deuxu Tyhyhykỹ rarybere: — Biwodỹỹnybenyke ajuròna! Aòludureny dori rihureri wasu nawiihikỹ wesemy kiemy dori wasỹreny waijoireny rikròkrenyre warybe ywidỹỹna tii boho-wana rewinyrenyre kia dityhynydenyõhyymyhỹdenyde warybe ritidỹỹnana. ² Tii boho wadee rexitòenymyhỹrenyre tarureny ribrenymy, myỹ raryberenymy: “Kai heka waDeuxureny tate, diarỹ boho tahe adeehyy ymyhyy rarybemyhỹrenyre.” ³ Ka tii boho tahe aõnaõna wiwi deralemy rekoarenyre kia iurenana tahe iòludu mahãdu iherenymy iheworenymy reamy rarekre. ⁴ – Waijoi mahãdu ritarenyre iòlò mahãdu riwateòarinyrenymy aõkõ kia hãwahãkỹ wedu ritarenyre tai awimy rahare-ribi aõkõ. Tamanareny òtaòta-di tamana rỹsỹreny-di riwinyrenyre tuu rerinanyrenykremy kia iurenana rexihurenykre. ⁵ Diarỹ riwakyaranyre broreni riòre mana rỹsỹhỹkỹ kia Samaria iny mahãdu tuu rerinanymyhỹrenyre kia tahe idireny wakyaramy watxireri. Tiwese bedeubo tahe tii boho broreni riòre mana rỹsỹhỹkỹ-di rerinanymy roirenyrekre? ⁶ Kia israelitaõ broreni riòre riwinyre; kaa mana rỹsỹ broreni riòre heka Deuxu aõkõ rare kia tahe rabòhòbòhòkre iyreyremy. ⁷ Tii boho yhy ribrònyrenyre kiata yhydebure riherenyre.Maixõmoni raratynyõhyykre; ka txibo iraty ijõdikreki, kia iwitxira hãwa hãwa mahãdu rihurenykre. ⁸ Israel heka reòsamy riõmy ratximyhỹre! Ijõ mahãdu hãwa hãwareny Israel-di retehemyhỹrenyre aõna tyhyhykỹmy aõkõ. ⁹ Israelita mahãdu heka awaru jumetu debure wesena rare kia rõhõtiõmyhỹre ixi sohohi rariakemy. Tii boho ròirenyre ixitòedỹỹmy Assiria riwiòhenanyrenykremy kia ijõ mahãdu deereny tasỹ rexitòenyrenyre riijerenymy riworenykremy. ¹⁰ Ka diarỹ tahe arimymy arirarytxynykre, kia tiwese bede irehe riòremy tii boho aõhỹỹmy rutỹỹnyrenykre Assiria wedu debure ruruterehekỹ rawoki. ¹¹ – Israel iny mahãdu sõemy xiwena dena riwinyrenyre kia taòrarureny risuhòsuhòmy ixawirenykemy, kaa xiwena dena sõe tahe aõmakile awire iny mahãdu ixyby òraruna riwinyrenykremy. ¹² Kia sõemy mili-my tyyriti reritinyre warybe wahidỹỹnawihikỹ iny mahãdu deereny, ka tii boho tahe teralemy rekoarenyre kia txibo aõtyhyhykỹ aõkõ wesele. ¹³ Tii boho wadee xiwenamy tuu raubenymyhỹrenyre kiata xiwena rỹsỹna tamyreny arwire. Ka Diarỹ, Deuxu Tyhyhykỹ, wabedesamy aõkõ idireny watxireri. Diarỹ wanohõti reare iòrarurenytxi kiata arirarytxynykre. Kia ixybyle ariteònyrenykre Egito-ò, ¹⁴ kiemy dori Israel iny mahãdu tõhõtireny rusarenyre Tajuradỹỹdu-ribi. Israel iny mahãdu riwinyrenyre aõmysỹdỹỹna hetoreny, kia Juda mahãdu hãwa hãwa riwinyrenyre adobo-di riwetinyrenymy; ka diarỹ tahe heòty aditeònykre kia hãwa hãwa ritoonykre kia irurureny rahurenykre.