¹ Israel iny mahãdu, ixi bedesadỹỹreny-ribi ixiwirenyke, ixenawidỹỹ-ribi ixawirenyke iwese ijõ iny mahãdu riwinymyhỹrenyre wese-ribi. Kai boho heka Deuxu teritenyte kia mana rỹsỹ brorenimy tarerinanytenyte. Kia ibutumy su-my maixõmoni rahãte hãtere, kai boho idi tahònytenyte wedena wesemy Bali (Baal) ỹnyxiwe dee kia tahe tai awimy tahãtenyte iòwydỹỹna iribi temytenyte. ² Kia iòhòtyhylemy maixõmoni ihoõkre, aõòlỹre tule, kiata mona besò (vinho) ihoõkre. ³ Israel iny mahãdu ratxirenyõkre Deuxu Tyhyhykỹ su-ki, kia tahe Egitu-ò ròòserenykre kia Assiria bedeki tahe rỹsỹna binabina rirỹsỹrenykre. ⁴ Kua hãwahãkỹ bede-ki tii boho riwinyrenyke aõkõre mona besò (vinho) Deuxu Tyhyhykỹ dee kia xiwena riwahinyrenyke aõkõre tuu reòarimy ratximyhỹrenyre. Kia rỹsỹna rirỹsỹrenykre heka rubu dee relemyhỹre wesena rare, kia ibutumy rirỹsỹrenykre ibinabina iybinaybinamy ratxirenykre. Kia rỹsỹna xiwena riwahinyrenyke aõkõre Deuxu Tyhyhykỹ rybe dohodỹỹna heto-ki; kia urile aõwaxina riroxirenykre. ⁵ Aõbo tahe tii boho riwinyrenykre tiu txuu ixena bede-ò rehemynykreu Deuxu Tyhyhykỹmy rybenana rỹikreu? ⁶ Kia rexiwòrenykre rexihurenyreke lau, ka egipcio mahãdu tahe rimyrenykre kia rituunyrenyre Mênfins hãwaki. Ka iaõnaõnareny mana rỹsỹ òtaòta wiwihikỹ tahe bedeyky ledelede-di rahetydỹỹmy roikre, kia tahe bedeyxemy ihetoreny rỹikre. ⁷ Kia dehemynymy namyhỹde rarytxyna txu, itxuu Deuxu taijoireny tasỹreny rirarytxynykre. Kia Israel iny mahãdu tuu riemy ratxirenyrekre! Ka kai boho tarybemyhỹtenyte: “Kaa profeta heka raitxỹtereri! Tarybemyhỹtenyte rayky rybele raremy, kiahe itxỹte rare!” Kai boho myỹ tarybemyhỹtenyte aõherekibo sõemy tỹximy aõnaõna binabina-di kia kyara-di bede nyimyhỹde. ⁸ Deuxu heka diwateònyde profeta-my iijoireny isỹreny mahãdu ariteòarinykremy, kia ibutu bede bedemy tii boho bede riywinyrenyre riwamyrenykremy.Kia Deuxu rybe dohodỹỹna heto-ki dorile tii boho wahemy rekoamyhỹrenyre! ⁹ Tii boho heka òrarunareny-di rexisỹydỹỹnyrenyre kia iny mahãdu Gibea-ki rỹimyhỹrenyre wesemy. Deuxu heka tõhõti itxi reakre iòrarurenytxi kia tahe rirarytxynyrenykre. ¹⁰ Deuxu Tyhyhykỹ rarybere: — Kia Israeltxi reareu kodelemy, kia rabedesare iwese inyỹ mona besò ratytxi reamyhỹre wesemy bederoki, kia ahỹỹnareny mahãdumy rabireki, kia rabedesare iwese inyỹ bederaty rasònymy roimyhỹre wesemy. Ka tii boho Peor hãwalò-ò ritemynyrenyreu, tai tahe urile Bali ỹnyxiwemy rerinanyrenyre kiata ibinatyhymy rexirahòrerenyre kia tatyhydỹỹnarenymy tii boho rerinanyrenyre. ¹¹ Israel ninihikỹ rare, ruòmy nawii wesemy. Ixyby uladu mahãdu ruarenyõre: hãwyy mahãdu rabòtònyrenyõkre kia uladu iribreny reake aõkõre. ¹² Kia ihãremy iriòrere retibiedỹỹnymyhỹre, diarỹ aridyrenykre; kia sohojimy aririke aõkõre. Kiata ka mahãdu iny-ribi arexilòhòrarienykreu! ¹³ Diarỹ Israel-my rabire Tiro hãwa wesemy, bedewihikỹ rabròmy rỹiremy; ka Israel tahe tariòrereny ridyrenykre rururenykremy. ¹⁴ Deuxu Tyhyhykỹ, aõbohe biwinykre kaa iny mahãdu deereny? Kia hãwyy mahãdu iriòrereny ihoõkremy tesỹnytenyte! Kia txibo ijõdikeki tahe ihuỹsy rarubunymy rỹike, kia tariòre rihuỹtònyõkremy! ¹⁵ Deuxu Tyhyhykỹ rarybere: — Ibutumy Israel aõnaõna binabina ròrarunyre Gilgal hãwaki, kia tai heka tamy kyara reòrarunyre. Kia iòrarureny òraruki heka diarỹ ariteònykre wasu-ribi. Ka wiji bede rỹire-ribi tiu ixyby tureny arerinaõhyyrenykre. Ibutumy idinodureny waòludumy rekoarenyre. ¹⁶ Israel heka rawotõmomy ratxireri; kia iwese bederade raratynyõmyhỹre wesemy kiemy dori irarureny raruburenyra. Kia uladu mahãdu ruarenykrehãrele, diarỹ arirubunykre kaa riòrereny derinana. ¹⁷ WaDeuxu tasỹreny taijoireny derarenymy reakre kiemy dori tii boho rityhynyrenyhyyrenyre. Kia tii boho rariarenykre iryreny ihoõmy kia iwitxira hãwa hãwa mahãdureny-wana.