¹ –Kia teytedỹỹmy idireny resỹnymyhỹu Israel iny mahãdureny-di kia idireny resỹnymyhỹre ixyby ityhymy iaõdirenymy ratxirenykemy, kia heka iòrarureny sohojihyylemy rabimyhỹre kia iaõbinabinareny-di. Kia heka iroirenyre,iwasiròrenyre kia hetowo-ò wasimy rirònymyhỹrenyre kia iny mahãdu ry-di ririranymy ratximyhỹrenyre-ò iwasidỹỹmy rekoamyhỹrenyre. ² Tii boho heka rõhõtinymyhỹrenyre kia diarỹ wanohõti rusamyhỹrenyremy ibutumy iòrarureny-ribi. Tii boho rauhuarimy ratximyhỹrenyre taõbinabinareny-di, kia tiu idireny itxeremy aratxiõtyhy. ³ Deuxu Tyhyhykỹ rarybere: — Wasỹreny waijoireny heka iaõòtaòtarenyre, taroireny-di heka tii boho ribònymyhỹrenyre Iòlò kia hãwã wedu mahãdureny. ⁴ Ibutumy heka tii boho bòdỹỹdulehekỹreny roire. Kyara heka tii boho risõmyhỹrenyre heòty tòtee wese, paõ hina widỹỹdu heka heòty riworonyõhyymyhỹrenyre paõ hina ratarinymyhỹre hãrele kia tahe rexihumy rỹimyhỹrenyre heòty-ò ratidirenykremy. ⁵ Iòlò ixena rỹire bedeu tii boho sõemy tamyreny mona besò (vinho) riwahinyre kia hãwã wedu mahãdureny-ò tule kia tii boho iòde sõemy rawàrinyrenyre, kia iòlò sõemy aõòtaòta riwinyre. ⁶ Kyara ixyby rexinoranyre iworeny risõrenymy, kia iwana-wana tahe tii boho aõnaõna binabina riywinymy roiremyhỹ, iòlò òludumy. Ruu iyhyõmy ikyara rabuturenyre, ka rudiu tahe risõre heòty wesemy. ⁷ Rasõrenymy rakyaranymyhỹreny, tii boho tadinodu boho rirubunyrenyre; ibutumy iiòlòreny rururenyre wihewowihewolemy, ka inyõ tahe wadee rexitòenyõhyyre. ⁸ Deuxu Tyhyhykỹ rarybere:— Israel iny mahãdu-wana rybe widee biywinybenyke iwitxira iny mahãdu-wana ka tahe wiji mare (paõ) iywidỹỹmy aõkõ rasõre wesemy rỹire. ⁹ Iny mahãdu heka bede rieryrenyõhyyrenyreri hãwa hãwa taruru tabedeery riixawidỹỹnymy rexihurerimy kaa iny mahãdu witxira-wana wideereny bede riywinyrenyreri òraruki. Hãwa hãwa heka iruru rexihumy ratxireri matuari raura wesemy, ka iny mahãdu tahe tuu bede rieryõhyymy ratxirenyreri. ¹⁰ Iny rexityhytyhynymy rỹimyhỹrenyre heka tii òbitile ixidireny itxeredumy ratximyhỹrenyre ixiòludurenymy. Ibutumy heka kaa aõnaõna tuu rutỹỹnyre, ka ihãrele tahe tii boho wadee ròòserenyõhyymyhỹrenyre kia Deuxu Tyhyhykỹ wiòhedỹỹna rierenyõhyymyhỹrenyre, taDeuxureny. ¹¹ Israel heka bòtòe itxỹte wesena rare: kodelemy heka Egito wiòhedỹỹna riemyhỹrenyre irahudi tahe Assiria-ò ixihedỹỹmy rexitòenymyhỹrenyre. ¹² Ka diarỹ tahe arimyrenykre, iwese inyõ nawii sõmo rimymyhỹre wesemy ryresi-di. Diarỹ arirarytxynyrenykre kia tuu roholarenyre mynamy tarybereny butuna-ki. ¹³ –Tii boho reòsamy natximyhỹdenyde kia tahe rexihurenykre, kiemy dori rexiwòrenyre kia waòludumy rekoarenyre. Diarỹ arihedỹỹnyrenykemy idireny resỹnyre, kia tii boho tahe roihyylemy wamy rarybemyhỹrenyre. ¹⁴ Kia wadee rexitòenymyhỹrenyre heka òbitimy aõkõ tuu riwinymyhỹrenyre; tii boho su-ò ixi-di rehumyhỹrenyre, ỹnyxiwe òtaòta tyhydỹỹdureny wesemy rirajuamyhỹrenyre. Tiu rexitòenymyhỹrenyreu maixõmoni-my kia mona besò-my, tii boho rexikòhekòhemyhỹrenyre, iwese iwitxira mahãdu riwinymyhỹrenyre wesemy. Ibutumy waòludumy rekoarenyre. ¹⁵ Diarỹ heka reerynanyrenymy retohonyrenyre kia tamyreny ruruterehekỹ rewahinyre, kia tii boho tahe aõnaõna binabinale riwinyrenykremy bede riywinymyhỹrenyre waòludulemy. ¹⁶ Iwese wyhy-di adehu rỹimyhỹre waxiahãte bina-di kia tahe riweõhyymyhỹre aõ obo rehure, kawesemy tahe tule wasỹreny waijoireny waribiòtu waõnamy rekoarenyre kia tahe ỹnyxiwe òtaòtalemy rerinanyrenyre. Iwedureny mahãdu rexityhytyhynymy rarybemyhỹrenyre iurenana heka tõnori-di rururenykre. Kia tahe Egito iny mahãdu idireny risinyrenykre.