¹ Dario, Assueru riòre, Média hãwãludu, Babilonia iòlò rare. ² Kodelemy wyra Jerusalë rabinabinamy roikre-di, tuu Deuxu Tyhyhykỹ rarybere mynamy Deuxu rybe-di ijohodu Jeremia dee. ³ Bederyry deòsinamy, diarỹ rexityynyre sau tyy yxehekỹ-di, kia bryby tyre rexisỹnyre, byre-ribi ixawire kiata inatyhyhykỹmy sõetyhymy itòteemy rexitòenyre Deuxu dee, kia ixitòedỹỹnana rewinymy kia rahõtiõtyhymy. ⁴ Rexitòenyre waDeuxu Tyhyhykỹ dee, kia myỹ inatyhymy rarybere: — Deuxu, kai heka anihikỹ tate aruruterehekỹmy! Kai heka rybe widee raywimy rỹimyhỹre terarenymyhỹte, kia tewinymyhỹte mobo umy rarinanymyhỹre mahãdu-ò kia rityhynymyhỹrenyre arybe wahidỹỹnana kia ikiehyymy òbitimy riwahinymyhỹrenyre umy derinanareny. ⁵ Diarỹ boho òrarunahãkỹ rewinyrenyre kia aõnaõna binabinahãkỹ; aõnaõna binabina rewinyrenyre kia diarỹ boho aòludumy rekoarenyre; arybe wahidỹỹnana retyhynyrenyõmy kia arybe tòedỹỹna. ⁶ Kia arybe-di ijohodu rybe notxi rerirenyõhyyrenyre, profeta mahãdu, kia raryberenyre animy waiòlò deereny, teòdu mahãdu deereny, wahỹỹnareny deereny, kohe, kia ibutumy Israel ijoi mahãdu deereny. ⁷ Kai wahãreny, ikiehyymy òbitimy noduhyy tate; ka tahe wiji raixỹrumy watxirenyreri, diarỹ boho, aijoireny, kia Judeia-ki Jerusalë-ki rahãwanymy watximyhỹrenyre, kia timybo kai teuberanyte hãwãhãwãiòhòmy hãwãhãwãirehemy. Kai tuu tewinyte kiemy dori tii boho aòludumy rekoarenyre. ⁸ Waiòlòreny boho, teòdureny boho, wahỹỹnareny boho, ibutumy diarỹ òraruna rewinyrenyre aòludumy, kia iurenana heka raixỹrumy watxirenyreri. ⁹ Ka kai tahe iny-di wobrudu nihikỹdu tate kia tiwaraòrenyhyymy atximyhỹte waòrarureny biixawidỹỹnykemy, kia diarỹ boho aòludumy rekoarenyre hãrele. ¹⁰ Arybe wahidỹỹna retyhynyrenyõre, Deuxu Tyhyhykỹ, kiata arybe wahidỹỹna-di watxirenyõhyyrenyre kia tewahinyte arybe-di ijohodu dee, profeta boho. ¹¹ Ibutumy Israel iny mahãdu rikrore arybe wahidỹỹna kia rityhynyrenyõre arybe tòedỹỹnana. Aòludumy òraruna rewinyrenyre, kia iurenana watyrereny teriòwysydỹỹnyte aõnaõna binabina raritidỹỹmy roire Moisesi Tyyritina-ki, Deuxu deòdu. ¹² Kai tuu tewinyte aõhỹỹmy waòludurenymy wawedureny deòdureny òludumy kia tesehekỹtyhymy tiwararytxynytenyte. Tiu, tibedeki tuu rutỹỹnyõhyyre aõhỹỹmydỹỹnana inihikỹtyhymy kia Jerusalë tyre resere wesemy, ¹³ kia heka tuu raritimy roire Moisesi tyyriti-ki. Kia ihãrele tahe diarỹ boho waòrarureny-ribi ixawirenyõlerenyre, kia ixidi rarurunyrenyõlerenyre òbitityhymy aratxirenykemy; kia aõ rewinyrenyõhyyrenyre Deuxu Tyhyhykỹ wakireny awimy rahãkemy. ¹⁴ Kairemyta kai Deuxu, rarytxyna teywinyte kiata watyrereny teatyte. Kai heka waDeuxureny Tyhyhykỹ tate; kai heka ibutumy aõnaõna-ki awihyy tate, kia diarỹ boho tahe arybe tòedỹỹna-ò raholarenyõhyyrenyre. ¹⁵ — Waha, waDeuxureny, kai heka abedeery arurutere nihikỹ teteòsinyte tiubo aijoi tetanyteu Ejitu-ribi, kia anidehedehemy tai atximyhỹte wiji bede yrybule. Ka diarỹ boho tahe òraruna rewinyrenyre kia ibinamy rewinyrenyre. ¹⁶ Waha kai heka ainydee tòedu nihikỹ tate, kiaremyta, uritre akyaramy aehehemy noõmyke Jerusalë-di, kia heka ahãwãrare ahãwalòtyhyhykỹ rare. Waòrarureny òraruki kia wahỹỹnareny òrarunareny òraruki, kia iny mahãdu ibutumy hãwãhãwamy rỹimyhỹrenyre wabirerenymy urile risinymyhỹrenyre Jerusalë-di kia iijoireny-di. ¹⁷ WaDeuxureny boholake waixitòedỹỹna-ò, tamy beòbyke wanohõtiõna dee adeòdu. Kia ibutumy rieryrenykremy kai waDeuxureny tatemy, arybe wihikỹ biditxiwike arybena heto ijohona dee, ka wiji naatymy doimyhỹde. ¹⁸ Boholake waDeuxu, kiata waixitòedỹỹna-ò beòbykre. Arue biraynyke, waõ binabinareny-di bedeteheke kia ahãwãdee bedeteheke. Waixitòedỹỹna rewinyrenyre ainy-di ruxetòehekỹ òraruki kia diarỹ boho awimy watxirenyreki aõkõ òbitityhymy. ¹⁹ Boholake waha! Waòrarureny biixawidỹỹnyke, Waha! Warybereny dee beòbyke Waha, kiata manake wawiòhedỹỹrenymy. Kia ibutumy iny mahãdu araeryrenykremy kai Deuxu nihikỹ tatemy, uritre rooreheõmy biwahedỹỹnybenykemy waDeuxu, kiemy dori diarỹ boho aijoireny roire, kia Jerusalë tahe ahãwatyhy rare. ²⁰ Diarỹ rexitòenyhyymy watximyhỹ kia òbitimy rarybemy waòrarumy kia tule waijoireny òrarunamy kia rarybemy waDeuxu dee, rahõtiõtyhymy ihãwalò tyhyhykỹ weribi. ²¹ Kia rexitòenylemy watximyhỹ iu Gabrieli, kia anju-my rabirele diarỹ rarasinyre bedeu, nade wytyhylemy duòmy kiata wabiretxi rexitxuhunyre. Kia inataõ hora bedeu, iu xiwena txioromy rawahimyhỹreu. ²² Tii rarybere; — Danieli, diarỹ rareri ariòbitinykremy aõmybo tarasinymy tabite. ²³ Kai aixitòedỹỹna teòrarunyteu, Deuxu reobyre aixitòedyỹna-ò. Deuxu sõemy umy rerinanymyhỹre kia iurenana diwateònyde ariòbitinykremy aõmybo arasi-ki tabite. Kiaremyta, boholawiwikre kiata bierywityhykre aõmybo ararybekre. ²⁴ — Danieli, aijoireny rarytxynareny kia ihãwarenytyhyhykỹ rarytxyna 70 wyra ixyby debò inatximy raroorehenykre, ihyyta iyara rexihukre, kia òraruna rexihukre. Taita aijoi rimyrenykre taòrarureny riixawidỹỹnykremy, kia Deuxu aõ òbitihikỹ relekre. Arasi-ki tuu tabite kia aõ relekremy kia tuu rutỹỹnykre, kia Deuxu rybe-ò ijohona heto ixybyle rawidỹỹkre. ²⁵ Boholawityhyke Danieli, kiata bieryke. Irahudi rawahikreu rybe wahidỹỹna Jerusalỹ ixyby relekremy, debò inatxi wyra sõemy ixyby debò inatximy bede rỹikre, kia tahe weduõ kedehemynyke Deuxu tuu ritare. Jerusalë rirana tỹmyra kia iuhuari adobo tỹmyra bede riemy rarekre 62 wyra sõe ixyby debò inatximy, kia tahe bede sõemy aõhỹỹmydỹỹnana-di rỹikre. ²⁶ ka bede konanau tahe Deuxu wedumy ritare rurukre aõ iòrarudimy aõkõ. Kedehemynykre iòlòõ tasodadu-di kiata hãwãrahukre Deuxu rybe-ò ijohona heto rihulekre. Bede konana heka kanakre beòrahãkỹ wesemy, wouna kidiwykre kia bede rexihukre Deuxu tuu riywinyre. ²⁷ Kaa iòlò heka riwinykre sõemy iny mahãdu-wana kia rybe bede widee riywinykre kia debò inatxi wyra sõemy bede riekre; ka tiubo iwyra weere bede rimykreu, tii rahukre xiwena iròdu iròdu kia alòbròna xiwena Deuxu rybena heto-my rỹimyhỹre. “Bede bina nihikỹ” kia rasỹdỹỹkre Deuxu rybena heto rarietyhy-txi, tai bede riekre ihyy kua tuu riwinyre kia rihukre, tuu Deuxu bede riywinyremy.