¹ Inataõ wyramy bede riere ciro Persia iòlò-my, diarỹ Danieli, Beltessazar-my raninilere, Deuxu rybe remyre. Kia rybe heka inatyhymyre, urile heka sõemy isirare arierykemy; diarỹ iòbitidỹỹna reeryre warasimy tuu rabiremy. ² Kua bedeu aõ rewinyõhyy raremyhỹ inataõ semanamy bede reijere. ³ Kua bedeu rỹsỹna wihikỹõ rerỹsỹõhyyre iròdude ariròke aõkõre, mona besò-my (vinho) ariõke aõkõre kia warade resihònyõhyyre. ⁴ Kia 24 txuu kodelemy ahãdu rỹimyhỹreu wyramy, diarỹ watximyhỹ Tigre bero weijàtiki, ⁵ kia isitere-ribile anju-my rabimy reare tyyesi-di rexityynymy kia weretysana mana rỹsỹhỹkỹ riuhemy. ⁶ Iumy raòderanymyhỹ mana rỹsỹ wesemy, iòsỹny biudelaa wesere, irue tahe heòty loosò wesere, iaxiò iti rarỹsỹnymyhỹ mana òtaòta rỹsỹ wesemy, irybe wodỹỹ tahe iny sõehekỹ rybe wodỹỹ wesere. ⁷ Diarỹ sohoji kamy rabire. Waijoi mahãdu aõmy robiõhyrenyre, kia brebumy rahenyrenyre kia rexiwòrenyre. ⁸ Diarỹ kuaki ixi sohojimy watximyhỹ iwana-wanata itxerena wihikỹmy rabire. Walỹrehekỹmy relere brebumy kia waruru waribi ixawire. ⁹ Kia anju rybe-ò raholareu, rahõtibrere kia wawomy su-ò resere. ¹⁰ Tai iny deboõ riwalàmadỹỹnyre, kia diarỹ watiòhumy ranyre, reximymy wadebò-di ¹¹ Kia anju wadee rarybere: — Danieli, Deuxu heka sõemy umy rerinanymyhỹre kia diwateònyde adee ararybekremy. Làmamy mynyike kiata boholawikre aõmybo ararybekre-ò. ¹² — Uritre brebuõmy Danieli, kiemy dori Deuxu aixitòedỹỹna-ò roholara komy kai texihỹkehỹkenymy tatemyhỹu ikoki kia bederytyhy bimykremy. Diarỹ rareri aixitòedỹỹna rawyòdỹỹmy. ¹³ Anju itxesedu Persia iòlò waòludumy resure txumy. Ka Mieli (Miguel) tahe anju mahãdu wedu, nade wawiòhedỹỹmy, kiemy dori diarỹ ixi sohojile resumy watximyhỹ, Persia iòlò mahãdu òludumy. ¹⁴ Ka tahe wiji rareri adee ariòbitinykremy, aõhebo bede rutỹỹnykre aijoi mahãdu-ò, kamy tabite heka ijõ wyra bede bedeu rutỹỹnykre rare. ¹⁵ Tii wadee rarybemyhỹ wana-wana, diarỹ rybeõmy raire, su-ò retehemy. ¹⁶ Isitere-ribile iny hãbu wesena waryijeti riukỹnyre; iu tahe rarybere kia anju dee rarybere wakoki rỹimyhỹ-ò: — Wanyrỹ, kamy rabire heka riwawojeijeinyreri, kia waruruõmy ixiki rahãreri. ¹⁷ Timybo tahe diarỹ awidỹỹna, awana ararybekre? Diarỹ waruruhomy aõkõ watxireri kia elewesenaki dori rexisiranyreri. ¹⁸ Taita tii ixybyle wadee deride, iu tahe waruru wadee ròòsemy idi rahõtinyre. ¹⁹ Tii rarybere: — Deuxu umy rerinanyre. Kiaremyta, uritre brebuõmy. Kia Deuxu bedewihikỹ aki ijõdire. Bexideyrewenyke! Bexi brebuterenyke! Taita diarỹ waruruteretyhymy ixiki rahãre kia rerawyònyre: — Marybeke, kiemy dori kai wadee ruru tỹmyra wadee tewahinyta. ^20-21 Tii rarybere: — Teeryte aõbo aõherekibo diarỹ adee rybemy nanade? Kia adee ararybekremy Tyyriti Òbitihikỹ-ki raritidỹỹmy roimyhỹremy. Ka tahe diarỹ arakre aresukremy Persia anju itxeredu-wana aresukremy. Kia ijesu rexihukreu, kanakre Grecia anju itxesedu. Ka nadesumyhỹde tii boho-wana kia inyõ ihoõhyymyhỹre riwawiòhenanykemy, aõhebo tahe Mieli (Miguel), Israel itxesedu.