¹ Tii heka riwawiòhenanymy riwaijeke ijõdire. Diarỹ lamamy ² Kia anju tarybe ritõranymy rarybere: — Aõmybo adee ararybekre òbitityhymy. Pérsia ixyby inataõmy iiòlò ijõdikre; irahudita isỹtybyreny inaubiòwana iòlò ijõdikre, tii tahe iaõdimy ityhytyhymy runykre ibutu ratyremy. Taaõna tyhytyhyna-di tii sõemy rexityhytyhynymy rarekre; ibutumy tasodadu mahãdu ributunyrenyrekre kiata rihurenykre Grécia iòlòna. ³ Irahudita isỹtybymy ratxikre ijõ iòlòõ, sõetyhytyhymy tebure. Iiòlòna heka inihikỹkre, kia tii aõ riwinymy rarekre ixideewimy. ⁴ Ka txibo irurutere ikonana-ò rehemynykreu, iiòlòuna ixawikre kiata inaubiòwamy rawirareakre. Iòlòmy sỹtybyki ratxirenykre heka irioreriorereny aõkõ tuu runykre, kia tahe irurutere weseõkre juhu tii ratxire wesemy. ⁵ Egito iòlò rexityhytyhynymy rarekre, ka isodadureny weduõ tahe ihãremy iixityhytyhydỹỹluukre kiata ihãwãnihikỹõ riwedunykre. ⁶ Kia tiu bede wyraubo tahe, Egito iòlò kia Siria iòlò rybe wooxina widee riwinyrenykre, Egito iòlò tariòre ijadòòma riwahinykre hãbu-my roikremy Siria iòlò dee, kia ywihyymy ratxirenykremy inatxi hãwãhãwa mahãdureny. Kiaremyta ibededỹỹnanareny rexihumy rakre, kiemy dori tii, ihãbu, iriòre kia deòbureny mahãdu ibutumy rururenykre. ⁷ Kiata iòhòtyhylemy hãwyy sỹõ iòlòmy runykre, kiata ririranyrenykre tasodadureny-wana kia Siria iòlò sodadu òludumy, kia ralòrenykre Siria ruruterereny dee kiata tuu rahãỹnanyrenykre. ⁸ Tii riwyrenykre Egito dee Siria ỹnyxiwe kia iaõtyhytyhynareny mana rỹsỹhỹkỹ-di riwinyrenyre kia mana rỹsỹ òtaòta-di. Kia ywimy bede wyra rierenykre inatxi hãwãhãwãwitxira, ⁹ ka irahudita Siria iòlò riekre Egito dee reakremy. Kiaremyta tii rabodukre kia tasỹ-ò roosekre. ¹⁰ Siria iòlò riòre boho rexiywinyrenykre rawounyrenykremy kia sodadu mahãdu rurutereny riywiywinyrenykre. Ijõ mahãdu ròirenykre tasodadureny-wana Egito-my rahãỹnanyrenykremy, kia rihurenykre ibutumy beòrahãkỹ rỹximyhỹre wesemy. Egito dee aõbinamy rekoarenykre kia iòlò rurutere rihurenykre. ¹¹ Egito iòlò reburetyhymy ratxikre, kia ròhònykre tasodadureny-wana kiata Sírio dee aõbinamy rekoarenykre, kia rexiwahinyrenykre egipcio mahãdu-ò. ¹² Egito iòlò rexityhytyhynymy ratxikre kia Siria ijoi mahãdu rihurenyreki kia rirubunyrenyreki sõemy isodadureny. Ka iruterenareny tahe urihimyòlemy bede idi rỹikre. ¹³ Irahudita Siria iòlò ributunykre tasodadu debònareny ijõdimy Egito dee woumy rekoarenykremy. ¹⁴ Tai sõemy iny mahãdu reburerenykre Egito iòlò òludumy. Ikyrenyki hãbu debure mahãdureny ijõdikre Israel su-ki; tii boho rexiwojeijeirenykre, rasimy tuu robirenyre rityhynyrenykre, kia tahe rabòdurenykre. ¹⁵ Siria iòlò kanakre tasodadureny sõe-di, kiata riwinyrenykre ryy idi rawounyrenykremy kia hãwãrawòmy roimyhỹre adobo uhuari weruramy, kia tahe tuu rahãỹnanyrenykre. Kia egipcio sodadu mahãdu tyhytyhyreny rikokrorenyke aõkõre Siria sodadu mahãdu wounareny. ¹⁶ Iòludu mahãdureny ibutumy riwinyrenykre aõnaõnamy ixideewirenymy egipcio sodadureny-di, kia inyõ ihoõhyyrenykre riemy ratxirenykemy. Tii rariare Suu Rawahikremy roimyhỹre kiata ibutumy ixideereny rimyrenykre. ¹⁷ Taita Siria iòlò ritidikre ibutumy tasodadureny làmamy rawounyrenykremy resurenymy Egito òludumy. Kia ribòdunyrenykremy taòludureny, kia tii riwinykre rybe ywidỹỹna wooxina Egito iòlò-wana kia tamy riwahinykre tariòre iki-wana hãwyymy roikremy. Kia tahe awimy aõkõ ratxirenykre. ¹⁸ Tai tii aõbinamy reakre hãwãhãwãBero nihikỹ Mediterrâne weijàtimy rỹimyhỹrenyre kiata ijõ mahãduõ ixidee rimyrenykre. Ka hãwãwitxira sodadu wedu tahe rihukre iixityhytyhydỹỹna-di kiata riixỹrudỹỹnykre. ¹⁹ Siria iòlo roosekre tahãwareny òbiti ruruterehekỹ rihukremy, kia tahe iruru rexihumy kia rurukre; kia tiu ixyby ini dee roholaõtyhy. ²⁰ Kia isỹtybymy iwitxira iòlò riwedunykre, kia teòdu mahãdu sodadu riteònykre suu òwy riemy riarikremy iiòlòna raityhynykremy. Kia iòhòtyhylemy irahudi kaa iòlò rurukre, kia tahe wounaki aõkõ tuu rutỹỹnykre. ²¹ Siria iòlò heka hãbu ibinahãkỹ tuu ratxikre, kia iòlò-my ratxikemy aõkõhyyre; ka tii tahe tarayky binahãkỹ-di riwahinymy rarekre kiata bòdỹỹmy ruruterehekỹ ixidee rimymy rarekre. ²² Tii rahãỹnanykre ibutumy taòludu mahãdu sodadu kiata rirubunykre Deuxu Rybe-di Ijohodu Nihikỹ. ²³ Ribònyrenykre tii-wana rybe widee riywinyrenyre kia tasodadu ibutekre hãrele tii ixyby iruruterehekỹmy rexisỹnykre. ²⁴ kia itỹỹkresylemy hãwahãkỹ iaõdimy ityhymy ratxire rihukre tai tahe aõnaõna binabinahãkỹ riwinykre, kia ihỹỹnareny tiu tuu riwinyrenyõre. Tasodadureny-wana riwirarearenykre aõnatyhynareny, aõnaõna kia aõnaõna iòwyhykỹmy rỹimyhỹre debowo-ò reserenykre. Kia urihimyòtyhylemy tii bede riywinykre hãwahãkỹ ruruterehekỹ rihukremy. ²⁵ Taruruterehekỹmy rexityhynymy kia tabrebuteremy, tii rariamy rakre tasodadureny sõehekỹ-di Egito iòlò òludumy. Kaa tii ròhònykre woumy tasodadu sõehekỹ-di kia taruruterehekỹ-di, kia tahe ròtaõhyykre, kiemy dori rabòdỹỹre ²⁶ itohodỹỹdureny òbitile bede binabina-ò ridyrenykre. Kia isodadureny rabòdurenykre, kia sõemy isodadureny rururenykre. ²⁷ Taita iny inatxi iòlò boho witxi rekoarenykre kiata wikoreny roilemy relyyrenykre, iny sohoji sohoji wii riatyrenykemy widi risỹnyrenykre. Ka iny inatxi boho tahe aõ tai ritarenyõhyyrenykre, kiemy dori tamy bede raòbitimy rỹire-ò rehemynyõre. ²⁸ Irahudita Siria iòlò roosekre tahãwa-ò, ibutumy riwymy taityhynana kia wouna bede-ki rimyre wahe. Kia bede riywinykre rahukremy Israel iny mahãdu Deuxu tyhydỹỹnareny-di, kiata iòludurenymy aõ ixideewimy riwinykre. Irahudita roosekre tahãwa-ò. ²⁹ Kia bede tuu raywimy roimyhỹre-ò bede rehemynykreu, tii ixybyle rariakre tasodadureny-wana Egito òludumy, ka bedeu tahe ròtaõhyykre, iwese komy ròtare wesemy. ³⁰ Romano mahãdu sodadu bera heòty nihikỹ-di ydòidenykre kiata tamy aõbinamy rekoarenykre. Tõhõti rawerywerynymy, tii ijesu-ribi ixawikre kiata sõemy reburerenymy ixybyle Israel iny mahãdu-ò aõbinamy reakre, kia ixideewimy aõbo tamyreny riwinykre. Kawese bedeu tahe tii judeu mahãdu dohodỹỹna heki ratxikre kia riatyrenyre iDeuxu tyhydỹỹnanareny. ³¹ Isodadureny risurisunyrenykre iDeuxureny heto rybe-ò ijohona, kia xiwena txuu iyhyõmy rỹimyhỹre rihurenykre kia Deuxu rybena heto-ò ritidirenykre “bede binahãkỹ”. ³² Kia bòdỹỹmy, iòlò wiòhenadỹỹ rimyre judeu mahãdu-ribi kia taDeuxu tyhydỹỹnareny riatyrenyre; ka kua boho Deuxu-my rerinanymyhỹrenyre ixi wesehyy òbitimy ratxirenykre kiata iòlò riatyrenykre. ³³ rururenykre yda heòty-di, yda rateòdỹỹrenykre hãwahãkỹ-ribi irehemy brejudureny wesemy, yda ibutumy iaõnaõnareny rexihurenykre. ³⁴ Ka aõhỹỹmy rutỹỹnymy ratxirenymy roirekre bedeu Deuxu iny mahãdu rimyrenykre iny witxira mahãdureny wiòhenadỹỹ; ka sõemy riwiòhenanyrenykre ixideewirenytyhy ribirenyle. ³⁵ Dohodỹỹdu bedeery mahãdurenyõ rururenykre, kia heka Deuxu ijoi mahãdu tai rexisusunyrenykremy awityhymy ratxirenykremy. Kia heka tuu bede rỹikre ihyy ionana-ò bede rehemynykre, Deuxu tuu bede riywinyre-ò. ³⁶ Siria iòlò riwinykre aõ ixideewimy. Tii heka ixiwedetyhymy ratxikre, kia rõhõtinykre ibutumy ỹnyxiwe mahãdureny ratyre ratxiremy kia rarybekre aõnaõna binabinahãkỹmy Deuxu ỹnyxiwe mahãdu wedureny òludumy. Tii tuu ibutumy riwinykre ihyyta Deuxu rirarytxynykre; kiemy dori Deuxu rirarytxynykre, tuu bede riywinyre wesemy. ³⁷ Kaa iòlò rarinanyõkre ỹnyxiwe mahãdumy kia ihỹỹnareny tuu rerinanymy roirenyremyhỹ, kia ỹnyxiwe boho hãwyy mahãdu tuu rekoamyhỹrenyre, kia iwitxira ỹnyxiwe mahãdu rityhynyke aõkõre, kiemy dori tii rityhynykre ỹnyxiwe boho ratyrerenykre ratximyhỹre rityhynykre. ³⁸ Ka tii tahe reriananykre ruruterena itxesedu ỹnyxiwe. Kaa ỹnyxiwe, ihỹỹnareny mahãdu rieryrenyõrenyre, kaa iòlò tuu raubenymy riwahinykre mana rỹsỹhỹkỹ, mana rỹrỹ òtaòta, mana wiwihikỹ kia aõnaõna witxira iòwyhykỹmy rỹimyhỹre. ³⁹ Kia iny mahãdu wiòhedỹỹna-di kia rityhynymyhỹrenyre iwitxira suludu mahãdu ỹnyxiwe, tii riijewikre taruruterehỹ. Kia ibutumy tamy reòbyrenyre iòlò-my kia tuu rawowydyrenykre, wedu rariehekỹmy runyrenykre kia suu rimyrenykre. ⁴⁰ Kia bede konana bede-ò rehemynykreu, Egito iòlò aõbinamy reakre Siria iòlò dee, kia tii tahe ròhònykre tii-wana witxi reakremy ibutumy tebòna ruruterena-di, kiahe, ityti heòty wouna, awaru-di wounareny kia sõemy bera heòty nihikỹ. Kia iwese beòra tỹxi ramyhỹre wesemy, isodadureny tamy rekoarenykre Egito dee. ⁴¹ Tii aõbinamy realekre Suu Rawahikremy roimyhỹre dee kiata rahukre milhares milhares iny sõemy; ka Edom ijoi mahãdu tahe rahenyrenykre kia Moabe ijoi rahenyrenykre kia Amom ijoi mahãdu sõehekỹmy rahenyrenykre. ⁴² Isodadureny sõemy hãwã hãwã bede bedemy roberarenykre; kia Egito rahenykre hãrele. ⁴³ Egito-ribi riwyrenykre mana rỹsỹhỹkỹ kia mana rỹsỹ òtaòta kia aõnaõna iòwyhykỹmy rỹimyhỹre. Kia rimylekre Libia kia Etiopia. ⁴⁴ Kia tahe ijyy edehemynykre txuòlòna weribi kia iraru weribi, kia sõemy brebu-di ritỹxinykre. Kia tii teburehekỹmy ròhònykre tasodadureny-wana, rexiywinyrenymy sõemy iny rirubunyrenykremy. ⁴⁵ Tabreòreny riderenykre Mediterrâneo Bero nihikỹ bede-ki kia hãwalò ruxerahãkỹ, Kia tahe rurukre kia inyõ rihedỹỹnyke ihoõre.