¹ Inataõ wyramy Belsazar iòlò-my bede riere bedeu, diarỹ iwitxiramy rarasinyre. ² Diarỹ Ulai bero weijàti-ki wesehe watximyhỹ, Susã-ki, kia hãwãrauhuarimy roimyhỹre adobo-di raweti-my, kia Elaõ bedeki roimyhỹre. ³ Isitere-ribile rabire bero bireki budoeni sohoji-my, kia iòdese inatximy itirehehekỹmy. Ijõ heka duhunymy nade ijõ hewo-my, kia tii tahe itirehetyhyre. ⁴ Budoeni heka taò-di alojymy reamyhỹ ibràra weribi-ò, iraru weribi-ò kia ibòò weribi-ò, kia iròduõ yda inyõ rỹike aõkõhyyre yda rahenyke aõkõre iò lojyna-ribi. Tii ixideewimy aõ riwinymyhỹ kiata ihyy ixyby iruruterehekỹmy ratxire. ⁵ Diarỹ idi rahõtinymy watximyhỹ kia rabireu bodi sohoji-my ibràra-ribi nade-my, tarurumyhe deamy nade, kia iwaube su-ò rỹiõhyylemy deamy nade. Tii heka iò sohojihyyre inihikỹmy, iòru tyaki rỹimyhỹre. ⁶ Kia reamy nade tikibo budoeni ratximyhỹ bede-ò, kia diarỹ tuu rabire bero bireki kiata tamy aõbinamy reare ibutumy tarurutere-di. ⁷ Diarỹ rabire bodi-my, teburetyhymy ratximyhỹ, budoeni dee aõbinamy reare kia iò inatxi rikrore, kiemy dori budoeni iruru ihoõre timy rexiijekemy. Bodi rehure budoeni-di su-ò kiata tawa-di ityre rariamyhỹ, kia inyõ heka rihedỹỹnyke aõkõre budoeni bodi debure kyarahãkỹ-ribi. ⁸ Tii ihãremy iruruterehekỹmy ratxire, kia iruruterehekỹ ikonana-ò rehemynyreu, iòdese rakrore, kia teròwymy ruhunyrenyre inaubiòwa iòdese sõe itirehetirehehekỹmy, kia ratirehenymy rare iraru weribi-ò, ibòò weribi-ò, beàra weribi-ò kia ibràra weribi-ò. ⁹ Kaa iòdese tireheõ-ribi sohoji iòdeseõ ruhunymy rare iyjamy, kia raumynymy rare kia ibòò weribi bede, txuòlòna weribi bede kia Suu Rawahikemy roimyhỹre bedeòhòkỹle ranihikỹmy rare. ¹⁰ Inihikỹmy raumynyre, kiata biu-my sodadu mahãdu rỹimyhỹrenyre deehekỹ rehemynyre, taina mahãdu; kia ijõ mahãduõ-di su-ò dehude kiata ityre tawa-di rariamyhỹ. ¹¹ Kia tahe ka mahãdu sodadu wedu òludumy resure. Kia rahure xiwena ixyby ixyby txu-my rawahimyhỹre kaa sodadu wedureny dee, kia heto Deuxu rybe-ò ijohona ribinabinanyre. ¹² Xiwena ixyby ixyby txu-my relemyhỹre-ribi, kia xiwena binahãkỹle rawahire. Tii heka rahure tyhydỹỹna tyhytyhykỹ, kia ibutumy aõbo riwinyre òbitihyymy ròhònyre. ¹³ Irahudi raholare inatxi anju boho rarybemyhỹreny, ijõ rỹỹraxire tabiòwa dee: — Tiwese bedeubo tahe tuu bede riekre kuamy rabire? Tiwese bedeubo tahe xiwena binahãkỹ rawahimy rarekre kia xiwena ixyby ixyby txuu iyhyõmy rỹimyhỹre deròwymy? Tiwese bedeubo tahe Deuxu rybe-ò ijohona heto ibinamy rỹimy rarekre kia rabòdurenymy biu ludu mahãdu sodadu? ¹⁴ Kiata raholare irawyòna-ò: — Kia rexihukre mili 150 txu sỹtybymy, kawese bedeu rawahiõhyykre xiwena txioromy kia rudiu rawahimyhỹre. Irahudi tahe Deuxu rybena-ò ijohona heto rexiywinykre tyratyramy. ¹⁵ Diarỹ arierykemy watximyhỹ aõmybo rabire, kia wako-ribi rỹimy deade inyõ hãbu wesemy. ¹⁶ Kiata iny rybe-ò raholare Ulai bero bede-ribi rarybemy kia rirajuare myỹ: — Gabrieli, biòbitinyke rasi rybe kaa hãbu dee. ¹⁷ Tai Gabrieli waribetyhy-ò rehemynyre, kia tahe sõemy riwabrebunyre. Diarỹ watiòhumy resere kiata su-ò waòsỹny retidire. Kia tii wadee rarybere: — Kai hãbu rubudu, bierykemy atxiteri rasimy tarasinyte, kia tii heka bededỹỹnana konanamy rarybere. ¹⁸ Tii wadee rarybemy rỹimyhỹ iu wanohõrti rabrere kiata wawomy resere su-ò. Ka tii tahe riwamyre, kia làmamy riwatàmadỹỹnyre ¹⁹ kia rarybere: — Diarỹ ako arelyykre aõhebo bede rutỹỹnykre tiubo Deuxu kyarahãkỹ rỹikre bedeu, kia kamy tarasinymy tabite heka tuu raywimy roimyhỹre bede konana rỹikremy. ²⁰ Budoeni-my inatxi iòdesemy kai tabite, kia heka tuu rikeitxenyre iòlò Média kia iòlò Persia. ²¹ Bodi tahe iòlò Grécia rare, kia iòdese nihikỹ heka komy iòlò runykre rare kaa hãwahãkỹ-ki. ²² Inaubiòwa-my sõe bodi òdese ruhunyre kia iòdese kodelemy rakrore-ribi, kia heka inaubiòwa iòlò iòlò rawirareakre, ka iòlò iòlò boho tahe irurutererenyõrenykre kodelemy iòlò runyre wesemy. ²³ Kia kaa iòlò mahãdu ikonanareny iòhòrenykreu, kia iaõbinabinareny ikonana-ò rehemynyre, kia iòlò binahãkỹõ runykre kia bòdỹỹdutyhytyhykỹ. ²⁴ Tii ixyby iruruteretyhymy ratxikre, kia tahe taruru òbitidi aõkõ tuu ratxikre. Bede ixihuduna binahãkỹ riwinykre, iny mahãdu ibedeery rurutere mahãdu rihurenykre kia Deuxu ijoi mahãdu tule.Kia ixideewimy aõbo riwinykre ikiemy rarekremy. ²⁵ Kia taumy-di rariamy ratximyhỹre-di ibutumy iny mahãdu ribònykre; kia rexityhytyhynyhyymy ratxikre kia sõemy iny rirubunykre ribònyrenymy. Ikonanau tahe tii Deuxu-wana resukre, Iòlò mahãdu wedu, ka tii tahe rurukre iny rurutere tamy rauhemy aõkõ. ²⁶ Kia Gabrieli rihure myỹ: — Kai taholate òbitityhymy xiwena txioromy kia xiwena rudimy rỹimyhỹre òbitina-ò. Ka uritreta inyõ dee tu rybeõmykre rasimy tarasinytemy, kiemy dori sõemy irehetyhymy raroorehenykre tuu rutỹỹnykre. ²⁷ Diarỹ Danieli, sõemy txuu bede reijere rabereberemy wawebinadumy. Irahudita awimy relere kiata waõmysỹdỹỹna-di raõmysỹỹnyre. Kia ihãremy sõemy rahõtiyremy raremyhỹ warasimy, kiemy dori reeryõhyymy idi raremyhỹ.