¹ Rumy, wyra sohoji rimyreu Belsazar Babilonia iòlòmy, ibedeu Danieli herimy rexilidire taherina tyreki kiata rarasinyre kiata tarasiwoki aõnaõnamy robire. Kia rexixareu, tii rityyritinyre aõmybo rarasinyre. ² -Kaa tii roire aõbo tii riritinyre: Kia rarasinyre kua rumy, diarỹ rabire yhy rebonymyhỹ ibutumy bede bede-ribi kiata bero nihikỹ riybòybònymy. ³ -Kia isitere-ribile ròhònyrenymy rekoarenyre, inaubiòwamy aõninihikỹ bero nihikỹwo-ribi, kia wiribi wiribi iwitxirarenymy. ⁴ -Komy ròhònyre liaõ wesemy, kia tahe tee ijõdire nawiihikỹ wesemy. Diarỹ retehemyhỹ wana-wana, tee rasihesiherenyre. Kiata tii làmamy ratàmadỹỹre, kia hãbu wesemy rariakremy. Kiata tamy rawahire iny rayky. ⁵ Kia ihewo ludu tahe urso wesemyre. Tii rexitàmadỹỹnyre iwa hewotxi kiata taryki inataõmy iròdu witxi-di rimymy rỹimyhỹ. Kia rybe wodỹỹ rarybemy: “Make kiata sõemy iròdude birokre.” ⁶ Irahudita inataõna aõnimy rabire, kia tahe hãlòe wesemy tuu rabire. Tii inaubiòwamy irati ijõdire kia ibròkita inaubiòwamy teratyti ijõdire, nawii deratyti wesemy. Kaa iròdu dee wedu nihikỹmy riwedunykremy tamy rawahire. ⁷ Inaubiòwana aõnimy rabire kia heka aõnityhyre, ibrebunahãkỹmy kia irurutere nihikỹmy. Kia womatimy txu ninihikỹ kia idi tahe riyreyrenymy kia riròmyhỹ teery; Teery rohenymyhỹre tawa-di tai rararunymyhỹre. Kaa aõni heka iwitxirare inataõ mahãdu-ribi kia debòituemy iòdese sõe. ⁸ -Diarỹ retehemy watximyhỹ ywimy iòdesedese-di kia reerywire iòdese iyja, kia wiribi wiribile ruhunyre.Inataõ iòdese rasihere kia iòdese yja tamy rỹikremy, kia heka irue ijõdire, iny rue wesemy, kiata tary-di rarybemyhỹ sõemy rexityhytyhynymy. ⁹ Kia retehehyymy watximyhỹ kia rabire rynana bede-ò rasỹnyrenyremy. Ijõ heka rasỹdỹỹre kua ikiehyymy ratximyhỹre-ò. Ityy heka iurahyyre bede nonoe urahãkỹ wese, kia iradereny tahe iurahyyrenyre budoeni sira wese. Irynana kia idi rirana tahe heòty looso rade wesemyre, ¹⁰ kia ikoki irynana rỹimyhỹre bedeki ròhònymyhỹ bero heòty. Kia kuaki mil-my iny mahãdu sõe rerinanymy rỹimyhỹreny kua rỹmy runymyhỹmy, kia milhaõ-my sõe làmamy rỹimyhỹre ikoki. Kiata rybe ròrarunyre mobo rahenykremy, mobo hãluu-txi idi dehu rỹikremy, kiata tyyriti rarayrenyre. ¹¹ Retehelemy watximyhỹ, kia iròdu òdese yja rarybehyymy ratximyhỹ rexityhytyhynymy. Kia rabire tiubo inaubiòwa aõni rururemy; kia iumy rayreyremy heòtyru-txi idi dehu rỹire. ¹² Kia ijõ mahãdu aõniaõni tahe irurutereny iribireny ratarenyre, kiata rururenyõhyyrenyre; kia ixyby urihimyòmy irumy ratxirenykremy tamyreny bede rawahire. ¹³ Rarasinymyhỹule rabire, aõnimy hãbu wesemy, kia biuwetyyura-ribi rade. Tii rare kua ikiemy ratximyhỹre bede-ò kiata tamy rateòsidỹỹre. ¹⁴ Tamy bedeery nihikỹ riwahinyrenyre, wowydyna kia iòlò wedu rariehekỹmy ratxikremy, kia ibutumy iny mahãdu hãwãhãwãbede bede-di ròrenykremy. Ibedeeryhykỹ heka ikiehyymy ijõdire, kia iiòlòna wedu tahe ikonana ijõõre. ¹⁵ Warasi riwabrebunyre, kia diarỹ rahõtiyrere aõmybo rabire. ¹⁶ Kia ityy-ò rehemynyre kuaki rỹimyhỹrenyõ dee kia tamy rexitòenyre wadee riòbitinykemy aõbomy diarỹ rabiremy. Taita tii riòbitinyre kawesemy: ¹⁷ Inaubiòwa aõni ninihikỹ heka inaubiòwa iòlò sõe rare kia bede bede riwedunyrenykre. ¹⁸ Ka iòlò riwedunyrenyre tahe rawahikre Deuxu Rariehekỹ iny mahãdu deereny, kaa iny mahãdu tahe ikiemy riwedunyrenykre. ¹⁹ Diarỹ arierykelemyreri inaubiòwa aõniaõni òbitidỹỹna, kia iwitxirare inataõ-ribi, kia heka aõnityhyre kia txuu womatimy jure kia texià tahe womati deòsa rare, kia riyreyrenymy teery riròmyhỹre, kia teery rohenymyhỹre tawa-di risurusurunymyhỹre. ²⁰ Kia rexitòenylere wadee riòbitinykemy debòituemy iròduò sõe kia iròdu rati-ki ijõdire kia ijõ òdese raumynyre ririòwydỹỹnyre inataõ òdese; kaa iròdu òdese heka iruruteretyhyre iwitxira mahãdu-ribi, irue ijõdire kia iry rarybemyhỹ sõemy rexityhytyhynymy. ²¹ Diarỹ retehemyhỹ wana-wana, kaa iròdu òdese resure Deuxu iny mahãdu òludumy kiata rahãỹnanymy ratximyhỹreny, ²² ihyyta dehemynyde kua ikiehyymy ratximyhỹre. Tii resure Deuxu Rariehekỹ iny mahãdu weribireny, kiemy dori tamy bede rehemynyre kaa iny mahãdu riwedunyrenykremy. ²³ Kaa heka iòbitidỹỹna reeryre: — Inaubiòwana aõni heka sohoji iòlò rare, iiòlòna wedu tahe iwitxiratyhyre ijõ mahãdu-ribi. Tii ibutumy bede bede rimykre, rihukre ibutumy hãwãhãwãkia ribinabinanyrenykre. ²⁴ Debòitue iròdu òdese heka debòitue iòlò sõe rare kaa bede bede riwedunyrenykre. Irahudi tahe ijõdikre iòlòõ kia tahe iwitxirakre kodele mahãdu-ribi; tii ribòdunykre inataõ iòlò. ²⁵ Tii rarybekre Deuxu òludumy kiata Deuxu Rariehekỹ ijoi mahãdu hewomy reakre. Kia Deuxu rybe wahidỹỹna riwiurònykemy risỹnykre kia tiubo Deuxu alisina rỹimyhỹre bede. Deuxu ijoi mahãdu debowoki ratxirenykre inataõ wyra weeremy. ²⁶ Kia irahudita wedu nihikỹ brejuna-ò riròtenykre, kawesemy tahe tii iiòlòuna iribi ixawikre, kia iruruterehekỹ ikiemy ixawikre. ²⁷ Ka wedu wedu iruruteremy iaõwihikỹ rawahikre Deuxu Rariehekỹ ijoireny deereny, kia tii boho bede bede ibutumy riwedunymyrenymy roirenyrekre ikiemy; kia ibutumy iwitxira iny mahãdu tamy raõmysỹỹnymy roirekre, kia ibutumy rityhynymy roirenyrekre. ²⁸ Kaki rexihura iòbitid:yỹna. Diarỹ sõemy rahõtiyremy watxire warayky-di, waòsỹny rỹrenymy resere. Ka diarỹ tahe inyõ dee aõmy rarybeõhyyre.