3
افتخاراتِ انسانی یَ اِتکا نوکونید
1
موردِ دیگر اَنکی ای برأرأن، هر وضعیتی میَأن ایسَأئید در خداوند شاد بیبید. مرِه زحمتی نیه کی هی اَ مطالبَ تکرار بوکونم، ولی به نفعِ شومَأنه کی بارها اوشَأنَ بیشتَأوید.
2
اون سگانَ نزدیکَ نیبید، شیطانِ عواملِ مرَه کاری ندَأرید، کسانی جَه کی گوید نجاتِ رِه وَأستی ختنه بوستَأن دوری بوکونید.
3
چون ختنه بوبُسته یانِ واقعی اَمَأنیم کی روحِ اَمرَه خدایَ پرستش کونیم، و مسیحِ عیسی یَ افتخار کونیم و خودمانِ افتخاراتِ انسانی یَ تکیه نوکونیم.
4
من خودم افتخار کودَأنِ رِه خیلی چیزأن دَأرم.
بله، اگر کسی خیال کونه اَجور چیزانَ، و خو اَصل و نصبَ تَأنه افتخار بوکونه، می دلایل کی مُحکمتره.
5
من هشتمین روز بعدِ می تولّد ختنه بوبُستم، ایتَه خانواده اسرائیلی جَه، جی بنیامینِ قبیله یم و ایتَه عِبرانی اَصیلم، از لحاظِ اِجرایِ شریعتْ هم، فریسی یم،
6
به حدی دینِ یهودِ رِه غِیرت دَأشتم کی کلیسایَ آزار رسَأنِه ئِم، مُطابقِ شریعتْ، من ایتَه مردِ بی عیب مَحسوب بوستم.
7
ولی هَسَه همۀ اَ اِمتیازانَ کی روزگاری مرِه خیلی بااَرزش بود، مسیحِ وَسی فیشَأده دَأرم، تا بتَأنم می ایمان و اُمیدَ مسیحِ رو بنم.
8
بله، همه چیز در برابرِ عیسی مسیحِ خداوندِ شناختْ، بی اَرزشه و من همه یَ ضرر دَأنم، پس من همه چیَه یَ اونِ وَسی کنار بنَم، من اوشَأنَ آشغال دَأنم و در عَوض مسیحَ بدس اَورم،
9
و کاملاً مسیحِ اَمرَه مُتحد بؤم، و نه خودمِ پارسایی مرَه که بواسطۀ انجامِ مراسمِ مذهبی بدس اَیه، بلکی اون پارسایی مرَه کی جی راهِ ایمانِ به مسیح بدس اَیه، هون پارسایی ایی کی خدا طرف جَه یه و بر پایۀ ایمان اُستواره.
10
خَأیم مسیحْ و اون نیرویی کی اونَ ویرزَأنی یَ بشناسم، من خَأیم اونِ رنجانِ دورون شریک بوبوم و اونِ مرگِ دورون هم اونِ همشکل بوبوم.
11
تا هر جوری کی بوبوسته، قیامتِ رِه زنده بوبوم و بتَأنم زندگی جدیدی بدس بأورم.
تلاش تا خطِ پایان
12
می منظور اَن نییه کی اَشَأنَ بدس بأورده دَأرم یا کاملَ بوستم، بلکی خودمَ جولو بورم تا چیزی یَ بدس بأورم کی مسیحْ، مرِه در نظر دَأره، و هَنه وَسی بو کی مرَه نجات بده.
13
ای برأرأن، گومان نوکونم کی هنوز بدس بأورده بِم، اما ایتَه کار کونم، و اونْ اَنه کی گوذشته یَ جی خاطر بورم و فقط خودمَ رو به اونچی کی پِشِ جَه نَهه به جولو فَأکشم.
14
و تلاش کونم کی خطِ پایانَ فَأرسم تا اون جایزه یَ بدس بأورم، جایزه ایی کی خدا خَأیه بواسطۀ عیسی مسیح مرَه فَأده و هونِ وَسی مرَه رو به آسمان دخَأده دَأره.
15
همۀ اَمَأن کی مسیحیانِ بالغی ایسیم وَأستی اَطو فکر بوکونیم، و اگر در موردِ موضوعِ دیگری جورِ دیگر فکر کونید، خدا اونَ هم شمرِه آشکارَ کونه.
16
مهم اَنه، هر مرحله ایی یَ کی فَأرسه دَأریم، طبقِ اون رفتار بوکونیم.
17
ای برأرأن، همه تَه می جَه سرمشق بیگیرید و کسانی یَ فَأندرید کی مُطابقِ اَمی اُلگو رفتار کوند.
18
چون هوطویی کی بارها شمرَه بوگوفته دَأرم، هَسَه هم هَطو کی می اَشک فووَأستَأن دره دوباره شمره تکرار کونم. ایسَد کسانی کی گوید «اَمَأن مسیحی ایم!»، ولی در واقع اوشَأنْ مسیح صلیبِ دوشمند،
19
اَجور آدمانِ آخر عاقبت، هلاکته. اوشَأنِ خدا اوشَأنِ شکمه، و چیزهایی یَ افتخار کوند کی باعثِ ننگ و رُسواییه، و اوشَأنِ اَفکار فقط چیزهای دونیایی یَ مشغوله.
20
ولی اَمَأنْ کشورِ آسمانی تابعیتَ دَأریم و اشتیاقِ تمامِ اَمرَه انتظار کشیم تا اَمی نجات دهنده، یعنی اَمی خداوند عیسی مسیح، اویِ جَه ظهور بوکونه.
21
اون نیرویی مرَه کی اونَ قادر کونه همه چیَه خو فرمان بیرون بأوره، اَمی حقیر و فاسد بوستَأنی بدنَ تبدیل کونه تا اونِ پورجلالِ بدنِ شبیه بیبه.