4

¹ پس ای می عزیزِ برأرأن کی شیمی دِئِنِ رِه مُشتاقم، ای شومَأنی کی می شادی و می سرِ تاجید، ای عزیزان، هَطو شیمی اتحادَ خداوندِ مرَه حفظ بوکونید و وفادار بمَأنید.

² خَأخور «اِفُودیه» و خأخور «سینتیخی» جَه تمنا دَأرم کی همدیگرِ اَمرَه سازش بوکوند و خداوندِ کمکِ اَمرَه هَمنظر بوبود. ³ و ای همکارِ صمیمی و ای «سیزیگوسِ» وفادار، تی جَه تقاضا دَأرم کی اَن دو تَه خأخورَ کمک بوکونی تا خوشَأنِ اختلافانَ کنار بند. چون اَشَأن می اَمرَه دوش به دوش اِنجیلِ انتشارِ رِه تلاش بوکودد، و نه فقط می اَمرَه، بلکی «آکلیمنتوسِ» اَمرَه و باقی برأرأنِ اَمرَه کی اوشأنِ نامْ دفترِ حیاتِ دورون ثبته، همکاری بوکوده دَأرد. ⁴ همیشه خداوندِ دورون شاد بیبید، بازم گویم شاد بیبید! ⁵ وألید شیمی مُلایمت مردمِ رِه آشکارَ بِه، بخاطر بدَأرید خداوند بزودی وَأگرده. ⁶ هیچ چیزِ رِه غُصه نوخورید، بلکی همیشه دعا و مُناجات بوکونید، و شُکرگزاری اَمرَه خودتانِ درخواستَ خدا حضورْ عَرض بوکونید. ⁷ اَطو آرامشِ الهی کی ویشتر جی آدمی عقل و فَهمه، شیمی دیل و فکرَ، مسیحِ عیسی دورون حفظ کونه. ⁸ خلاصه ای برأرأن، هر چی راسته، هر چی عالیه، هر چی دوروسته، هر چی پاکه، هر چی دوست داشتنیه، و هر چی قابلِ سِتایشه دربارۀ اوشَأن فکر بوکونید. ⁹ اونچی کی می جَه یاد بیگیفته اید و قبول بوکودید، و اونچی کی می جَه بیشتَأوسته اید یا بیده اید، هونَ عمل بوکونید، تا خدایی کی سرچشمۀ آرامشه شیمی اَمرَه بیبه.

تشکر هدایا وَسی

¹⁰ چقدر خوشحالَ بوستم و خدایَ شُکر کونم کی ایبار دیگر به فکر من دکفتید، و خَأئید مرَه کمک بوکونید و می اِحتیاجاتَ برطرف بوکونید، دَأنم کی همیشه بفکر من بوئید ولی فرصت پیش نَأمویه. ¹¹ البته می منظور اَن نییه کی اِحتیاج دَأشتم، نه، چون یاد بیگیفتم هر وضعیتی دورون کی ایسَم قناعت بوکونم. ¹² من دَأنم چوطو وَأستی فقرِ دورون، یا وفورِ نعمتِ دورون زندگی بوکونم، هر شرایطی دورون قناعت کودَأنَ یاد بیگیفته دَأرم، چی سِئر بوبوم چی ویشتا، چی زیاد بدَأرم چی کم. ¹³ هر چیزِ قدرتَ دَأرم کی انجام بدم، بواسطۀ مسیحْ کی مرَه تقویت کونه. ¹⁴ در هر حال لطف بوکودید کی می مشکلاتِ دورون می مرَه شریک بوبُستید. ¹⁵ شومَأن فیلیپی مسیحیان خُب دَأنید کی وختی اولین بارِ رِه اِنجیلِ پیغامَ شمرَه اِعلام بوکودم و بازن مقدونیه جَه بوشوم، فقط شومَأن می دخل و خرجِ دورون می مرَه همکاری بوکودید و هیچ کلیسایِ دیگری اَن کارِ دورون شریک نوبوست. ¹⁶ حتی وختی تسالونیکی میَأن ایسَه بؤم، می رفعِ اِحتیاجاتِ رِه چن بار مبلغی اوسه کودید. ¹⁷ نه اینکی فکر بوکونید هدیه فأگیفتنِ دونبال ایسم، بلکی خَأیم شیمی نیکوکاری حیساب زیادَه بِه و شیمی پاداش افزوده بیبه. ¹⁸ شیمی هدایا می دس فَأرسه و هَسَه همه چی دَأرم، حتی ویشتر جی می نیاز دَأرم، من غرقِ اون هدایایی ایسم کی «اِپافْرودیتوسِ» دسْ فَأدَأئید تا مرَه فأرسَأنه، شیمی هدایا، عَطرِ خوشبو و قربانی مقبولی ایسه کی خدایَ خوشنود کونه. ¹⁹ و می خدا، همۀ شیمی اِحتیاجاتَ رفع کونه، بواسطۀ ثروتِ عظیمی کی مسیحِ عیسی جلالِ دورون نَهه. ²⁰ جلال بر اَمی پئر و اَمی خدا، تا اَبدالآباد، آمین.

سلامهای آخر

²¹ همۀ مُقدسینی کی مسیحِ عیسی یَ تَعلق دَأردَه سلام برسَأنید. برأرأنی کی می مرَه ایسَأد شمره سلام رسَأند. ²² اَیَ مسیحیانْ همه تَه شمرِه سلام رسَأند، مخصوصاً اوشَأنی کی قِیصرِ دربارِ جَه کار کوند. ²³ خداوند عیسای مسیحِ فیضْ شیمی اَمرَه بیبه، آمین. آمین