2

¹ پس اگر مسیح مُتحد بوستَأنِ جَه دیلگرمید، اگر اونِ مُحبت شیمی دیلِ قوّته، اگر روح القدسِ اَمرَه شراکت دَأرید، اگر رَحمْ دَأرید و شیمی دیل سوجِه، ² پس بَأئید می خوشی یَ کاملَ کونید و همدیگرَ مُحبت بوکونید و قلباً همدیگرِ اَمرَه توافق بدَأرید، و یک دیل و یک فکر بیبید. ³ خودخواه نیبید و جی رویِ چشم و هَم چشمی کاری انجام ندید، فروتن بیبید و همیشه دیگرانَ خودتانِ جَه بهتر بدَأنید. ⁴ هر کودام جی شومَأن فقط خودشِ کار و زندگی فکر نیبه بلکی دیگرانِ فکرم بیبید. ⁵ شومَأن وَأستی هو طرزِ فکری یَ بدَأرید کی مسیحِ عیسی دَأشته. ⁶ اون کی خدا مرَه همذات بو، خدا برابر بودنِ جَه بنفعِ خودش استفاده نوکود، ⁷ بلکی خورَه همۀ مزایا جَه محروم بوکود، و غلامِ ذاتَ قبول بوکود و مردمانِ شبیه بوبُست، ⁸ وختی ایتَه آدمِ مَأنستَأن ظاهر بوبُست، خودشَ ویشتر جی اَن خوار بوکود، و تا مرگْ، اونم مرگ صلیبِ رو، اِطاعت بوکود. ⁹ هَنه وَسی خدا هم اونَ بینهایت سربلندَ کود، و نامی بوجُرتر جی همۀ نامان اونَ ببخشه. ¹⁰ تا عیسی نامِ اَمرَه هر زانویی چی آسمانِ میَأن، چی زمینِ رو چی زمینِ جیرْ خمَ بِه، ¹¹ و هر زبانی اِعتراف بوکونه کی عیسایِ مسیح، خداونده، تا خدایِ پئر جلال پیدا کونه.

ستاره یانِ مَأنستَأن درخشان

¹² پس ای عزیزان، هوطویی کی وختی شیمی ورجَه ایسَه بؤم، می دستورانِ جَه اِطاعت کودید، هَسَه کی شیمی جَه دورم، هو روشَ اِدامه بدید و حتی ویشتر جی قبل تلاش بوکونید تا شیمی اَعمالِ مرَه نشان بدید کی نجات پیدا کوده دَأرید، و ترس و لَرز اَمرَه خودتانِ نجاتَ به عمل بأورید. ¹³ چون خدایه کی خودشِ عملِ قدرتمندِ مرَه، هم تصمیمْ، و هم قدرتِ اَنجامِ اونچی کی اونَ خشنود کونه یَ شیمی دورون بوجود اَوره. ¹⁴ هر کاری یَ بدونِ غُرغُر زَئَن و شکایت اَنجام بدید ¹⁵ تا کسی نتَأنه شیمی جَه ایرادی بیگیره. شومَأن وَأستی اَ دونیایِ فاسدِ میَأن و اَ قؤمِ مُنحرف و گردنکشِ ورجَه، به عنوانِ خدا زَأکأنْ بی تقصیر، و کاملاً پاک و بی عیب بیبید، و ستاره یانِ مَأنستَأن اوشَأنِ میَأن درخشش بدَأرید. ¹⁶ و خدا کلامِ حیات بخشَ اوشَأنَ فَأرسَأنید، اونموقع وختی مسیح وَأگردست، تَأنم افتخار بوکونم کی هَچین نودووَسته دَأرم و هَچین زحمت نکشه دَأرم. ¹⁷ حتی اگر لازم بیبه شیمی ایمانِ حفظ کودَأنِ وَسی می خونَ فوکونم، اَ کارَ کونم و می جانَ ایتَه قربانی مَأنستَأن خدایَ تقدیم کونم، و حاضرم شیمی وَسی فدا بوبوم. من اَ کارَ شادی مرَه اَنجام دهم و شمرَه خودمِ شادی دورون شریک کونم. ¹⁸ و شومَأنم وَأستی می مَأنستَأن خوشحال بیبید و می اَمرَه شادی بوکونید.

تیموتائوس و اِپافرودیتوس

¹⁹ امیدوارم به خواست خداوند عیسی مسیح بزودی تیموتائوسَ اوسه کونم شیمی ورجَه تا وختی وَأگردست می ورجَه، مرَه شیمی حال و اَحوالِ جَه باخبرَ کونه تا می دیل شاد بیبه. ²⁰ چون کسِ دیگری یَ نَئرم کی می اِحساسَ درک بوکونه و اَطو خالصانه شیمی فکر بیبه. ²¹ چون دیگران همه خوشَأنِ مَنفعتِ فکرد نه عیسی مسیحِ خدمتِ فکر! ²² ولی شومَأن دَأنید کی تیموتائوس خو آزمایشَ پس بدَه دَأره، و جوری کی پسرْ خو پئرَ خدمت کونه اونم اِنجیلِ پیشرفتِ رِه مرَه خدمت بوکوده دَأره. ²³ پس امیدوارم هَطو کی می تکلیف روشنَ بوست، اونَ اوسه کونم شیمی ورجَه. ²⁴ و اطمینان دَأرم کی خداوندِ کمکِ اَمرَه خودمم بزودی اَیم شیمی ورجَه. ²⁵ راستی، لازم بدَأنستم اِپافْرودیتوسَ دوباره اوسه کونم شیمی ورجَه. شومَأن اونَ اوسه کوده بید تا هر وخت اِحتیاج بوبُست مرَه خدمت بوکونه، منُ اون دو تَه برأرِ مَأنستَأن دوش به دوش همدیگر کار بوکودیم و هَمْرَزم بوئیم. ²⁶ چون اونِ دیل شمرِه تنگ بوبُسته و جی اَنکی بیشتَأوسته بید کی اون مریض بو ناراحتَ بوسته. ²⁷ ولی واقعیت اَنه کی بدجوریم مریض بو و نزدیک بو بیمیره، ولی خدا اونَ رَحم بوکود، نه فقط اونَ، بلکی مرَه هم رَحم بوکود و وَأنَأشت کی غمی می غمانِ رو اِضافه بیبه. ²⁸ پس خَأیم هر چه سریعتر اونَ اوسه کونم شیمی ورجَه تا اونِ دِئِنِ جَه خوشحالَ بید و اَطو می غمم کمترَ بِه. ²⁹ پس اونَ براری مَأنستَأن خداوندِ دورون شادی تمامِ اَمرَه پذیرا بیبید، و اَجور افرادَ احترام بنید. ³⁰ چون مسیحِ خدمت کودَأن وَسی نزدیک بو بیمیره و بجایِ شومَأن هم کی می جَه دورید، مرَه خدمت بوکود و خو جانَ به خطر تأوَأده.