8

¹ وختی عیسی کوه جَه بیجیر بأمو، جمعیتِ زیادی اونِ دونبال راه دکفتد. ² اَ موقع، ایتَه جُذامی اونَ نزدیکَ بوستْ و اونِ پا جیر بکفت و بوگوفت:«ای آقا، اگر بخَأیی تَأنی مرَه پاکَ کونی.» ³ عیسی خو دسَ اونِ رو بنَه و بوگوفت:«البته کی خَأیم، پاکَ بون» و فوری اون مردْ خو جُذامِ جَه شفا پیدا کود. ⁴ اونموقع عیسی اونَ بوگوفت:«کسی یَ چیزی نوگو، بوشون کاهنِ ورجَه ترَه نیشان بدن و اون هدیه ایی کی موسی شریعت اَمر بوکوده تقدیم بوکون، تا اوشَأنِ رِه شهادتی بیبه کی شفا پیدا کوده ایی.» ⁵ وختی عیسی شهرِ کفرناحومَ بودورون بوشو ایتَه اَفسرِ رومی بأمو جولو و التماسِ اَمرَه اونَ بوگوفت: ⁶ «ای آقا، می غلام فلج بوبُسته و خانه دورون خوفته و درد کِشِه.» ⁷ عیسی اونَ بوگوفت:«من اَیم و اونَ شفا دهم» ⁸ ولی اون افسر جواب بدَه:«ای آقا، من لایقِ اون نییِم کی تو بَأیی می سقفِ جیر، فقط چیزی بوگو تا می خادم شفا پیدا کونه. ⁹ چون من خودمم مأمورم، و سربازانی می زیرِ دس ایسَد، وختی ایتَه یَ گویم بوشون، شِه، و دیگری یَ گویم بیا، اَیه، و می غلامَ گویم "اَ کارَ بوکون" کونه.» ¹⁰ عیسی وختی اونِ حرفانَ بیشتَأوست تعجب بوکود و خو همراهانَ بوگوفت:«شمرَه گویمْ، من اَجور ایمانْ اسرائیلِ میأنم نیدم. ¹¹ و شمرَه گویم خیلیان از شرق و غرب اَیده و ابراهیم و اسحاق و یعقوب اَمره آسمانِ ملکوتِ دورون ایتَه سفره سر نیشیند ¹² ولی اَ پادشاهی زَأکأن بیرونِ تاریکی میَأن تَأوَأدَه بهد، جایی کی گریه و فشارِ دندان نَهه.» ¹³ بعد وَأگردست اون اَفسرَ بوگوفت:«بوشو، مُطابقِ تی ایمان ترَه فَأدَه بیبه.» هو لحظه اونِ غلام شفا پیدا کود.

پطرسِ زن مارِ شفا

¹⁴ وختی عیسی بوشو پطرسِ خانه، اونِ زَن مارَ بیده کی تَب بوکوده و رختخواب خوفته. ¹⁵ وختی عیسی اونِ دسَ بیگیفت، اونِ تب قطعَ بوست و ویریشت و شروع بوکود پذیرایی کودَأن. ¹⁶ غروب دمِ رِه، خیلی از دیوانه یانَ اونِ ورجَه بأوردد و اونْ ایتَه کلمه اَمرَه دیوانَ بیرون تَأوَأدَه و همۀ مریضانَ شفا بدَه. ¹⁷ و اَطو اونچی کی اِشعیایِ نبی بوگوفته بو انجام بوبُست کی:«اون اَمی ضَعفانَ بیگیفت و اَمی مَرضانَ اوسَأد.»

عیسی پیروی قیمت

¹⁸ وختی عیسی اون جمعیتی کی اونِ دور جمعَ بوسته بودَه بیدهْ خو شاگردانَ دستور بدَه تا بوشود دریاچه اوطرف. ¹⁹ اونموقع ایتَه از یهودِ مُلایان پیش بأمو و اونَ بوگوفت:«ای اُستاد، هر جا بیشی ترَه پیروی کونم.» ²⁰ عیسی اونَ جواب بدَه:«روباهانم خوشَأنِ رِه سوراخ دَأرد و پرنده یان خوشَأنِ رِه لانه، ولی انسانِ پسر جایی نَئره کی خو سرَ بنه.» ²¹ ایتَه دیگر از اونِ شاگردان اونَ بوگوفت:«ای آقا، وَأهأل اول بوشوم می پئرَ دفنَ کونم.» ²² عیسی اونَ بوگوفت:«مرَه پیروی بوکون و وَأهأل مُرده یان، خوشَأنِ مُرده یانَ دفنَ کوند.»

توفانِ آرام کودَأن

²³ اونموقع عیسی قایقَ سوارَ بوست و اونِ شاگردان اونِ دونبال بأمود. ²⁴ ایمرتبه دریا کولاک بوبُست، جوری موج زَئه کی آب اَمویه قایقِ دورون، ولی عیسی خوفته بو. ²⁵ شاگردان بأمود اونَ بیدارَ کودد و بوگوفتد:«ای اُستاد، اَمی داد فَأرس، غرقَ بوستَأن دَریم.» ²⁶ عیسی جواب بدَه:«ای کم ایمانان، چره اَقدر بترسه ئید؟» و بعد ویریشت و باد و دریایَ تَشر بزَه، و دریا کاملاً آرامَ بوست. ²⁷ شاگردان کی بترسه بود همدیگرَ گوفتد:«اَ دِ کیسه کی باد و دریا هم اونِ جَه فرمان بورد.»

دو تَه مردِ دیوانه شفا

²⁸ وختی عیسی سرزمینِ جَدَریانَ فأرسه کی دریا اوطرف نَهه بو، دو تَه دیوانه یَ بیده کی قبرانِ جَه بیرون بأمود و اونَ بر بوخوردد، اوشَأنْ به حدی وَحشی بود کی هیچکس جرأت نوکوده اورَه ردَ بِه. ²⁹ اون دو نفر تا عیسی یَ بیدد فریادِ اَمرَه بوگوفتد:«ای خدا پسر، اَمی اَمرَه چی کار دَأری؟ آیا بأمویی تا اَمرَه زودتر از وخت عذاب بدی؟» ³⁰ اون محلِ جَه ایبچه دورتر، ایتَه گله خوک چرا کودَأن دوبو. ³¹ دیوان عیسی جَه خواهش بوکودد و بوگوفتد:«اگر خَأیی اَمرَه بیرون تَأوَأدی، اَمرَه اوسَه کون اون خوکانِ دورون.» ³² عیسی بوگوفت: «بیشید» پس اوشَأن بیرون بأمود و بوشود خوکانِ دورون. هو لحظه همۀ خوکان تپه بوجُرِ جَه هُجوم بوبوردد دریا طرف و دکفتد دریا میَأن و هلاک بوبُستد. ³³ خوک بانان فرار بوکودد بوشود شهرْ و همۀ چیزایی کی اتفاق دکفته بویَ، و اون دیوانه یانِ ماجرایَ مردمِ رِه نقل بوکودد. ³⁴ و همۀ شهرِ مردمان بأمود تا عیسی یَ بیدیند، وختی اونَ بیدد التماس بوکودد کی اوشَأنِ منطقه جَه بیشه.