7

¹ داوری نوکونید تا شمرَه داوری نوکوند. ² چون هوطویی کی دیگرانَ داوری کونید، شمرَه داوری کوند و هر پیمانه ایی اَمرَه کی فَأدید، هون پیمانه اَمرَه عوض گیرید.3 ³ چوطویه کی ایتَه کوچی سیخَ تی برأرِ چومِ دورون دینی، ولی هون پیله کی چوبَ تی چومِ دورون نیدینی؟ ⁴ چوطو تَأنی تی برأرَ بوگویی؛ "وَأهأل سیخَ تی چومِ جَه بیرون بأورم" ولی خودتِ چومِ دورونْ چوب دَأری؟ ⁵ ای آدمِ ریاکار، اول چوبَ تی خودتِ چومِ جَه بیرون بأور، اونموقع بهتر تَأنی بیدینی تا سیخَ تی برأرِ چومِ جَه بیرون بأوری. ⁶ اونچی کی مقدسه یَ سگانَ فَأندید و خودتانِ مُرواریدانَ خوکانِ جولو تَأنوَأدید، نوکونه اوشَأنَ پامالَ کوند و وَأگردد شمرَه پارَه کوند.

بخَأئید، بگردید، بوکوبید

⁷ بخَأئید کی شمرَه فَأدَه بِهه، بگردید کی پیدا کونید، بوکوبید کی دَرْ شیمی رو بازَه بِه. ⁸ چون هر کی بخَأیه بدس اَوره، و هر کی بگرده پیدا کونه، و هر کی بوکوبه درْ اونِ رِه بازَه بِه. ⁹ کیسه شیمی میَأن کی اونِ زَأی اونِ جَه نان بخَأیه و اونْ خو زأیَ سنگ فَأده؟ ¹⁰ یا ماهی بخَأیه اونَ لانتی فأده؟ ¹¹ پس شومَأن کی اَطو گوناهکاریدْ دَأنید کی وَأستی خودتانِ زأکأنَ چیزایِ خوب فأدید، چقدر ویشتر شیمی پئرْ کی آسمانِ میَأن ایسَه اوشَأنی یَ کی اونِ جَه بخَأیدَ چیزهایِ خوب فَأده. ¹² پس مردمِ مرَه هوطویی رفتار بوکونید کی دوس دَأرید شیمی اَمرَه رفتار بوکوند. چون تورات و اَنبیا نوشته یانِ خلاصهْ هَن بِهه.

راه حیاتِ اَبدی

¹³ درِ تنگِ جَه بودورون بأئید، چون اون دری کی پیلدانه یه و راهی کی پهنه، راهی ایسه کی شِه هلاکتِ طرف، و کسانی کی اون درَ بودورون شُد زیادد. ¹⁴ ولی اون دری کی تنگه، و اون راهی کی سخته، حیاتِ جاودانَ فَأرِسه و کسانی کی اونَ پیدا کوند کَمد.

درخت و اونِ میوه

¹⁵ پیغمبرایِ دوروغینِ جَه دوری بوکونید، اوشَأنْ گوسفندِ لباسِ دورون شیمی ورجَه اَید، ولی باطنِ جَه گُرگِ درنده ید. ¹⁶ اوشَأنَ اوشأنِ اَعمالِ جَه تَأنید بشنَأسید. آیا اَنگورَ خارِ جَه و اَنجیرَ سیخِ جَه چیند؟ ¹⁷ و هَطو هم درختِ خوبْ میوۀ خوب اَوره و درختِ بد، میوۀ بد. ¹⁸ درختِ خوب نتَأنه میوۀ بد بأوره، و درختِ بد هم نتَأنه میوۀ خوب بأوره. ¹⁹ درختایی کی میوۀ بد اَوردَ وَأویند و تَأوَأدد آتشِ دورون. ²⁰ پس شومَأن پیغمبرایِ دوروغینَ اوشأنِ میوه یانِ جَه تَأنید بشنَأسید. ²¹ فکر نوکونید هر کی مرَه "خداوندا، خداوندا" دخَأنه آسمانِ ملکوتَ بودورون شِه، بلکی کسی تأنه کی می پئرِ آسمانی اِراده یَ انجام بده. ²² وختی اون روز برسه، خیلیان مرَه گوید؛ "خداوندا، خداوندا، آیا به تی نام نبوّت نوکودیم؟ آیا تی نامِ اَمرَه دیوانَ اِخراج نوکودیم؟ آیا به تی نام مُعجزاتِ زیادی اَنجام ندَأئیم؟" ²³ اونموقع منم واضح اوشَأنَ گویم؛ "من اَصلاً شمرَه نشناسم، می جَه دورَ بید ای بدکاران."

معمارِ عاقل معمارِ نادان

²⁴ پس هر کی می حرفانَ بیشتَأوه و اوشَأنَ عمل بوکونه، اون آدمِ عاقلی یَ مَأنه کی خو خانه یَ سنگِ رو چَأکود، ²⁵ هر چی باران بوارست و سیل راه دکفت و باد بأمو و اون خانه یَ زور بأورد، اون خانهْ خرابَ نوبوستْ چون سنگِ رو چَأکوده بوبُسته بو. ²⁶ و هر کی می حرفانَ بیشتَأوه و اوشَأنَ عمل نوکونه، اون آدمِ نادانی یَ مَأنه کی خو خانه یَ فورشِ رو چَأکود. ²⁷ باران بوارست، سیل راه دکفت و باد بأمو و اونِ خانه یَ زور بأورد، و خانه فوکوردست و چی خرابی عظیمی به بار بأورد.» ²⁸ وختی عیسی حرفان تومامَ بوست، مردم اونِ تعالیمِ جَه تعجب بوکوده بود، ²⁹ چون اقتدارِ اَمرَه تعلیم دَئه نه یهودِ مُلایانِ مَأنستَأن.