27

¹ وختی صبح بوبُست، همۀ کاهنانِ سران و قؤمِ شِیخَأن جلسه بیگیفتد کی عیسی یَ بوکوشد. ² پس اونَ دس بسته بوبوردد و پنطیوس پیلاطُسَ کی فرماندارِ رومی بو تحویل بدَأد. ³ ولی یهودا کی عیسی یَ تسلیم بوکوده بو وختی بیده کی عیسی محکوم بوبُسته، خو کرده جَه پشیمانَ بوست و سی سکۀ نقره یَ وَأگردَأنه کاهنانِ سران و شِیخانَ، ⁴ و اوشَأنَ بوگوفت:«من گوناه بوکودم کی باعث بوبُستم ایتَه آدمِ بی گوناه خون فیوِه.» ولی اوشَأن بوگوفتد:«اَمرَه مربوط نییه، خودت دَأنی!» ⁵ پس یهودا هم سکه یانَ معبدِ دورون تَأوَأده زمینِ رو و بوشو و لافندِ اَمرَه خورَه خفَأ کود. ⁶ کاهنانِ سرانْ پولَ اوسَأدد و بوگوفتد:«اَ پولَ نشَه معبدِ خزانه دورون دوکودَن، چون خونبهایه.» ⁷ پس مشورت بوکودد و قرار بوبُست کی اون پولِ اَمرَه کوزه گرِ زمینَ بِهِند تا غریبه یانِ قبرستان بیبه. ⁸ هَنه وَسیه کی اون زمینْ تا اِمروز «خونِ زمین» نام دَأره ⁹ و اَطو اِرمیایِ نبی پیشگویی انجام بیگیفت کی گویه:«اوشَأنْ سی سکۀ نقره یَ اوسَأدد، یعنی اون قیمتی کی بعضی از بنی اسرائیلیان اونِ رو بنَه بود، ¹⁰ و اونِ اَمرَه کوزه گرِ زمینَ بهد، هوطو کی خداوند مرَه بفرماسته بو.»

عیسی و پیلاطُس

¹¹ و اوشَأنْ عیسی یَ بوبوردد فرماندارِ رومی ورجَه. فرماندار اونِ جَه وَأورسه:«آیا تو یهودیانِ پادشاهی؟» عیسی بوگوفت:«تو گویی!» ¹² و کاهنانِ سران و شِیخَأن اِتهامایِ زیادی اونَ بزَد، ولی اون هیچ جوابی ندَه. ¹³ پیلاطُس اونَ بوگوفت:«نیشتَأوی چی چیزایی بر علیه تو گوید؟» ¹⁴ ولی عیسی حتی ایتَه کلمه هم جواب نده، جوری کی فرماندار تعجب بوکود. ¹⁵ رسم بر اَن بو کی عیدِ اَیامِ رِه فرماندارْ ایتَه زندانیَ، هر کی یَ کی مردم بخَأسته بِد اوشَأنِ رِه آزادَ کوده. ¹⁶ اون اَیام ایتَه زندانی معروفْ زندانِ دورون ایسَه بو کی «باراباس» نام دَأشته. ¹⁷ وختی مردم جمعَ بوستد پیلاطس اوشَأنَ بوگوفت:«خَأئید کیی یَ شِمرَه آزادَ کونم؟ باراباسَ، یا عیسایَ کی مسیحَ معروفه؟» ¹⁸ اَنَ بوگوفت چون دَأنسته کی حسادتِ وَسی عیسایَ تسلیم بوکوده دَأرد. ¹⁹ هون موقع کی پیلاطسْ تختِ قضاوتِ رو نیشته بو، اونِ زن اونِ رِه پیغام اوسَه کود و بوگوفت:«اَ مردِ بی گوناه اَمرَه کاری نَدأر، چون دیشب اونِ وَسی خوابهایِ بدی بیدِم و اَذیت بوبُستم.» ²⁰ و کاهنانِ سران و شِیخَأنْ مردمَ تشویق بوکودد کی پیلاطسِ جَه بخأید باراباسَ اوشَأنِ رِه آزادَ کونه و عیسی یَ اِعدام بوکونه. ²¹ پس فرماندار دوباره وَأورسی:«کَ ی تَه یَ خَأئید شِمِرِه آزادَ کونم؟» مردم فریاد بوکودد:«باراباسَ.» ²² پیلاطس اوشَأنَ بوگوفت:«پس عیسایِ معروف به مسیح اَمرَه چی بوکونم؟» همه تَه بوگوفتد:«مصلوب بوکون.» ²³ فرماندار بوگوفت:«چره؟ چی بدی ایی بوکوده؟» اوشَأن خوشَأنِ صدایَ ویشتر بلندَ کودد و بوگوفتد:«مَصلوب بوکون.» ²⁴ وختی پیلاطس بیده دِ فایده نَئره و ممکنه آشوب بپا بیبه، آب بخَأست، و مردمِ چومِ جولو خو دسَ بوشوست و بوگوفت:«اَ مردِ بی گوناه خون می گردن نییه، خودتَأن دَأنید.» ²⁵ جمعیتْ فریاد بزَد و بوگوفتد:«اونِ خون اَمی گردن و اَمی زَأکأنِ گردن بیبه.» ²⁶ بعد پیلاطس باراباسَ اوشَأنِ رِه آزادَ کود، و دستور بدَه عیسی یَ شلاق بزند و بوبورد مصلوب بوکوند.

عیسی مسخره کودَأن

²⁷ سربازان عیسی یَ بوبوردد فرماندارِ کاخِ حیاطِ میَأن و همۀ سربازان اونِ دور جمعَ بوستد. ²⁸ بعدْ اونِ لباسَ بیرون بأوردد و ایتَه سُرخِ ردَا اونِ دوشِ رو تَأوَأدد ²⁹ و خارِ جَه ایتَه تاج اونِ رِه چَأکودد و بنَأد اونِ سرِ رو، و ایتَه چوب فأدد اونِ راستِ دس، و اونِ جولو تعظیم کودد و مسخره اَمرَه گوفتد:«سلام ای یهودِ پادشاه.» ³⁰ و اونِ صورتِ رو تُف فوکودد و چوبَ اونِ دسِ جَه گیفتد و فوکوفتد اونِ سرِ رو. ³¹ آخرسر مسخره کودَأنِ جَه دس بکشد، و اونْ سرخِ ردایَ بکدد و خودشِ لباسَ اونَ دوکودد، بعدْ اونَ بوبوردد تا مصلوب بوکوند.

عیسی مصلوب بوستَأن

³² راه میَأن مردی یَ بیدد کی قیروانِ شین بو و شَمعون نام دَأشته، اونَ مجبور بوکودد کی عیسی صلیبَ اونِ دونبال بوبوره. ³³ وختی محلی کی جُلجُتا یعنی کاسۀ سَر نام دَأشته یَ فأرسد، ³⁴ شرابی کی دارویِ بیهوشی مرَه قاطی بوبُسته بویَ اونَ فَأدد، ولی وختی بچشه، نخَأست کی بوخوره. ³⁵ سربازان اونَ مصلوب بوکودد، و اونِ لباسانِ رو قرعه تَأوَأدد تا اونچی کی نبّی پیشگویی بوکوده بو انجام بیبه کی:«می رختانَ خوشأنِ میَأن تقسیم بوکودد و می لباسِ رِه قرعه تَأوَأدد.» ³⁶ بعد سربازانْ هویَ بینیشتد و نگهبانی بدد. ³⁷ و ایتَه لوحِ رو بینیویشتد:«اَنْ عیسی، یهودِ پادشاهه.» و اونِ سرِ جُر صلیبِ رو نصب بوکودد. ³⁸ هون موقع دو تَه دوزدَ اونِ مرَه مصلوب بوکودد، ایتَه اونِ راستِ طرف و ایتَه هم چپِ طرف. ³⁹ کسانی کی اویِ جَه ردَ بوستد خوشَأنِ سرَ تکان دَئِد و بد و بیراه اَمرَه ⁴⁰ گوفتد:«تو کی خَأستی معبدَ ویرانَ کونی سه روزِ میَأن دوباره چَأکونی، خودتَ نجات بدن! اگر واقعاً خدا پسری صلیبِ جَه بیجیر بیأ.» ⁴¹ کاهنانِ سران و یهودِ مُلایان و قؤمِ شِیخَأن هم اونَ مسخره کودد و گوفتد: ⁴² «دیگرانَ نجات بدَه، ولی نتَأنه خودشَ نجات بده. اگر اسرائیلِ پادشاهی هَسَه صلیبِ جَه بیجیر بیأ تا ترَه ایمان بأوریم. ⁴³ اون خدایَ توکل دَأشته و گوفته خدا پسره، پس اگر خدا اونَ دوس بدَأره اونَ نجات دِهه.» ⁴⁴ حتی اون دو تَه دوزد کی اونِ مرَه مصلوب بوُسته بود هم اونَ فُحش دَئِد.

عیسی مَردن

⁴⁵ اون روز، از ساعت دوازدَهِ ظهر تا سه بعدازظهر همۀ زمین تاریکَ بوست. ⁴⁶ نزدیکه ساعت سه، عیسی صدایِ بلندِ اَمرَه فریاد بوکود:«ایلی، ایلی لَمّا سَبَقْتَنی.» یعنی الهی الهی چره مرَه تنها بنَأیی.» ⁴⁷ بعضی کی اویَ ایسَه بود خیال بوکود کی الیاسِ نبی یَ دخَأنه. ⁴⁸ اینفر فوری بودووَست و اسفنجی یَ اوسَأد و تُرش شراب بزَه و بنَه ایتَه چوبِ رو و بوبورد عیسی دَهَنِ جولو تا بوخوره. ⁴⁹ ولی دیگران اونَ بوگوفتد:«کار ندأر، وَأهأل بیدینیم الیاس اَیه اونَ نجات بده یا نه.» ⁵⁰ بعد عیسی ایبارِ دیگر صدایِ بلندِ اَمرَه فریاد بکشه و جان بدَه ⁵¹ هو لحظه معبدِ پرده از بوجُر تا بیجیر دو پاره بوبُست و چنانْ زمین لرزه ایی بأمو کی سنگان بشکافتد، ⁵² و قبران بازَه بوستد و خیلی از مُقدسین کی بمرده بود زندَه بوستد. ⁵³ و بعدِ اَنکی عیسی زندَه بوستْ اوشَأنم خوشَأنِ قبرانِ جَه بیرون بأمود و بوشود اورشلیم و خیلی از مردم اوشَأنَ بیدد. ⁵⁴ ولی اون افسرْ و اون سربازانی کی صلیبِ جیر نگهبانی دَأئِد وختی زلزله و اَ اتفاقانَ بیدد خیلی بترسد و بوگوفتد:«اَ مرد واقعاً خدا پسر بو.» ⁵⁵ خیلی از زنانم اویَ ایسَه بود و از دور فَأندرستد، اوشَأنْ جلیلِ جَه عیسی دونبال بأمو بود تا اونَ خدمت بوکوند. ⁵⁶ اوشَأنِ میَأن، مریمِ مَجدلیه، مریمْ یعقوب و یوسفِ مار، و یعقوب و یوحنا مار ایسَه بود.

عیسی دفن کودَأن

⁵⁷ غروب دمِ رِه، ایتَه آدمِ ثروتمند کی یوسف نام دَأشته و رامِه شین بو و عیسی شاگرد بوبُسته بو، ⁵⁸ بوشو پیلاطسِ ورجَه و اونِ جَه بخَأست کی عیسی جنازه یَ اونَ فَأده. پیلاطسم دستور بدَه کی فَأدد. ⁵⁹ یوسفْ جنازه یَ بوبورد و ایتَه تازه پارچۀ کتانی دورون بپیچَأنی. ⁶⁰ و خودشِ قبرِ دورون کی تازه صخره میَأن بتراشته بو بنَه، و ایتَه پیلدانه سنگم قبرِ درِ جولو هُل بدَه و بوشو. ⁶¹ مریمِ مَجدلیه و اوی تَه مریمْ قبرِ جولو نیشته بود و فَأندرستد. ⁶² فردایی صبح کی شنبه بو، کاهنانِ سران و فریسیان بوشود پیلاطُسِ ورجَه و ⁶³ بوگوفتد:«قربان، اَمرَه یاده کی اون حُقه باز وختی زنده بو گوفته؛ "بعدِ سه روز من ویریزم." ⁶⁴ پس بفرما تا روزِ سوم قبرِ جَه محافظت بوکوند، نوکونه اونِ شاگردان شبانه بَأید و اونِ جنازه یَ بودوزَأند و مردمَ بوگوید کی اون مُرده یانِ جَه ویریشته، و اگر اَطو بیبه وضعْ اولِ جَه هم بدتر بِه.» ⁶⁵ پیلاطس اوشَأنَ بوگوفت:«شومَأن خودتَأن نگهبان دَأرید، بیشید و هر جور خودتَأن صلاح دَأنید محافظت بوکونید.» ⁶⁶ پس اوشَأنم بوشود و قبرِ سنگَ مُهر و موم بوکودد، و نگهبانانی اویَ بنَأد تا قبرِ جَه محافظت بوکوند.