1
بعدِ روزِ سبَت، یکشنبه صبحِ زود، مریمِ مَجدلیه و اوی تَه مریم بوشود قبرِ سر.
2
کی ایمرتبه زلزله ایی بأمو، چون خداوندِ فرشتهْ آسمانِ جَه بیجیر بأمو و سنگَ هُل بدَه کنارْ و اونِ رو بینیشت.
3
فرشته صورتْ برقِ مَأنستَأن درخشَأن بو و اونِ لباسْ برفِ مَأنستَأن سفید.
4
نگهبانان کی اونَ بیدد از ترس بپرکستد و مُرده مَأنستَأن بکفتد زمینِ رو.
5
اونموقع فرشته، زنأکأنَ بوگوفت:«نترسید، دَأنم کی عیسایِ مصلوبِ دونبال گردید،
6
اون اَیَ نِئسَه، چون هوطویی کی بوگوفته بو ویریشته، بأئید جایی کی اون خوفته بویَ بیدینید.
7
هَسَه زود بیشید و اونِ شاگردانَ خبر بدید کی اون مُرده یانِ جَه ویریشته و قبل از شومَأن شِه جلیل. اویَ اونَ دینید، اونچی کی شمرَه بوگوفتمَ فراموشَ نوکونید.»
8
پس زنأکأنْ ترسی کی شادی اَمرَه همراه بو تون تون قبرِ جَه بیرون بأمود و بودووَستد تا بوشود شاگردانَ خبر بدد.
9
و هَطو کی راه میَأن شوئون دوبود تا خبرَ شاگردانَ برسَأندْ ایمرتبه عیسی یَ بیدد، عیسی اوشَأنَ بوگوفت:«سلام بر شومَأن.» زنَأکأن بأمود جولو و بکفتد اونِ پا جیر و اونَ سُجده بوکودد.
10
عیسی اوشَأنَ بوگوفت:«نترسید، بیشید و می برأرأنَ بوگوئید که بوشود جلیلْ کی مرَه اویَ دیند.»
نگهبانانِ گزارش
11
وختی زنأکأن هنوز راه میَأن ایسَه بود، بعضی از نگهبانان قبرِ جَه بوشود شهر و کاهنانِ سرانَ گزارش بدد کی چی بوبُسته.
12
کاهنانِ سرانْ شِیخَأنِ اَمرَه جمعَ بوستد و جلسه تشکیل بدَأد و سکه های نقره نگهبانانَ فَأدد
13
و اوشَأنَ بوگوفتد کی بوگوید؛ "وختی اَمَأن خواب بوئیم اونِ شاگردان بأمود و جنازه یَ بودوزَأنِد".
14
و اوشَأنَ خاطرجمع بوکودد و بوگوفتد؛ اگر اَ خبرْ فرماندارِ گوش فأرسه، اَمَأن اونِ جوابَ دهیم و وَأنألیم شمرِه مشکلی پیش بَأیه."
15
نگهبانانم پولَ فَأگیفتد و طبقِ اونچی کی اوشَأنَ دستور بدَه بودْ عمل بوکودد، و تا اِمروز اَ حرف یهودیانِ میَأن دَهن به دهن بِه و اونَ باور کوند.
مأموریتِ اصلی
16
پس عیسی یازدَه شاگرد بوشود جلیلْ اون کوهی رو کی عیسی اوشَأنَ بوگوفته بو.
17
وختی عیسی یَ اویَ بیدد اونَ پرستش بوکودد، ولی بعضی هنوز شک دَأشتد کی اون عیسی بیبه.
18
پس عیسی بأمو جولو و اوشَأنَ بوگوفت:«همۀ قدرت آسمان میَأن و زمینِ رو مرَه فأدَه بوبُسته،
19
پس بیشید و همۀ اُمتانَ می شاگرد چَأکونید و اوشَأنَ به نامِ پئرْ، پسرْ و روح القدس تعمید بدید.
20
و اوشَأنَ تعلیم بدید تا همۀ چیزهایی کی شمرَه حُکم بوکودمَ بجا بأورد، و بدَأنید منْ هر روزه تا پایانِ اَ دونیا شیمی اَمرَه ایسَأم.»