26

¹ وختی عیسی اَ حرفانَ تومامَ کود خو شاگردانَ بوگوفت: ² «دَأنید کی دو روزِ دیگر عیدِ فِصَحه و انسانِ پسرَ تسلیم کوند تا مصلوب بیبه.» ³ هَ موقع کاهنانِ سرانْ و قؤمِ یهودِ شِیخانْ، کاهنِ اعظمِ قصرِ دورون جمعَ بوسته بود. کاهنِ اعظمِ نام قیافا بو. ⁴ اوشَأن جلسه بیگیفته بود کی چوطو وَأستی کلکِ اَمرَه عیسی یَ دستگیر بوکوند و اونَ بوکوشد. ⁵ ولی گوفتد:«نوَأستی اَ کارَ عیدِ اَیامِ رِه انجام بدیم، نوکونه شلوغ دکفه و مردم شورش بوکوند.» ⁶ وختی عیسی بِیت عَنیا میَأن، شمعونِ جُذامی خانه دورون ایسَه بو، ⁷ ایتَه زن، شیشۀ عطرِ گرانقیمتی اَمرَه بأمو اونِ ورجَه، و هوطو کی عیسی سفره سر نیشته بو اونْ عَطرَ فوکود اونِ سرِ رو. ^{8 9} شاگردان کی اَ کارَ بیدد عصبانی بوبُستد و بوگوفتد:«اَ اِسراف چی وَسیه؟ تَأنستیم اَ عطرَ به قیمتِ خوب بوفروشیم و اونِ پولَ فَأدیم فقیرانَ.» ¹⁰ عیسی اَنَ بفهمست و اوشَأنَ بوگوفت:«چره اَ زنِ جَه ایراد گیرید؟ اون کارِ خوبی مِرِه بوکود. ¹¹ فقیران همیشه شیمی دور و وَر ایسَأد، ولی من همیشه شیمی اَمرَه نِئسَم. ¹² اَ زنْ کی اَن عطرَ فوکود می بدنِ رو، مرَه دفنِ رِه آمادهَ کود. ¹³ بدَأنید کی همۀ عالمِ میَأن، هر جایی کی انجیل موعظه بیبه، اَ زنِ کارْ اونِ یادگاری وَسی نقل بِهه.»

یهودا خیانت

¹⁴ اونموقع ایتَه از اون دوازدَه شاگردْ کی یهودایِ اسخریوطی نام دَأشته بوشو کاهنانِ سرانِ ورجَه ¹⁵ و بوگوفت:«اگر عیسی یَ شمرَه تحویل بدم مرَه چی فأدید؟» اوشأن سی سکۀ نقره اونَ فَأدد. ¹⁶ از اون موقع به بعد یهودا ایتَه فرصتِ دونبال گردسته تا عیسی یَ اوشَأنَ تسلیم بوکونه.

شامِ آخر

¹⁷ روز اولِ عیدِ فَطیر شاگردان بأمود عیسی ورجَه و بوگوفتد:«شامِ فِصحَ کَ یَ آماده کونیم تا بوخوری؟» ¹⁸ عیسی جواب بدَه:«بیشید شهر فُلان کسِ ورجَه و بوگوئید؛ "اُستاد گویه می وخت نزدیکه، و فصحَ می شاگردانِ اَمرَه تی خانه دورون خورم."» ¹⁹ شاگردان اونچی کی عیسی بوگوفته بویَ انجام بدد و فصحَ آماده کودد. ²⁰ وختی شب بوبُست، عیسی خو دوازدَه شاگردِ اَمرَه سفره دور بینیشت. ²¹ وختی شام خوردَأن دوبود اون بوگوفت:«شمرَه گویم تا بدَأنید ایتَه از شومَأن مرَه تسلیم کونه.» ²² شاگردان وختی اَ حرفَ بیشتَأوستد خیلی ناراحتَ بوستد و ایتَه ایتَه اونِ جَه وَأورسِئِد:«ای خداوند، آیا من اَ کارَ کونم؟» ²³ عیسی جواب بدَه:«اونی کی خو دسَ می اَمرَه کاسه دورون فرو کونه، هون مرَه تسلیم کونه. ²⁴ انسانِ پسرْ طبقِ هون پیشگویی ایی کی کتاب مقدسِ میَأن دربارۀ اون بینیویشته بوبُسته میره. ولی وای به حالِ اون کسی کی انسانِ پسرَ تسلیم کونه، اونِ رِه بهتر بو کی اصلاً بودونیا نَأموم بِه.» ²⁵ و یهودا کی بعداً اونَ تسلیم بوکود بوگوفت:«ای اُستاد آیا اون شخص منم؟» عیسی بوگوفت:«بله، تو خودت بوگوفتی.» ²⁶ وختی شام خوردد، عیسی نانَ بیگیفت و برکت بدَه و پارَه کود و فَأدَه خو شاگردانَ و بوگوفت:«بیگیرید و بوخورید، اَنه می بدن.» ²⁷ بعدْ پیاله یَ اوسَأد و شُکر بوکود و فَأدَه اوشَأنَ و بوگوفت:«همۀ شومَأن اَن پیاله جَه بوخورید، ²⁸ چون اَنْ می خونه کی عهدِ جدیدَ مُهر کونه، و خیلیانِ وَسی و گناهانِ آمرزشِ وَسی فیوِه. ²⁹ ولی شمرَه گویم بدَأنیدْ کی دِ میوۀ مؤ جَه نوخورم تا روزی کی خودمِ پئرِ ملکوتِ دورونْ شیمی اَمرَه اونِ تازه یَ بوخورم.» ³⁰ بعد سرودِ مخصوصِ عیدَ بخَأدد و راه دکفتد کوهِ زیتونِ طرف.

پطرسِ اِنکارِ پیشگویی

³¹ اونموقع عیسی اوشَأنَ بوگوفت:«همۀ شومَأن اِمشب مرَه تنها نیئید، چون کتاب مقدسِ میَأن بینیویشته بوبُسته؛ "چوپانَ زَنم و گوسفندان پراکندَه بود." ³² ولی بعدِ اَنکی زندَه بوستم، قبلِ شومَأن شُم جلیل.» ³³ پطرس جواب بدَه:«حتی اگر همه ترَه تنها بند، من هیچموقع اَ کارَه نوکونم.» ³⁴ عیسی اونَ بوگوفت:«ترَه گویم یقین بدَأن کی هَ اِمشبْ قبلِ اَنکی خروس بخَأنه، تو سه مرتبه گویی کی مرَه نشنَأسی.» ³⁵ پطرس بوگوفت:«حتی اگر لازم بیبه تی اَمرَه بیمیرم، هیچموقع نوگویم کی ترَه نشناسم.» و باقی شاگردانم هَنَ بوگوفتد.

باغِ جِتسیمانی

³⁶ اونموقع عیسی خو شاگردانِ اَمرَه فأرسه جایی کی جِتسیمانی نام دَأشته، و خو شاگردانَ بوگوفت:«هَ یَ بینیشینید تا من بوشوم اویَ دوعا بوکونم.» ³⁷ اون پطرسْ و زِبدی دو تَه پسرانَ اوسَأد و خو مرَه بوبورد. غم و ناراحتی همۀ اونِ وجودَ بیگیفته بو، ³⁸ پس اوشَأنَ بوگوفت:«جوری می جانَ غم بیگیفته کی نزدیکه بیمیرم، شومَأن هَ یَ بِئسید و می اَمرَه بیدار بیبید.» ³⁹ بعد عیسی بوشو کمی جولوتر و زمینِ رو زانو بزَه و اَطو دوعا بوکود:«ای پئر، اگر امکان دَأره اَ پیاله یَ می جَه دورَ کون، ولی نه می خواهشِ وَسی، بلکی به تی اِراده.» ⁴⁰ بعد وَأگردست اون سه تا شاگردِ ورجَه و بیده کی خوفتد، پس پطرسَ بوگوفت:«آیا نتَأنستید ایتَه ساعت می اَمرَه بیدار بِئسید؟ ⁴¹ بیدار بِئسید و دوعا بوکونید تا وسوسه میَأن دنکفید، روحْ مایله ولی جسمْ ناتوان.» ⁴² عیسی ایبارِ دیگر بوشو و بازم دوعا بوکود و بوگوفت:«ای پئر، اگر ممکن نییه کی اَ جامْ نوخورده می پِشِ جَه اوسَأده بیبه، اونچی کی تی اِراده یه اَنجام بیبه.» ⁴³ باز وَأگردست و بیده اوشَأن خوفتدْ، چون اوشَأنِ چومَأن سنگین بوبُسته بو. ⁴⁴ پس سومین بارِ رِه بوشو و هون دوعایَ بوکود. ⁴⁵ بعد وَأگردست شاگردانِ ورجَه و اوشَأنَ بوگوفت:«آیا هنوز خوفته اید و استراحت کونید؟ هَسَه ساعتی فأرسه دَأره کی انسانِ پسرْ گوناهکارانِ دس تسلیم بیبه. ⁴⁶ ویریزید بیشیم، هَسَه کسی کی مرَه تسلیم کونه اَیه.»

عیسی دستگیری

⁴⁷ و هنوز اونِ حرف تومامَ نوبوسته بو کی یهودا کی ایتَه از اون دوازدَه شاگرد بو ایتَه گروهِ اَمرَه بأمو، اوشأنَ کاهنانِ سران و قؤمِ شِیخان اوسه کوده بود و همه تَه شمشیر و چُماق دَأشتد. ⁴⁸ و اون شاگردِ خائن اوشَأنَ نشانی فَأده بو و بوگوفته بو کی:«هر کسی یَ مَأچی بدمْ هونه، اونَ بیگیرید.» ⁴⁹ پس یهودا بأمو عیسی ورجَه و بوگوفت:«سلام اُستاد.» و عیسی یَ مَأچی بدَه. ⁵⁰ عیسی اونَ بوگوفت:«ای رِفق تی کارَ زودتر انجام بدن.» هَ موقع اون گروه جولو بأمود و عیسی یَ بیگیفتد. ⁵¹ ولی ایتَه از عیسی شاگردان خو شمشیرَ غلافِ جَه بیرون فَأکشه و ایتَه ضربه بزَه و کاهنِ اعظمِ غلامِ گوشَ وَأوِه. ⁵² عیسی اونَ بوگوفت:«تی شمشیرَ غلافَ کون، چون هر کی شمشیر فَأکشه، شمشیرِ اَمرَه هم میره. ⁵³ مگر نَأنی من تَأنم می پئرِ آسمانی جَه بخأیِم کی دوازدَه فؤج فرشته اَمی یاری رِه اوسه کونه؟ ⁵⁴ ولی اگر اَ کارَ بوکونم، پس کتاب مقدسِ پیشگویی یان چوطو انجام بیبه کی گویه اَ اتفاقان وَأستی دکفه؟» ⁵⁵ بعد عیسی رو بوکود اون جمعیتَ و بوگوفت:«مگر خَأئید دوزد بیگیرید کی اَطو شمشیر و چماقِ اَمرَه بأموئید می دستگیری رِه؟ هر روز معبدِ دورون نیشتِم و مردمَ تعلیم دَئِم و شومَأن مرَه نیگیفتید، ⁵⁶ ولی همۀ اَشَأن اتفاق دکفت تا اونچی کی پیغمبران پیشگویی بوکوده بود انجام بیبه.»

عیسی و شورای یهود

⁵⁷ پس اون گروهْ عیسی یَ بوبوردد قیافا ورجَه کی کاهنِ اعظم بو، اویَ مُلایان و قؤمِ شِیخان جمعَ بوسته بود. ⁵⁸ پطرس دورادور اونِ دونبال اَمویه، وختی فَأرسه کاهنِ اعظمِ خانه حیاطِ دورون، اونِ خدمتکارانِ اَمرَه بینیشت تا بیدینه عاقبت چی بِهه. ⁵⁹ کاهنانِ سران و شِیخان و همۀ شورا اعضا، شهادتِ دروغِ دونبال گردستد تا بتَأند عیسی یَ تهمت بزند و اونَ بوکوشد. ⁶⁰ با اَنکی خیلیان جولو بوشود و شهادتِ دوروغ بدَأد ولی چیزی پیدا نوکودد. آخرسر دو نفر بأمود ⁶¹ و بوگوفتد:«اَ مرد بوگوفت کی تَأنم معبدَ خرابَ کونم و سه روزِ میَأن دوباره چَأکونم.» ⁶² کاهنِ اعظم ویریشت و عیسی یَ بوگوفت:«هیچی نوگویی؟ اَن چیسه کی بر علیه تو گوید؟» ⁶³ ولی عیسی هَطو ساکت بِئسَه، کاهنِ اعظم اونَ بوگوفت:«ترَه خدایِ زنده یَ قسم دهم اَمرَه بوگو، تو مسیحْ خدا پسری یا نه؟» ⁶⁴ عیسی اونَ بوگوفت:«تو خودت بوگوفتی کی! و شمرَه گویم بدَأنیدْ بعدِ اَن انسانِ پسرَ دینید کی قادرِ راستِ دس نیشته، و آسمانِ اَبرانِ اَمرَه اَیه.» ⁶⁵ ایمرتبه کاهنِ اعظم خو یقه یَ چاک بزَه و بوگوفت:«اون کُفر بوگوفت، دِ چره شاهد خَأئیم؟ خودتان اونِ کُفرَ بیشتَأوستید، ⁶⁶ چی مَصلحت دَأنید؟» شورا اعضا جواب بدَأد:«وَأستی اعدام بیبه.» ⁶⁷ بعد اونِ صورتِ رو تُف بوکودد، و بَعضیانْ اونَ سیلی بزَد و ⁶⁸ بوگوفتد:«ای مسیحْ اَمِرِه نبّوت بوکون، بوگو کی ترَه بزَه.»

پطرسِ اِنکار

⁶⁹ اَ موقع پطرسْ حیاطِ دورون نیشته بو، کی ایتَه کنیز بأمو اونِ ورجَه و بوگوفت:«تونم عیسایِ جلیلی اَمرَه بویی!» ⁷⁰ پطرس همه تَه ورجَه انکار بوکود و بوگوفت:«من نَأنم تو چی گویی!» ⁷¹ پطرس ویریشت و بوشو حیاطِ اوطرف، اویَ ایتَه کنیزِ دیگر اونَ بیده و خو دور و وَریانَ بوگوفت:«اَنم عیسایِ ناصری اَمرَه بو» ⁷² پطرس باز مُنکر بوبُست و قسم بوخورد و بوگوفت:«من اَ مردَ نشنَأسم.» ⁷³ ایبچه بعدْ کسانی کی اویَ ایسَه بود بأمود پطرسِ ورجَه و بوگوفتد:«حتماً تونم ایتَه از اَشَأنی، چون تی لَهجه جَلیلیه.» ⁷⁴ ولی پطرس باز شروع بوکود قسم خوردَأنْ، و لعنت بوکود و بوگوفت:«من اصلاً اَ مردَ نشنَأسنم!» دوروست هَ موقعْ خروس بخأد. ⁷⁵ و پطرسْ عیسی حرفَ یاد بأورد کی بوگوفته بو:«قبلِ اَنکی خروس بخأنه تو سه مرتبه گویی کی مرَه نشنَأسی.» پس بیرون بوشو و زار زار گریه بوکود.