24

¹ وختی عیسی معبدِ جَه بیرون شوئون دوبو، اونِ شاگردان بأمود اونِ ورجَه و بخَأستد کی معبدِ ساختمانانَ اونَ نیشان بدد، ² عیسی اوشَأنَ بوگوفت:«همۀ اَشَأنَ دینید؟ شمرَه گویم یقین بدَأنید سنگ سنگِ رو باقی نمَأنه و همه تَه فووُد.» ³ وختی عیسی کوهِ زیتونِ رو نیشته بو، شاگردان بأمود اونِ ورجَه و خلوتی اونِ جَه وَأورسد:«اَمرَه بوگو اَ اَمور کِی اتفاق دکفه و تی اَمونِ نشانه چیسه؟ و کِی آخرالزمان بِه؟» ⁴ عیسی اوشَأنَ بوگوفت:«مراقب بیبید کسی شمرَه گومراه نوکونه. ⁵ چون خیلیان به می نام اَیده و گوید؛ "من مسیحم" و خیلیانَ گومراه کوند ⁶ و دربارۀ جنگانْ ایشتَأوید و جنگانِ خبرانْ شیمی گوش فأرسه، ولی پریشان نیبیدْ چون همۀ اَشَأن وَأستی اتفاق دکفه، ولی هنوز دونیا تومامَ نوبوسته. ⁷ قؤمی قؤمِ دیگرِ اَمرَه و مملکتی مملکتِ دیگرِ اَمرَه جنگ کونه، و همه جا قحطی و زلزله و بِهه. ⁸ ولی همۀ اَشَأنْ تازه زایمانِ دردِ شروعه. ⁹ اونموقع شمرَه شکنجه کوند و کوشد، و همۀ اُمتانْ می نامِ وَسی شیمی جَه نفرت پیدا کوند. ¹⁰ خیلیان ایمانِ جَه وَأگردد و همدیگرَ تسلیم کوند و همدیگرِ جَه بیزار بهد. ¹¹ پیغمبرایِ دروغینِ زیادی ظاهر بود و خیلیانَ گومراه کوند. ¹² و گوناه اوقدر زیادَ بِه کی خیلیانِ محبتْ سردَ بِه. ¹³ ولی هر کی تا آخر صبر بوکونه، نجات پیدا کونه. ¹⁴ آخرسر وختی اَ ملکوتِ بشارتْ همۀ دونیا دورون اعلام بوبُست تا همۀ اُمتانِ رِه شهادتی بیبه، بعدْ دونیا به آخر فأرسه. ¹⁵ پس وختی اون مکروهِ ویرانیَ کی دانیالِ نبّی بوگوفته دَأره یَ بیده اید کی جایِ مقدسِ میَأن برپا بدَأشته بوبُسته، "خواننده خُب توجه بوکونه" ¹⁶ اونموقع هر کی یهودیه میَأن ایسَه فرار بوکونه کوهانِ طرف. ¹⁷ و هر کی پوشتِ بام ایسَه، وسایل اوسَأدنِ رِه بیجیر نَأیه. ¹⁸ و کسانی کی زمینِ رو کار کوند خوشَأنِ لباس اوسَأدَنِ وَسی هم وَأنگردد بخانه. ¹⁹ اون روزانْ زنایی کی حامله ید یا طفلِ شیرخوار دَأردِ رِه چقدر سخته. ²⁰ دوعا بوکونید شیمی فرارْ زمستانِ رِه، یا شنبه روزِ رِه کی دروازه یان دَوَسته یه نیبه. ²¹ چون اون زمانْ مُصیبتِ عظیمی ظاهر بِه کی از ابتدایِ عالم تا اونموقع نوبوسته و هیچموقع هم نیبه. ²² اگر خدا اون روزانَ کوتاه نوکوده بو، هیچ انسانی نجات پیدا نوکوده، ولی انتخاب بوبُسته یانِ وَسی، اونْ روزانْ کوتاهه. ²³ اون زمان اگر کسی شمرَه بوگویه؛ "بیدینید مسیح اَیَ ایسَه یا اویَ ایسَه" باور نوکونید، ²⁴ چون اِدعا کوند مسیحد، و پیغمبرایِ دروغین ظاهرَ بود، و معجزاتِ عظیمی انجام دهد جوری کی اگر بتَأنسته بِد، خدا انتخاب بوبُسته یانم گومراه کودد. ²⁵ هَسَه منْ همۀ اَشَأنَ پیشتر شمرَه بوگوفتم تا بدَأنید. ²⁶ اگر شمرَه بوگوید اون هَسَه بیابانِ میَأن ایسَه، نیشید اویَ، یا اَنکی بوگوید خانه دورون ایسَه باور نوکونید. ²⁷ انسانِ پسرِ ظهورْ آسمانِ رعد و برقَ مَأنه، کی وختی زنه از مغرب بیگیفته تا مشرقْ ایتَه لحظه دورون روشنَ بِه. ²⁸ هر جا کی مُردار بمَأنه لاشخورانم اویَ جمعَ بود. ²⁹ بعدِ اون مُصیبتانْ آفتاب تاریکَ بِه و ماه خو نورَ از دست دِهه و ستاره یان آسمانِ جَه فووُد، و آسمانِ قدرتانْ به لرزه دکفد. ³⁰ بعدِ اونْ، انسانِ پسرِ اَمونِ نشانه آسمانِ میَأن ظاهرَ بِه، و اونموقع همۀ جهانِ طایفه یانْ عَزا گیرد و انسانِ پسرَ دیند که آسمانِ اَبرانِ رو سواره و قوّت و جلالِ عظیمِ اَمرَه اَیه. ³¹ و اونْ، شیپورِ صدا اَمرَهْ خو فرشته یانَ اوسَه کونه تا انتخاب بوبُسته یانَ زمینِ چهار گوشه جَه، و آسمانِ اَطرف اوطرفِ جَه جمعَ کوند. ³² انجیر دارِ جَه درسی یاد بیگیرید؛ هر وخت اونِ شاخه یانْ جوانه زنه و برگ اَورهْ شومَأن دَأنید کی تابستان نزدیکه. ³³ پس هَطو، هر وخت اَ چیزانَ بیده ایدْ بدَأنید کی نزدیکه، بلکی هم درِ سرْ ایسَه. ³⁴ شمرَه گویم یقین بدَأنید اَ نسل ایسه تا همۀ اَ چیزان اتفاق دکفه. ³⁵ آسمان و زمین جی میَأن شِه، ولی می حرفانْ هیچموقع جی میَأن نیشه.

مسیحِ بازگشتِ ساعت

³⁶ اون روز و اون ساعتِ جَه هیچکس خبر نَئره، حتی آسمانِ فرشته یانم خبر نَئرد، فقط می پئر دَأنه و بس. ³⁷ زمانی کی انسانِ پسر ظهور کونه دقیقاً نوحِ روزگارَ مَأنه. ³⁸ اون زمانم کی هنوز طوفان شروع نوبوسته بو، مردم خوردد و عِیش و نوش کودد، و زن گیفتد و مردِ رِه بوستد ³⁹ و باور نوکودد کی واقعاً خأیه طوفان بأیه، تا روزی کی سیل بأمو و همه یَ بوبورد. انسانِ پسرِ ظهورم هَطویه ⁴⁰ اونموقع دو نفری کی زمینِ رو همدیگرِ کنار کار کوند، ایتَه یَ بورد و ایتَه دیگرَ وِلَ کوند. ⁴¹ دو تَه زنِ جَه کی گندم آسیاب کوندْ ایتَه یَ بورد و دیگری یَ ولَ کوند. ⁴² پس بیدار بیبید، چون نَأنید شیمی خداوند چی روزی وَأگرده. ⁴³ اگر صاحاب خانه دَأنسته کی دوزد چی ساعتی از شب اَیه، بیدار ایسَه یه و وَأنَأشته کی بَأیِه اونِ خانه دورون. ⁴⁴ پس شومَأن وَأستی همیشه آماده بیبید، چون انسانِ پسر اون ساعتی کی انتظار نَئرید اَیه. ⁴⁵ پس اون غلام اَمین و دانا کیسه کی اونِ اَربابْ خودشِ خانواده یَ اونَ بیسپأره تا به موقع اوشَأنَ خوراک بده؟ ⁴⁶ خوش به حال اون غلامْ کی وختی اونِ اَرباب اَیه، اونَ بیدینه کی خو کارَ مشغوله. ⁴⁷ شمرَه گویم یقین بدَأنیدْ اون اَربابْ همۀ خو دارایی یَ فَأده اونْ غلامِ وظیفه شناسِ دس. ⁴⁸ ولی اگر اون غلامْ شرور بیبه و خو مرَه بوگویه؛ "می اَربابِ اَمون طول کشه" ⁴⁹ و خو همکارانَ اذیت و آزار بوکونه، و مشروب خورانِ اَمرَه بینیشینه و عَیاشی بوکونه، ⁵⁰ روزی کی انتظار نَئره و ساعتی کی اونِ جَه خبر نَئرهْ اونِ اَربابْ اَیه، ⁵¹ و اونَ از میَأن دو پارَه کونه و جایی تَأوَأده کی ریاکارانَ تَأوَأدد، هون جایی کی گریه و فشارِ دندان نَهه.