22

¹ عیسی باز اوشَأنِ رِه مثال بزَه و بوگوفت: ² «آسمانِ ملکوتْ پادشاهی یَ مَأنه کی خو پسرِ رِه عروسی بیگیفت. ³ اون خو غلامانَ اوسَه کود تا کسانی کی دعوت بوبُسته بودَ بوگوید کی بأید جشنْ، ولی اوشَأن نَأمود. ⁴ پس ایبار دیگر غلامانِ دیگری یَ اوسَه و اوشَأنَ بوگوفت؛ "بیشید دعوتی یانَ بوگوئید کی سُفره آماده یه و گاوان و گوساله یانِ پَرواری یَ سر وَأوِه دَأریم و همه چی آماده یه، بأئید عروسی." ⁵ ولی مهمانان اعتنا نوکودد و خوشأنِ راهَ بیگیفتد و بوشود، ایتَه بوشو خو زمینِ سر و ایتَه دیگر بوشو تا خو کسب و کارَ فأرسه، ⁶ حتی بعضیانم غلامانَ بیگیفتد و فُحش بدَأدْ و بوکوشتد. ⁷ وختی پادشاه اَنَ بیشتَأوست عصبانی بوبُست خو سربازانَ اوسَه کود تا قاتلانَ بوکوشد و اوشَأنِ شهرَ آتش بزند. ⁸ اونموقع پادشاه خو غلامانَ بوگوفت؛ "جشنِ عروسی آماده یه، ولی کسانی کی دعوت بوبُستد لیاقت نَأشتد، ⁹ هَسَه بیشید کوچه خیابانانِ میَأن و هر کی یَ بیده اید دعوت بوکونید عروسی." ¹⁰ پس اوشَأنْ بوشود و هر کی یَ پیدا کودد چی خوب چی بدْ خوشَأنِ اَمرَه بأوردد، و اَطو عروسی تالار مهمانانِ جَه پورَه بوست. ¹¹ وختی پادشاه وارد بوبُست تا مهمانانَ بیدینه، اینفرَ بیده کی اون عروسی رختی کی اونِ رِه آماده بوسته بویَ دونکوده بو. ¹² پادشاه اونِ جَه وَأورسه؛ "ای رِفق، چوطو بدونِ عروسی لباس بأمویی اَیَ؟" ولی اون ساکت بِئسَه. ¹³ پس پادشاه خو خادمانَ بفرماست؛ "اَ شخصِ دس و پایَ دَوَدید و بیرون تاریکی میَأن تَأوَأدید، جایی کی گریه و فشارِ دندان نَهه." ¹⁴ پس دینید، دعوت بوبُسته یان زیادد ولی انتخاب بوبُسته یان کم.»

سوال دربارۀ مالیات فَأدَن

¹⁵ اونموقع فریسیان بوشود و مشورت بوکودد کی چوطو اونَ خودشِ حرفانِ مرَه به دام تَأوَأدد. ¹⁶ پس خوشَأنِ شاگردانَ چن تَه از هیرودیسِ طرفدارانِ اَمرَه اوسَه کودد عیسی ورجَه، و اوشَأن عیسی یَ بوگوفتد:«ای اُستاد، اَمَأن دَأنیم کی تو آدمِ راستگویی ایسی و خدا راهَ دوروستی اَمرَه تعلیم دیهی و هیچکسِ جَه ترسی نَئری چون مردمِ ظاهرَ فَأندری. ¹⁷ پس اَمرَه بوگو، آیا وَأستی امپراطورَ مالیات فَأدیم یا نه؟» ^{18 19} عیسی کی اوشَأنِ شرارتَ درک بوکوده بو بوگوفت:«ای ریاکاران، چی وَسی مرَه امتحان کونید؟ ایتَه سکه کی اونِ اَمرَه شیمی مالیاتَ فَأدیدْ مرَه نشان بدید.» اوشَأن ایتَه دینار اونَ فَأدد. ²⁰ عیسی اوشَأنِ جَه وَأورسه:«کیی صورت و کیی نام اونِ رو نَهه؟» ²¹ جواب بدَأد:«قیصر» اوشَأنَ بوگوفت:«قیصرِ مالَ قیصرَ فَأدید و خدا مالَ خدایَ.» ²² اوشَأن اَ جوابِ جَه حیران بِئسَأدْ و عیسی یَ ولَ کودد و بوشود.

سوال دربارۀ قیامت

²³ هو روزِ رِه چن تَه از صَدوقیان کی روزِ قیامتَ قبول نَئرد بأمود عیسی ورجَه و اونِ جَه وَأورسد: ²⁴ «ای اُستاد، موسی بوگوفت هر وخت اینفر بی اولاد بیمیره، اونِ برأر وَأستی اونِ زنِ اَمرَه ازدواج بوکونه تا خو برأرِ رِه نسلی بوجود بأوره، ²⁵ بهرحال، اَمی میَأن هفتَ برأر بود کی اولی زن بیگیفت، ولی بمرد و چون زأی نَأشته اونِ برأر اونِ زنِ اَمرَه ازدواج بوکود. ²⁶ و هَطو تا سومی و هفتمی. ²⁷ و آخرسرْ اون زنم بمرد. ²⁸ پس روزِ قیامتِ رِه اون زنْ کَ ی تَه برأرِ زنْ بِهِه؟ چون همه تَه اونِ اَمرَه ازدواج بوکودد.» ²⁹ عیسی جواب بدَه:«شومَأن اشتباه کونید، نه خدا کلامِ جَه چیزی دَأنید و نه اونِ قدرتِ جَه. ³⁰ چون قیامتِ رِه، نه زن گیرد و نه مردِ رِه بود، بلکی همه، آسمانِ فرشته یانَ مَأند. ³¹ ولی دربارۀ مُرده یانِ قیامت، آیا کلامی کی خدا شمرَه بوگوفته دَأره یَ نخَأنده اید؟ خدا فرمایه؛ ³² "منم ابراهیمِ خدا، اسحاق و یعقوبِ خدا، خدا، مُرده یانِ خدا نییه بلکی زنده یانِ خدایه.» ³³ مردم وختی اَ حرفانَ بیشتَأوستد، اَ تعلیمِ جَه تعجب بوکودد.

پیله ترین حُکم

³⁴ وختی فریسیان بیشتَأوستد کی عیسی چی جوابی صَدوقیانَ بدَه دَأره، همدیگرِ مرَه جمعَ بوستد و عیسی یَ دورَ کودد. ³⁵ و ایتَه از اوشَأنْ کی شریعتِ معلم بو، امتحان کودَأنِ وَسی عیسی جَه وَأورسه: ³⁶ «ای اُستاد، شریعتِ دورون کَ ی تَه حکم از همه پیله تره؟» ³⁷ عیسی جواب بدَه:«تی خداوند خدایَ همۀ دیل و جانِ و همۀ فکرِ اَمرَه محبت بوکون. ³⁸ اَن اولین و پیله ترین حُکمه. ³⁹ دومی کی هو قدر مهمه، اَنه کی تی همساده یَ خودتِ مَأنستَأن محبت بوکون. ⁴⁰ اَن دو تَه حُکمِ میَأن همۀ تورات و پیغمبرانِ نیویشته یانْ خلاصَه بوسته.»

مسیحْ کی پسره؟

⁴¹ هوطو کی فریسیان عیسی دورَ بیگیفته بود عیسی اوشَأنِ جَه وَأورسه: ⁴² «شومَأن دربارۀ مسیح چی فکر کونید؟ اون کیی پسره؟» اونَ جواب بدَأد:«داودِ پسر» ⁴³ عیسی وَأورسه:«پس چوطو داود الهامی کی روحه جَه یه اونَ خداوندْ دَخَأنه؟ چون داود گویه؛ ⁴⁴ "خدا می خداوندَ بوگوفت؛ می راست دس بینیشین تا تی دوشمنانَ تی پا جیر تَأوَأدَم." ⁴⁵ پس چوطویه کی داودْ خو پسرَ خداوند دخَأنه؟» ⁴⁶ و اَطو کسی نتَأنست اونِ جوابَ بده و دِ بعدِ اون کسی جرأت نوکود چیزی اونِ جَه وَأورسه.