21

¹ وختی عیسی و اونِ شاگردان اورشلیمَ نزدیکَ بوستد، فأرسد ایتَه دهکده یَ کی اونِ نام "بیت فاجی" بو کی کوهِ زیتونِ نزدیکی نَهه بو، اونموقع عیسی دو تَه از خو شاگردانَ اوسَه کود، ² و بوگوفت:«بیشید اون دهکده ایی کی شیمی پیشِ رو نَهه، هَطو کی وارد بید ایتَه الاغَ دینید کی اونِ کُره اَمرَه دَوَسته دَأرد. اوشَأنَ بازَه کونید و می ورجَه بأورید. ³ اگر کسی شمرَه حرفی بزَه بوگوئید؛ خداوند اَشَأنَ احتیاج دَأره، اونْ هو لحظه وَأله کی اوشَأنَ بأورید.» ⁴ و اَطو نبّی پیشگویی انجام بوبُست کی بوگوفته بو: ⁵ «صَهیونِ دخترَ بوگوئید؛ تی پادشاه تی ورجَه اَیه، اون ایتَه الاغَ، ایتَه کُره الاغَ سوارَ بوسته و فروتنی اَمرَه اَیِه.» ⁶ شاگردان بوشد و اونچی کی اوشَأنَ بوگوفته بوبُسته بویَ انجام بدَأد. ⁷ اوشَأنْ کُره الاغَ بأوردد و خوشَأنِ لباسَ اونِ رو تَأوَأدد و عیسی اونَ سوارَ بوست. ⁸ خیلی از مردمم خوشَأنِ لباسانَ راه میَأن وَأشَأدد و بعضیانم درختانِ شاخه یانَ وَأوِئِد و راه میَأن تَأوَأدَأئِد. ⁹ مردم از جولو و عقب راه شوئد و فریاد زَئِد و گوفتد:«هوشیعانا داودِ پسر، مبارک بیبه کسی کی به نامِ خداوندْ اَیه، هوشیعانا خدایِ مُتعال اونَ مبارک بوکونه.» ¹⁰ وختی اورشلیمَ وارد بوبُستد همۀ شهر به هیجان بأمود و مردمْ وَأورسِئِد:«اَن کیسه؟» ¹¹ و جمعیت جواب دَأئِد:«اون عیسایِ پیغمبره کی جلیلِ جَه بأمو دَأره.»

عیسی معبدِ دورون

¹² بعدْ عیسی بوشو معبد، و همۀ کسانی کی معبدِ دروون خرید و فروش کوددَ بیرونَ کود و صرافان و کبوترفروشانِ تختَ وَأگردَأنی. ¹³ و اوشَأنَ بوگوفت:«کتاب مقدسِ میَأن بینیویشته بوبُسته می خانه، دوعا خانه دخَأده بِه، ولی شومَأن اونَ دوزدانِ دوکان چَأکوده اید.» ¹⁴ و کوران و شلان معبدِ دورن اونِ ورجَه اَموئد، و اون اوشَأنَ شفا دَئِه. ¹⁵ ولی کاهنانِ سرانْ و یهودِ مُلایانْ وختی مُعجزاتی کی اونِ جَه صادر بوسُته یَ بیدد و زَأکأنَ کی معبدِ دورون فریاد کوند:«هوشیعانا، داودِ پسر» عصبانی بوبُستد ¹⁶ و اونَ بوگوفتد:«نیشتَأوی اَشَأن چی گوید؟» عیسی اوشَأنَ بوگوفت:«چره ایشتَأوم، مگر نخَأنده اید؛ "کوچی زأکأن و شیرخواره زَأکأنِ دَهَنِ جَه ستایشَ مُهیا بوکودی"» ¹⁷ بعد عیسی اوشَأنِ جَه سیوایَ بوست و شهرِ جَه بیرون بوشو، و بوشو بیت عَنیا و شبَ اویَ بِئسَه.

انجیر دار خوشکَ بِه

¹⁸ فردایی صبح وختی عیسی وَأگردَأستَأن دوبو شهر، اونَ ویشتا بوبُست. ¹⁹ جاده کنار ایتَه انجیر دار بیده، اونِ طرف بوشو ولی جُز برگ چیزی نَأشته، پس اونَ بوگوفت:«جی اَن پس تا به اَبد میوه نَأوری.» هو لحظه اون درخت خوشکَ بوست. ²⁰ شاگردان خیلی تعجب بوکودد و وَأورسد:«چره اَ درخت اَقدر زود خوشکَ بوست؟» ²¹ عیسی جواب بدَه:«شمرَه گویم یقین بدَأنید کی اگر ایمان بدأرید و شک نوکونید، نه فقط اَ کاری کی اَ انجیرِ درختِ اَمرَه بوبُست کودید، بلکی هر وخت اَ کوهَ گوفتید؛ "جابجا بوبون و دکف دریا میَأن" انجام بوسته. ²² شومَأن هر چی دوعا میَأن بخَأئید انجام بِه، بشرطی کی ایمان بدَأرید.»

سوال دربارۀ عیسی اقتدار

²³ وختی بوشو معبدِ دورون و تعلیم دَئه، کاهنانِ سران و قؤمِ یهودِ شِیخَأن اونِ ورجَه بأمود و بوگوفتد:«کَ اِختیارِ اَمرَه اَ کارانَ کونی، و کیه کی ترَه قدرت بدَه دَأره؟» ²⁴ عیسی اوشَأنَ جواب بدَه:«منم شیمی جَه ایتَه چی وَأورسم. اگر می جوابَ بدید منم شمرَه گویم کی کَ اختیارِ اَمرَه اَ کارانَ کونم.» ²⁵ تعمیدی کی یحیی دَئِه کَ یَ جَه بو؟ آسمانِ جَه یا انسانِ طرفِ جَه؟» اوشَأن همدیگرِ مرَه مشورت بوکودد و خوشَأنِ مرَه بوگوفتد:«اگر بوگوئیم آسمانِ جَه، گویه پس چره اونَ ایمان نَأوردید، ²⁶ اگر بوگوئیم انسانِ طرفِ جَه، مردمِ جَه ترسیم، چون همه اونَ خدا پیغمبر دَأند.» ²⁷ هَنه وَسی عیسی یَ جواب بدَأد:«اَمَأن نَأنیم.» عیسی هم اوشَأنَ بوگوفت:«منم شمرَه نوگویم کی کَ قدرتِ اَمرَه اَ کارانَ کونم.

دو تَه پسرِ مثال

²⁸ ولی شیمی نظر در اَنباره چیسه؟ اینفر دو تَه پسر دَأشته. اون بوشو خو پیله پسرِ ورجَه و بوگوفت؛ "پسرجان امروز بوشون تاکستان و کار بوکون" ²⁹ پسر جواب بده؛ "نوشوم" ولی بعد پشیمانَ بوست و بوشو. ³⁰ بعد خو کوچی پسرَ هَ حرفَ بزَه، اون جواب بده؛ "حتماً شؤم آقاجان." ولی هیچموقع نوشو. ³¹ کَ ی تَه از اَ دو نفر خوشَأنِ پئرِ خواهشَ بجا بأوردد؟» اوشَأن عیسی یَ جواب بدَأد:«اولی» عیسی اوشَأنَ بوگوفت:«شمرَه گویم یقین بدَأنید فاحشه یان و باجگیران زودتر از شومَأن شُد خدا ملکوتِ دورون. ³² چون یحیی عدالتِ راه جَه بأمو شیمی ورجَه و شومَأن اونِ حرفانَ باور نوکودید، ولی باجگیران و فاحشه یان باور بوکودد، شومَأن با اَنکی بیده اید بازم پشیمان نوبوستید و ایمان نَأوردید.

باغبانانِ شریرِ مثال

³³ ایتَه مثالِ دیگرَ بیشتَأوید؛ ایتَه ارباب تاکستانی چَأکود و اونِ دورَ حصار فَأکشه و ایتَه حوضم اَنگورِ آب گیفتنِ رِه اونِ دورون چَأکود، ایتَه برجِ دیده بانی هم اونِ میَأن چَأکود. بعد اونَ فَأدَه باغبانانِ دس و بوشو سفر. ³⁴ انگورچینی موقع، خو غلامانَ باغبانانِ ورجَه اوسَه کود تا خودشِ میوه سهمَ فأگیره. ³⁵ ولی باغبانان اونِ غلامانَ بیگفتد، بعضیانَ بزَد و بعضیانَ بوکوشتد و بعضیانَ سنگسار بوکودد. ³⁶ ارباب ایبار دیگر چن نفر ویشتر از خو غلامانَ اوسَه کود. اوشَأنِ اَمرَه هم هَطو رفتار بوکودد. ³⁷ آخرسر خو پسرَ باغبانانِ ورجَه اوسَه کود، و خو مرَه بوگوفت:«اوشَأن می پسرِ احترامَ دَأرد.» ³⁸ ولی وختی باغبانان اونِ پسرَ بیددْ خوشَأنِ مرَه بوگوفتد:«اَن وارثه، بأئید اونَ بوکوشیم و اونِ میراثَ صاحاب بیبیم.» ³⁹ پس اونَ تاکستانِ جَه بیرون بوبوردد و بوکوشتد. ⁴⁰ هسَه به نظرِ شومَأن، وختی تاکستانِ صاحاب بَأیه، اون باغبانانِ اَمرَه چی کونه؟» ⁴¹ اوشَأن جواب بدَأد:«اون آدمایِ بی رَحمَ بی رَحمی اَمرَه جی میَأن بوره و باغَ فَأده باغبانایِ دیگرِ دس تا اَنگورچینی موقع اونِ سهمَ اونَ فأدد.» ⁴² عیسی اوشَأنَ بوگوفت:«مگر هیچموقع کیتابِ دورون نخَأنده اید "اون سنگی کی بنّایان ردَ کودد، هون ساختمانِ اصلی سنگ بوبُست. اَن خداوندِ کاره و اَمی نظر عجیب اَیه. ⁴³ پس شمرَه گویم کی خدا ملکوتْ شیمی جَه فَأگیفته بِه و اُمتی دس فَأده بِه کی اونِ محصولِ جَه، خدا سهمَ خدایَ فَأدد. ⁴⁴ هر کی اونْ سنگِ رو بکفه خوردَ بِه، و اگر اونْ سنگْ کسی رو بکفه، اونَ لِه کونه.» ⁴⁵ وختی کاهنانِ سران و فریسیان اَ مثالانَ بیشتَأوستد، بفهمستد کی دربارۀ اوشَأن گویه. ⁴⁶ اوشَأن خَأستد اونَ بیگیرد، ولی مردمِ جَه ترسِئدْ چون مردمْ اونَ پیغمبر دَأنستد.