20

¹ آسمانِ ملکوتْ صاحاب باغی یَ مَأنه کی صبحِ زود بیرون بوشو تا خو تاکستانِ رِه کارگر بیگیره. ² بعدِ اَنکی هر روزِ رِه یک دینار قرار دَوَستد، کارگرانَ بوبورد خو تاکستان. ³ ساعت نُه صبح دوباره بوشو بیرون و بازارِ میَأن کاگرانی یَ بیده کی بیکار ایسَأ بود. ⁴ اوشَأنَ بوگوفت:«شومَأنم بیشید باغ، اونچی کی شیمی حق بیبه شمرَه فأدم.» ⁵ ظهرِ موقع و ساعت سه بعدازظهر هم بوشو بیرون و هَ کارَ بوکود و باز چن نفرَ اوسَه کود باغِ دورون کار بوکوند. ⁶ و یکساعت بمَأنسته بو کی شب دکفه باز بوشو بیرون و بیده چن نفر بیکار ایسَأد، اوشَأنَم بوگوفت:«چی وَسی همۀ روزَ اَیَ بیکار ایسَأئید؟» ⁷ اوشَأن جواب بدَأد:«چون هیچکس اَمرَه کارْ فَأنده.» صاحاب باغ بوگوفت:«شومَأنم بیشید می تاکستانِ دورون کار بوکونید، شیمی حقَ شمرَه فَأدم.» ⁸ وختی غروب بوبُست، صاحاب باغ خو مُباشرَ بوگوفت:«کارگرانَ دخَأن، و از آخرین نفر شروع بوکون تا اولین نفر، همه تَه حقوقَ اوشَأنَ فَأدن.» ⁹ پس اوشَأنی کی فقط یکساعتِ آخر بأمو بود کارِ سرْ بأمود جولو و هر کودام ایتَه روزِ کاملِ حقوقَ فَأگیفتد. ¹⁰ وختی کسانی نوبت فأرسه کی اول از همه بأمو بود، انتظار دَأشتد دیگرانِ جَه ویشتر فَأگیرد، ولی اوشَأنَ هم یک دینار فأدَه بوبُست. ¹¹ اوشَأن صاحاب باغَ اعتراض بوکودد و بوگفتد: ¹² «تو اَشَأنَ کی آخر از همه بأمود و فقط یکساعت کار بوکوددَ اَمی اَمرَه کی همۀ روزَ گرما میَأن کار بوکودیم برابر بوکودی؟» ¹³ صاحاب باغ جواب بدَه:«رِفِق جان، من ترَه ظلمی نوکودم، مگر تو قبول نوکودی روزی یک دینارِ اَمرَه کار بوکونی؟ ¹⁴ پس تی مُزدَ فَأگیر و بوشون. می دیل خَأیه اَن آخری یَ تی اندازه حقوق فأدم. ¹⁵ آیا حق نَئرم می پولِ اَمرَه اونچی کی می دیل خَأیه اَنجام بدم؟ چره چوم نَئری می بخششَ بیدینی؟" ¹⁶ بله، اَطو اوشَأنی کی اولد آخر بود، و اوشَأنی کی آخرد اول، چون دعوت بوبُسته یان زیادد ولی اوشَأنی کی انتخاب بهد، کم.»

سومین پیشگویی دربارۀ مرگ و رستاخیز

¹⁷ وختی عیسی شوئون دوبو اورشلیم خو دوازدَه شاگردَ فأکشه کنار و اوشَأنَ بوگوفت: ¹⁸ «هَسَه شوئون دَأریم اورشلیمِ طرف، و انسانِ پسرَ کاهنانِ سران و یهودِ مُلایانِ دس تسلیم کوند، و اوشَأنْ اونَ مرگَ محکوم کوند ¹⁹ و غریبه یانَ تحویل دهد. اوشَأنم اونَ مسخره کوند و شلاق زندْ و مصلوب کوند؛ و روزِ سومِ رِه ویریزه.

یوحنا و یعقوبِ مارِ درخواست

²⁰ هَ موقع پسرانِ زِبدی مارْ خو پسرانِ اَمرَه بأمو عیسی ورجَه و اونَ تعظیم بوکود، و اونِ جَه بخَأست کی اونِ خواهشَ قبول بوکونه. ²¹ عیسی وَأورسه:«چی خَأیی؟» بوگوفت:«بفرما تا تی ملکوتِ دورونْ می دو تَه پسر ایتَه تی راست طرف و ایتَه هم تی چپِ طرف بینیشینه.» ²² عیسی جواب بدَه:«نَأنید چی خَأئید. آیا تَأنید اون پیاله ایی جَه کی من خورم شومَأنم بوخورید و اون تعمیدی کی من گیرمْ شومَأنم بیگیرید؟» اونَ بوگوفتد:«بله تَأنیم.» ²³ عیسی اوشَأنَ بوگوفت:«دوروسته، شومَأن اون پیاله ایی کی من خورمِ جَه خورید و اون تعمیدی کی من گیرم هم گیرید. ولی نیشتَن می راست طرف و می چپِ طرف، می دس دینّنی کی کسی یَ فَأدم، مگر کسانی کی من پئرِ طرفِ جَه قبلاً اوشَأنِ رِه آمادهَ بوسته.» ²⁴ وختی اونْ ده تَه شاگردِ دیگر موضوعَ بیشتَأوستد خیلی ناراحتَ بوستد. ²⁵ پس عیسی اوشأنَ خو ورجَه دخَأد و بوگوفت:«شومَأن دَأنید کی دیگر قؤمَأنِ حاکمانْ خوشَأنِ مردمِ رو پیله تری کوند و اوشَأنِ رَئیسانْ مردمَ دستور دهد. ²⁶ ولی شیمی میَأن اَطو نیبه، بلکی هر کی خَأیه شیمی میَأن پیله بیبه وَأستی دیگرانِ خادم بیبه. ²⁷ و هر کی خَأیه همه تَه بوجُرتر بیبه، وَأستی همه تَه غلام بیبه. ²⁸ هوطویی کی انسانِ پسر نَأمو کی خدمت بیبه، بلکی بأمو تا خدمت بوکونه و خو جانَ خیلیانِ نجاتِ وَسی قربانی بوکونه.»

دو تَه کورِ شفا

²⁹ وختی عیسی و اونِ شاگردان شهرِ اَریحایِ جَه بیرون شوئون دوبود، خیلی از مردم اوشَأنِ دونبال راه دکفتد. ³⁰ هَ موقع دو تَه کور راه کنار نیشته بود و وختی بیشتَأوستد عیسی اویِ جَه ردَ بِه فریاد بزَد و بوگوفتد:«ای آقا، ای داودِ پسر، اَمرَه رَحم بوکون.» ³¹ مردم سعی بوکودد اوشَأنَ ساکتَ کوند ولی اوشَأن خوشأنِ صدایَ بلندترَ کودد و بوگوفتد:«ای آقا، ای داودِ پسر، اَمرَه رَحم بوکون.» ³² عیسی بِئسَه و اون دو نفرَ دخَأد و وَأورسه:«چی خَأئید شمرِه انجام بدم؟» ³³ اوشَأن بوگوفتد:«ای آقا، خَأئیم اَمی چومَأن بازَه بِه.» ³⁴ عیسی دیلْ اوشَأنِ رِه بوسوخت و اوشَأنِ چومَأنَ لمس بوکود، هو لحظه اوشَأنِ چومَأن بازَه بوست و بتَأنستد بیدیند و عیسی دونبال راه دکفتد.