19

¹ وختی عیسی اَ حرفانَ تومامَ بوست جلیلَ ترکَ کود و بوشو نواحی یهودیه کی اُردنِ رودِ اوطرف نَهَه بو. ² جمعیتِ زیادی هم اونِ دونبال راه دکفتد و اونْ اوشَأنِ مریضانَ شفا دَأئه. ³ بعضی از فریسیان بأمود تا اونَ امتحان بوکوند، اوشَأن بوگوفتد:«آیا جایز ایسه کی مردْ خو زنَ طلاقَ دِه؟» ⁴ عیسی اوشَأنِ جَه وَأورسه:«آیا نخَأنده اید کی خالقْ هون اول اوشَأنَ زن و مرد خلق بوکود؟ و بوگوفت؛ "هَنه وَسی مردْ خو پئر و مارَ ترکَ کونه و خو زنِ اَمرَه پیوند خوره و اون دو تَه، ایتَه تنْ بِهد؟" ^{5 6} پس دِ دو تَه نییِدْ بلکی ایتَه ید. پس اونچی کی خدا پیوند بزَه یَ انسانْ سیوایَ نوکونه.» ⁷ اوشَأن عیسی جَه وَأورسد:«پس چی وَسی موسی بوگوفت کی مردْ خو زنَ طلاقنامه فأده و اونَ ولَ کونه؟» ⁸ عیسی جواب بدَه:«موسی شیمی سنگ دیلی وَسی وَأهَأشت کی شیمی زنَ طلاقَ دید، ولی از اول اَطو نوبو. ⁹ ولی من شمرَه گویم هر کی خو زنَ به هر علتی به غیرِ زِنا طلاق بده و زنِ دیگری اَمرَه ازدواج بوکونه، زنا بوکوده.» ¹⁰ شاگردان اونَ بوگوفتد:«اگر مردِ حُکم اَنه، اصلاً بهتره کی آدم ازدواج نوکونه.» ¹¹ عیسی بوگوفت:«همه نتَأند اَ حرفَ قبول بوکوند مگر کسانی کی اوشَأنَ عَطا بوبُسته.» ¹² بعضی مادرزادی جوری بودونیا اَید کی نتَأند ازدواج بوکوند، بعضیانم انسانِ دسِ اَمرَه ناقص بود و نتَأند ازدواج بوکوند، بعضیانم خودشان آسمانِ ملکوتِ وَسی ازدواج نوکوند، پس هر کسی تَأنه اَنجام بدهْ قبول بوکونه.»

عیسی و زَأکأن

¹³ اَ موقع چن تَه کوچی زأیَ بأوردد عیسی ورجَه تا اون خو دسَ اوشَأنِ رو بنه و دوعا بوکونه، ولی شاگردان اوشأنَ سرزنش بوکودد. ¹⁴ عیسی بوگوفت:«وَألید زأکأنْ می ورجَه بَأید و اوشَأنِ مانع نیبید، چون آسمانِ ملکوتْ اَجور کسانِ شینه.» ¹⁵ بعد خو دسَ اوشَأنِ رو بنَه و از اویَ بوشو.

جوانِ ثروتمند

¹⁶ اَ موقع اینفر بأمو عیسی ورجَه و وَأورسه:«ای اُستادِ خوب، چی بوکونم تا حیاتِ جاودانی یَ بدس بأورم؟» ¹⁷ عیسی بوگوفت:«چره مرَه خوب دخَأدی در حالی کی هیچکس خوب نییه جُز خدا، ولی اگر خأیی حیاتِ جاودانی یَ وارد بیبی اَحکامَ بدَأر.» ¹⁸ اون مرد وَأورسه:«کَ ی تَه اَحکامَ؟» عیسی بوگوفت:«قتل نوکون، زِنا نوکون، دوزدی نوکون، شهادتِ دوروغ ندن، ¹⁹ تی پئر و مارَ احترام بنن و تی همساده یَ خودتِ مَأنستَأن دوس بدأر.» ²⁰ اون جوانْ جواب بدَه:«من همۀ اَشَأنَ بدأشته دَأرم، دِ چی کم دَأرم؟» ²¹ عیسی اونَ بوگوفت:«اگر خَأیی کامل بیبی، بوشون هر چی دَأری یَ بوفروش و فَأدن فقیرانَ، اونموقع آسمانِ میَأن گنجی دَأری، بعد بیأ و مرَه پیروی بوکون.» ²² وختی اون جوان اَ حرفَ بیشتَأوست ناراحتَ بوست و از اویَ بوشو، چره کی مالِ و اَموالِ زیادی دَأشته. ²³ عیسی خو شاگردانَ بوگوفت:«شمرَه گویم یقین بدَأنید کی ایتَه ثروتمند به سختی آسمانِ ملکوتَ بودورون شِه، ²⁴ و باز شمرَه گویم، ایتَه شُترْ سوزنِ سوراخِ جَه راحت تر ردَ بِه تا ایتَه ثروتمند بتَأنه خدا ملکوتَ وارد بیبه.» ²⁵ شاگردان اَ حرفِ جَه خیلی تعجب بوکودد و وَأورسد:«پس کی تَأنه نجات پیدا کونه؟» ²⁶ عیسی اوشَأنَ فأندرست و بوگوفت:«انسانِ ورجَه اَن محاله، ولی خدا ورجَه همه چیز ممکنه.» ²⁷ اونموقع پطرس جواب بده:«اَمَأن همۀ اَمی زندگی یَ ولَ کودیم و ترَه پیروی کونیم، اَمرَه چی فأرِسه؟» ²⁸ عیسی جواب بدَه:«شمرَه گویم یقین بدَأنید اون دونیا دورون وختی انسانِ پسر خو تختِ پور جلالِ رو بینیشینه، شومَأن دوازدَه تختِ رو نیشینید و اسرائیلِ دوازدَه قبیله یَ داوری کونید. ²⁹ هر کی می وَسی خو خانه، یا خو برأرأن، یا خأخوران، یا پئرَ یا مارَ یا زنَ یا خو زأکأنَ یا خو زمینانَ ترکَ کونه، صد برابر ویشتر دریافت کونه و حیاتِ جاودانی وارث بِهه. ³⁰ ولی خیلیان کی هسَه اولدْ آخر بهد، و کسانی کی هَسَه آخردْ اول.»