18

¹ در اَنموقع شاگردان بأمود عیسی ورجَه و وَأورسد:«آسمانِ ملکوتِ میَأن کیی همه تَه جَه پیله تره؟» ² عیسی ایتَه کوچی طفلَ دخَأد و اوشَأنِ میَأن بپا بدَأشت ³ و بوگوفت:«شمرَه گویم یقین بدَأنید اگر وَأنگردید و کوچی زأکأنِ مَأنستَأن نیبید هیچموقع آسمانِ ملکوتَ بودورون نیشید. ⁴ پس هر کی خورَه اَ زَأیِ مَأنستَأن فروتن بوکونه، هونْ آسمانِ ملکوتِ دورون همه تَه جَه پیله تره. ⁵ و هر کس می وَسی اَ زأکأنَ قبول بوکونه، مرَه قبول بوکوده. ⁶ و هر کس باعث بیبه ایتَه از اَن زأکأنْ کی مرَه ایمان دَأره لغزش بوخوره، اونِ رِه بهتر بو کی ایتَه پیلدانه سنگِ آسیابْ اونِ گردن دَوَسته بوبُسته بِو و دریا میَأن غرقَ بوسته بو. ⁷ وای بر اَن جهان اَ لغزشانِ وَسی، البته اَ لغزشان همیشه پیش اَیه، ولی وای بر کسی کی اَ لغزشانِ باعث بِه. ⁸ پس اگر تی دسْ یا تی پا باعث بیبه تو گوناه بوکونی، اونَ قطعَ کون و فیشَأن، چون تِره بهتره کی بی دست و یا بی پا حیاتِ جاودانی یَ داخل بیبی تا اَنکی دو دسِ اَمرَه آتشِ جاودانی میَأن تَأوَأده بیبی. ⁹ اگر تی چومْ باعث بیبه گوناه بوکونی، اونَ بیرون بأور و فیشَأن، چون ترِه بهتره کی ایتَه چومِ اَمرَه حیاتِ جاودانی یَ داخل بیبی تا اَنکی دو تَه چومِ اَمرَه آتشِ جهنمِ دورون تَأوَأده بیبی.

گومَه بوسته گوسفندِ مثال

¹⁰ هیچموقع اَن کوچی زأکأنَ حقیر ندَأنید، چون شمرَه گویم کی اَشَأنِ فرشته یان، آسمانِ میَأنْ همیشه می پئرِ صورتَ کی آسمانِ میَأن ایسَه دیند. ¹¹ انسانِ پسر بأمو تا گومَه بوسته یانَ نجات بده. ¹² شومَأن چی فکر کونید؟ اگر کسی صد تَه گوسفند بدَأره و ایتَه از اوشَأن گومَه بِه، آیا اون نود و نُه تَه یَ کوهانِ میَأن ولَ نوکونه بیشه اون گومَه بوسته گوسفندِ دونبال بگرده؟ ¹³ شمرَه گویم یقین بدَأنید وختی اونَ پیدا کونه، اون ایتَه وَسی ویشتر خوشحالَ بِه تا اون نود و نُه تَه رِه کی گومَه نوبوسته بود. ¹⁴ و هَطو شیمی پئرِ آسمانی اِراده اَن نییه کی حتی ایتَه از اَن کوچی دانه یان هلاک بیبه.

طرزِ برخورد برأرِ خطاکارِ مرَه

¹⁵ اگر تی برأر ترَه بدی بوکونه بوشو و خلوتی اونِ اَمرَه گب بزن و اونِ کارِ اشتباهَ اونَ بوگو، اگر تی حرفَ گوش بدَه تی برأرَ باز بدس بأورده ایی. ¹⁶ و اگر تی حرفَ گوش ندَه، اینفر یا دو نفرَ تی اَمرَه بوبور کی هر حرفی "دو یا سه شاهدِ اَمرَه ثابت بِه." ¹⁷ و اگر نخَأست اوشَأنِ حرفانم گوش بده، بوشو کلیسایَ بوگو، و اگر حاضر نوبوست کلیسایَ گوش بده، اونِ اَمرَه ایتَه بیگانه مَأنستَأن رفتار بوکون. ¹⁸ مطمئن بیبید هر چی زمینِ رو دَوَدید، آسمانِ میَأن دَوَسته بِه، و هر چی زمینِ رو وا کونید، آسمانِ میَأن واکوده بِه. ¹⁹ باز شمرَه گویم هر وخت دو نفر از شومَأن زمینِ رو دربارۀ اونچی کی خدا جَه خَأیِد یکدل بوبود، می پئرِ آسمانی اونَ، اوشَأنِ رِه انجام دِهه، ²⁰ چون هر جا کی دو یا سه نفر به می نام جمعَ بود، من اویَ اوشَأنِ میَأن حاضرم.»

خادمِ بی رَحمِ مثال

²¹ در اَنموقع پطرس پیش بأمو و وَأورسه:«خداوندا، وختی می برأر مرَه بدی کونه چن مرتبه وَأستی اونَ ببخشم؟ آیا هفت بار؟» ²² عیسی اونَ جواب بدَه:«نوگویم هفت بار، بلکی هفتاد مرتبه هفت بار. ²³ آسمانِ ملکوتْ ایتَه پادشاهَ مَأنه کی تصمیم بیگیفت خو غلامانِ اَمرَه تسویه حساب بوکونه. ²⁴ وختی اَ کارَ شروع بوکود، اینفرَ اونِ ورجَه بأوردد کی شصت میلیون دینار اونَ بدهکار بو. ²⁵ ولی چون پول نَأشته خو قرضَ فَأده، اونِ ارباب دستور بدَه کی اونَ، اونِ زنُ زأیِ اَمرَه و همۀ اونِ مال و اَموالِ اَمرَه بوفروشد تا خو طلبَ اوسَأنه. ²⁶ ولی اون غلام خو اربابِ پا جیر سُجده بوکود و التماس بوکود و بوگفت:«ای آقا، مرَه مُهلت بدن تا همۀ می بدهکاری یَ تا آخر ترَه فَأدم.» ²⁷ اربابِ دیل بوسوخت و اونِ دیل رَحم بأمو، و اونَ آزادَ کود و خو طلبم ببخشه. ²⁸ ولی وختی اون غلام بیرون بوشو، ایتَه از خو همکارانَ بیده کی اونِ جَه صد دینار طلب دَأشته، اونَ بیگیفت و اونِ گولویَ فیشار بدَه و بوگوفت:«آهان یالا، تی قرضَ فَأدن.» ²⁹ اونِ همکار بکفت اونِ پا جیر و التماس بوکود و بوگوفت:«مرَه مهلت بدن همه یَ ترَه فَأدم.» ³⁰ ولی اون قبول نوکود و اونَ تَأوَأده زندان تا خو قرضَ فَأده. ³¹ وختی باقی غلامان اَ ماجرایَ بیشتَأوستد خیلی ناراحتَ بوستد و بوشود اونچی کی بوبُسته بویَ خوشَأنِ ارباب رِه بوگوفتد. ³² ارباب اون مردَ بخأست و بوگوفت:«ای غلامِ شریر، آیا تی التماسِ وَسی همۀ تی قرضَ نبخشِم؟ ³³ آیا نوَأستی هوطویی کی من ترَه رَحم بوکودم تونم تی همکارَ رَحم بوکوده بی؟» ³⁴ ارباب ناراحتَ بوست و اون غلامَ تَأوَأده زندان و دستور بدَه تا وختی همۀ خو قرضَ فَأندَه دَأره آزاد نیبه. ³⁵ بله، می پئرِ آسمانی هم شیمی اَمرَه هَطو رفتار کونه، اگر شومَأن شیمی برأرَ از تَه دیل نبخشید.»