17
عیسی چهره تبدیل بِهه
1
شیش روز بعدْ عیسی پطرس و یعقوبْ و اونِ برأر یوحنایَ اوسَأد و خو مرَه بوبورد ایتَه کوه جُر خلوتِ جا.
2
اویَ عیسی ظاهرْ اوشَأنِ چومِ جولو وَأگردست و اونِ صورت آفتابِ مَأنستَأن درخشانْ و اونِ لباس نورِ مَأنستَأن سفیدَ بوست.
3
هَ موقع موسی و الیاس ظاهرَ بوستد و عیسی مرَه گب بزَد.
4
اونموقع پطرس عیسی یَ بوگوفت:«خداوندا، اَمی ایسَأن اَیَ چقدر خوبه، اگر بخَأیی سه تَه سایبان چَأکونیم، ایتَه تِره ایتَه موسی رِه و ایتَه هم الیاسِ رِه.»
5
هنوز پطرسِ حرف تومامَ نوبوسته بو کی ایتَه اَبرِ درخشانْ اوشَأنِ رو سایه تَأوَأده و صدایی اَبرِ جَه بأمو کی گوفته:«اَنه می عزیزه پسر کی اونِ جَه راضیم، اونَ گوش بوکونید.»
6
وختی شاگردان اَ صدایَ بیشتَأوستد بکفتد زمینِ رو و از ترس بپرکستد.
7
عیسی نزدیکَ بوست و اوشَأنِ رو دس بنَه و بوگوفت:«ویریزید، دِ نترسید.»
8
وختی شاگردان خوشأنِ چومَأنَ بازَه کودد به غیرِ عیسی کسی یَ نیدد.
9
وختی کوه جَه بیجیر اَموده، عیسی اوشَأنَ قدغن بوکود و بوگوفت:«تا انسانِ پسر مُرده یانِ جَه وینریشته، دربارۀ اَ رویا کسی یَ چیزی نوگوئید.»
10
اونِ شاگردان وَأورسد:«پس چی وَسی مُلایان گوید اول وَأستی الیاس بَأیِه؟»
11
عیسی جواب بدَه:«البته الیاس اَیه و همه چیَه اصلاح کونه.
12
ولی من شمرهَ گویم کی الیاس بأمو و اونَ نشناختد، و اونچی کی بخَأستد اونِ اَمرَه بوکودد، انسانِ پسرم هَطو اوشَأنِ دسِ جَه رنج و زحمت دینه.»
13
اونموقع شاگردان بفهمستد کی دربارۀ یحیایِ تعمید دهنده گب زنه.
دیوانه پسره شفا
14
وختی عیسی و اونِ شاگردان وَأگرستد مردمِ ورجَه، اینفر پیش بأمو و عیسی جولو زانو بزَه و بوگوفت:
15
«ای آقا، می پسرَ رَحم بوکون، اون غَشی یه و سخت عذاب کشه. جوری کی هَمش دکفه آب و آتشِ دورون.
16
اونَ بأوردم تی شاگردانِ ورجَه ولی نتَأنستد اونَ شفا بدد.»
17
عیسی جواب بده:«ای مردمِ بی ایمان و مُنحرف، تا کِی شیمی اَمرَه بئسم و چقدر شمرَه تحمل بوکونم؟ اونَ بأورید می ورجَه.»
18
پس عیسی توندی اَمرَه دیوانَ دستور بده اونِ جَه بیرون بوشود، هو لحظه اونِ پسر شفا پیدا کود.
19
بعداً عیسی شاگردان خلوتی اونِ جَه وَأورسد:«چره اَمَأن نتَأنستیم اون دیوَ بیرون تَأوَأدیم؟»
20
عیسی جواب بدَه:«چون شیمی ایمان کمه! شمرَه گویم بدَأنید اگر ایتَه خردلِ دانه اَقدر ایمان بدَأشته بید، اَن کوهَ گوفتید اَیَ جَه جابجا بوبون، و جابجا بوسته و هیچ چیزی شمرِه مَحال نوبو،
21
ولی اَ جنس روح، بیرون نیشه مگر دوعا و روزه اَمرَه.»
عیسی دومین پیشگویی دربارۀ خودشِ مرگ و رستاخیز
22
وختی اوشَأن هنوز جلیلِ میَأن ایسَه بود، عیسی خو شاگردانَ بوگوفت:«انسانِ پسر بزودی مردمِ دس تسلیم بِهه،
23
و اوشَأنْ اونَ کوشد، ولی روزِ سومِ رِه ویریزه.» شاگردان خیلی ناراحتَ بوستد.
24
وختی فأرسد کفرناحومَ، کسانی کی مسئول بود خدا خانه مالیاتَ جمعَ کوند بأمود پطرسِ ورجَه و اونَ بوگوفتد:«آیا شیمی اُستاد معبدِ مالیاتَ فَأنده؟»
25
پطرس بوگوفت:«بله فَأده.» وختی پطرس وأگردست بخانه، قبلِ اَنکی چیزی بوگویه عیسی اونَ بوگوفت:«ای شمعون، چی فکر کونی؟ اَ جهانِ پادشاهان چه کسانی جَه باج و خراج گیرد؟ خوشَأنِ زأکأنِ جَه یا بیگانه یانِ جَه؟»
26
پطرس بوگوفت:«بیگانه یانِ جَه» عیسی اونَ بوگوفت:«پس زأکأن معافد!»
27
ولی اَنِ وَسی کی اَشأنَ ناراحتَ نوکونیم بوشو دریا کنار، و قارماق تَأوَأد دریا میَأن، وختی اولین ماهی یَ بیگیفتی اونِ دهَنَ بازَه کون ایتَه سکه چهار درهمی پیدا کونی، اونَ اوسَأن و می مالیات و خودتِ مالیاتِ سهمَ اوشَأنَ فَأدن.»