16
مُعجزه درخواست
1
اونموقع فریسیان و صَدوقیان بأمود عیسی ورجه و اونِ امتحان کودَأنِ وَسی اونِ جَه بخَأستد تا ایتَه معجزه اوشَأنَ نشان بده.
2
عیسی اوشَأنَ جواب بدَه:«غروب دمِ رِه اگر آسمانْ سُرخ بیبه شومَأن هوایَ پیش بینی کونید و گوئید "هوا خوبه"،
3
و اگر صبحِ رِه آسمان سُرخ بیبه، شومَأن گوئید "امروز هوا خرابه". شومَأن کی تَأنید آسمانِ دِئِنِ مرَه هوایَ پیش بینی بوکونید، چوطو نتَأنید اَ زمانِ علامتانُ نشانه یانَ بفهمید؟
4
اَ قؤمِ گوناهکار و زِناکار معجزه خَأیه، ولی معجزه ایی اوشَأنَ عطا نیبه جُز یونسِ نبّی معجزه.» و عیسی اوشَأنِ جَه سیوایَ بوست و بوشو.
فریسیان و صَدوقیانِ خمیرمایه
5
وختی فأرسد دریا اوطرف، شاگردان جی خاطر بوبوردد کی خوشأنِ اَمرَه نان اوسَأند.
6
عیسی اوشَأنَ بوگوفت:«شیمی حواس جمع بیبه کی فریسیان و صَدوقیانِ خمیرمایه جَه دوری بوکونید.»
7
اوشَأنْ خوشأنِ میَأن بحث بوکودد و بوگوفتد:«چون نان اونسَأدیم اَ حرفَ بزه.»
8
عیسی بفهمست کی چی گویدْ و بوگوفت:«ای کم ایمانان، چره دربارۀ اَنکی نان نَئرید بحث کونید؟
9
آیا هنوزم نفهمید؟ شمرَه اون پنج تَه نان و پنج هزار نفر یاد نَأیه، چن تَه زنبیل جمعَ کودید؟
10
یا اون هفتَ نان و چهار هیزار نفر، چن تَه زنبیل جمعَ کودید؟
11
پس چره نتَأنید بفهمید کی من دربارۀ نانْ شیمی مرَه حرف نزم؟ من فقط بوگوفتم کی فریسیان و صَدوقیانِ خمیرمایه جَه دوری بوکونید.»
12
آخرسر شاگردان بفهمستد کی دربارۀ فریسیان و صَدوقیانِ تعالیمْ بوگوفته بو، نه دربارۀ نانِ خمیرمایه.
پطرسِ اعتراف دربارۀ عیسی
13
وختی فأرسد قیصریه فیلیپُسِ اَطراف، عیسی خو شاگردانِ جَه وَأورسه:«مردمْ مرَهْ کی انسانِ پسرمْ کیی دَأند؟»
14
اوشَأن جواب بدَأد:«بعضی یحیایِ تعمید دهنده و بعضی الیاس و بعضی اِرمیا یا ایتَه از پیغمبران.»
15
عیسی وَأورسه:«شومَأن مرَه کیی دَأنید؟»
16
شمعونِ پطرس جواب بدَه:«تویی مسیحْ، خدایِ زنده پسر»
17
عیسی اونَ بوگوفت:«خوش به حال تو ای شمعونْ یونا پسر، چون اَنَ جسم و خون ترَه آشکارَ نوکود، بلکی می پئر کی آسمانِ میَأن ایسَه.
18
و منم ترَه گویم کی تویی پطرس، و من اَن صخره رو می کلیسایَ چَأکونم و جَهنمِ درَأنْ اونِ رو قدرت نَئرد.
19
و آسمانِ ملکوتِ کلیدانَ ترَه فَأدم، و اونچی کی زمینِ رو دَوَدی آسمانِ میَأن دوَسته بِه و اونچی کی زمینِ رو وَأکونی، آسمانِ میَأن واکوده بِه.»
20
بعدْ خو شاگردانَ دستور بدَه کی کسی یَ نوگوید کی اون مسیحه.
عیسی پیشگویی دربارۀ خودشِ مرگ و رستاخیز
21
و عیسی آشکارا خو شاگردانَ بوگوفت کی وَأستی بیشه اورشلیمْ و شِیخانُ یهودِ مُلایانُ کاهنانِ سرانِ دسِ جَه رنج و زحمتِ زیاد بیدینهْ و اوشَأنْ اونَ بوکوشد، ولی روزِ سومِ رِه زندهَ بِهِه.
22
ولی پطرسْ اونَ فَأکشه کنار و اعتراضِ اَمرَه اونَ بوگوفت:«خدا نوکونه، ای خداوندْ هیچموقع اَ اتفاق ترِه دنکفه.»
23
عیسی وَأگردست و پطرسَ بوگوفت:«می جَه دورَ بون ای شیطان، تو می راهِ مانعی، چون تی افکار انسانیه نه الهی.»
24
بعد عیسی خو شاگردانَ بوگوفت:«اگر کسی خَأیه مرَه پیروی بوکونه، وَأستی خودشَ اِنکار بوکونه و خو صلیبَ اوسَأنه و می دونبال بأیه.
25
چون هر کس بخَأیه خو جانَ حفظ بوکونه اونَ از دس دِهه، ولی هر کس می وَسی خو جانَ از دس بده دوباره اونَ بدس اَوره.
26
انسانِ رِه چی فایده دَأره کی همۀ دونیایَ بوبوره ولی خو جانَ از دس بده؟ آدمی چی تَأنه فَأده تا دوباره خو جانَ بدس بأوره؟
27
چون انسانِ پسرْ خو پئرِ جلالِ میَأنْ خو فرشته یانِ اَمرَه اَیه و هر کسی یَ اونِ اعمالِ وَسی پاداش فَأده.
28
شمره گویم یقین بدَأنید بعضیان هَ یَ ایسأد کی تا انسانِ پسرَ نیدیند کی خو ملکوتِ دورون اَیه، مرگِ طعمَ نچشد.»