15

^{1 2} بعد ایتَه گروه از فریسیان و یهودِ مُلایان از اورشلیم بأمود عیسی ورجَه و بوگوفتد:«چره تی شاگردان شِیخانِ جَه تقلید نوکوند؟ چره اوشَأنْ قبلِ غذا خوشَأنِ دسَأنَ نوشورد.» ³ عیسی اوشَأنَ جواب بدَه:«چره شومَأن اَنِ وَسی کی شیخانِ جَه تقلید بوکونید خدا حُکمَ ایشکینید؟ ⁴ چون خدا بفرماسته دَأره؛ "تی پئر و مارَ احترام بوکون و هر کی خو پئر و مارَ فُحش بده وَأستی بیمیره." ⁵ ولی شومَأن گوئید هر کی خو پئر و مارَ بوگویه؛ "هر کمکی کی وَأستی ترَه بوکوده بِمْ خدا کارِ وَسی وقف بوکودم" ⁶ و شومَأن گوئید اَطو دِ اونَ واجب نییه کی خو پئر و مارَ رسیدگی بوکونه. و اَطو شومَأن شیمی سُنّتِ حفظ کودَأنِ وَسی، خدا کلامَ باطل کونید. ⁷ ای ریاکاران، اِشعیاء خُب دربارۀ شومَأن پیشگویی بوکود کی بوگوفت؛ ⁸ "اَ قؤمْ خوشَأنِ زبانِ اَمرَه مرَه احترام نهد، ولی اوشَأنِ دیل می جَه دوره. ⁹ اوشَأنْ هَچین مرَه عبادت کوند، چون خدا احکامِ جا، انسانانِ رَسم و رسومَ تعلیم دهد."» ¹⁰ بعد عیسی مردمَ خو ورجَه دَخَأد و بوگوفت:«مرَه گوش بدید و سعی بوکونید بفهمید، ¹¹ اونچی کی آدمی دهنِ جَه بودورون شِه اونَ نجس نوکونه، بلکی اونچی کی اونِ دَهَنِ جَه بیرون اَیه اونَ نجس کونه.» ¹² اَ موقعْ اونِ شاگردان بأمود اونِ ورجَه و بوگوفتد:«دَأنستی کی فریسیان تی حرفانِ جَه ناراحتَ بوستد؟» ¹³ عیسی جواب بدَه:«هر نهالی کی می پئرِ آسمانی نکاشته بِه، ریشه کن بِه. ¹⁴ اوشَأنَ وا بدید، اوشَأن کورانی ایسد کی کورانِ دیگرَ راهنمایی کوند، هر وخت ایتَه کور، کورَ راهنمایی بوکونه هر دو تَه دکفتد چاه دورون.» ¹⁵ پطرس عیسی یَ بوگوفت:«اَ مثالِ معنی یَ اَمرَه توضیح بدن.» ¹⁶ عیسی بوگوفت:«آیا شومَأنم هنوز درک نوکونید؟ ¹⁷ آیا نَأنید هر چی کی دهَنِ جَه آدمِ بدنَ وارد بِه، شِه شکمِ دورون و بعداً دفع بِهه؟ ¹⁸ ولی اونچی کی دهنِ جَه بیرون اَیه آدمی دیلِ جَه سرچشمه گیرهْ و اَ چیزانه کی آدمَ نجس کونه، ¹⁹ چون دیلِ جَه یه کی فکرایِ بد و قتل و زِنا و بی عفتی و دوزدی و شهادتِ دوروغ و اِفترا سرچشمه گیره. ²⁰ اَ چیزانه کی انسانَ نجس کونه، نه نوشوسته دستِ اَمرَه غذا خوردَأن.»

زنِ غیرِیهودی ایمان

²¹ عیسی از اویَ بوشو منطقۀ صور و صِیدون. ²² روزی ایتَه زنِ کنعانی کی اویَ زندگی کوده بأمو عیسی ورجَه، و التماس اَمرَه بوگوفت:«ای آقا، ای داودِ پسر، مرَه رَحم بوکون، می دختر بدجور دیوانَه بوسته.» ²³ ولی عیسی هیچ جوابی اونَ نده تا اَنکی اونِ شاگردان بأمود اونِ ورجَه و خواهش بوکودد و بوگوفتد:«اونَ مرخصَ کون بیشه، چون هَطو فریاد کونان اَمی دونبال اَمون دره.» ²⁴ عیسی جواب بدَه:«من اوسَه بوبُستم تا بنی اسرائیلِ گومَه بوسته گوسفندانَ پیدا کونم.» ²⁵ اونموقع اون زن پیش بأمو، و عیسی جولو زانو بزَه و بوگوفت:«ای آقا، مرَه کمک بوکون.» ²⁶ عیسی جواب بدَه:«دوروست نییه کی زأکأنِ نانَ اوسَأنیم سگأنِ جولو تَأوَأدیم.» ²⁷ زن جواب بدَه:«بله دوروست گوئید آقا، ولی سگانم خورده نانانی جَه کی اوشَأنِ اربابِ سفره جَه کفه خورد.» ²⁸ عیسی اونَ بوگوفت:«ای زن، تی ایمان عظیمه، تی دیلِ نأجِه برآورده بیبه.» هو لحظه اونِ دختر شفا پیدا کود.

چهار هزار نفرَ غذا دَئَن

²⁹ عیسی از اویَ بوشو، و از راهِ دریایِ جلیلِ ساحلْ حرکت بوکود و کوه هانَ فأرسه، اویَ بوشو ایتَه کوه جُر و بینیشت. ³⁰ و مردم دسته دسته اَموئد اونِ ورجَه و شَلانَ و کوران و لالان و فلجانْ و مریضایِ دیگرَ خوشَأنِ اَمرَه اَوردد و نَئِد اونِ پا ورجَه و اونم همه یَ شفا دَئه. ³¹ مردم وختی دِئِد لالانْ حرف زند و شلانْ سالمد و فَلجان راه شُد و کوران دیند، تعجب کودد و اسرائیلِ خدایَ ستایش کودد. ³² عیسی خو شاگردانَ دخَأد و بوگوفت:«می دیل اَ مردمِ رِه سوجِه، چون هَسَه سه روزِ کی می اَمرَه ایسَأد و دِ چیزی خوردَأنِ رِه نَئرد. نخَأیم اَشَأنَ ویشا اوسَه کونم، چون ممکنه راه میَأن ضعف بوکوند.» ³³ شاگردان بوگوفتد:«اَ بیابانِ دورون کَ یَ جَه تَأنیم اَن همه جمعیتِ رِه نان پیدا کونیم؟» ³⁴ عیسی وَأورسه:«چن تَه نان دَأرید؟ جواب بدَأد:«هفتَ نان و چن تَه کوچدَأنه ماهی.» ³⁵ عیسی مردمَ بوگوفت تا زمینِ رو بینیشیند. ³⁶ بعدْ اون هفتَ نان و چن تَه ماهی یَ بیگیفت و شُکر بوکود و نانانَ پارَه کود و خو شاگردانَ فَأده و اوشَأنم فأدد مردمَ. ³⁷ همه بوخوردد و سِئرَ بوستد و خورده نانانی کی زیاد بأمو بو جَه، هفتَ زنبیل پوره بوست. ³⁸ کسانی کی غذا بوخوردد به غیرِ زن و زأی، چهار هیزار مرد بود. ³⁹ اونموقع عیسی جمعیتَ مرخصَ کود و خودشْ کشتی یَ سوارَ بوست و بوشو منطقۀ مَجْدَل.