14

¹ در اَن موقع هیرودیسِ حاکمْ عیسی معجزاتِ خبرَ بیشتَأوست، ² اون خو خادمانَ بوگوفت:«اون یحیایِ تعمید دهنده یه کی مُرده یانِ جَه ویریشته، و هَنه وَسیه کی اَجور مُعجزه کونه.» ³ چون هیرودیس خو زنْ "هیرودیا" وَسی کی قبلاً اونِ برأرْ فیلیپُسِ زن بو، یحیایَ بیگیفته بو و زندانِ دورون دَوَسته بو. ⁴ اَن وَسی کی یحیی اونَ بوگوفته بو:«حَلال نییه تو اَن زنِ مرَه ازدواج بوکونی.» ⁵ و هیرودیسْ خَأسته اونَ بوکوشه ولی مردمِ جَه ترسِه ئه، چون مردم اونَ پیغمبر دَأنستد. ⁶ وختی هیرودیسِ جشن تولد بو، هیرودیا دخترْ مهمانانِ ورجَه رقص بوکودْ و هیرودیسَ خوش بأمو، ⁷ هَنه وَسی اون دخترِ رِه قسم بوخورد کی هر چی بخأیی ترَه فَأدم. ⁸ اونم خو مارِ راهنمایی اَمرَه بوگوفت:«هَسَه یحیایِ تعمید دهنده سرَ سینی دورون مرَه فَأدن.» ⁹ پادشاه وختی بیشتَأوست ناراحتَ بوست، ولی خو قسمِ وَسی و مهمانانِ احترامِ وَسی دستور بدَه کی یحیی سرَ اونَ فَأدد. ¹⁰ پس کسانی یَ اوسَه کود زندانِ دورون و اوشَأنْ یحیی سرَ وَأوِد، ¹¹ و اونِ سرَ ایتَه سینی دورون بنَأد و فَأدد اون دخترَ، و اونم بوبورد خو مارِ ورجَه. ¹² بعدْ یحیی شاگردان بأمود و اونِ بدنَ اوسَأدد و دفنَ کودد. بعد بوشود عیسی یَ خبر بدَأد.

پنج هزار نفرَ غذا دَئَن

¹³ وختی عیسی اَ خبرَ بیشتَأوست، کشتی یَ سوارَ بوست و بوشو ایتَه خلوتِ جا، وختی مردم خبردارَ بوستد خوشَأنِ شهرانِ جَه دسته دسته راه دکفتد و از راهِ خوشکی اونِ دونبال بوشود. ¹⁴ وختی عیسی قایقَ جَه پیادهَ بوست، بیده جمعیتِ زیادی اویَ ایسَأد، و اونِ دیلْ اوشَأنِ رِه بوسوخت و اوشَأنِ مریضانَ شفا بدَه. ¹⁵ هو روز بعدِظهری شاگردان بأمود عیسی ورجَه و بوگوفتد:«هَسَه دیروَخته و اَیَ هم بیابانه، مردمَ مُرخصَ کون تا بوشود دهاتِ اَطرافْ خوشَأنِ رِه غذا بِهِند.» ¹⁶ عیسی جواب بدَه:«لازم نییه مردم بوشود، شومَأن خودتان اوشَأنَ غذا فَأدید.» ¹⁷ شاگردان بوگوفتد:«اَمَأنْ فقط پنج تَه نان و دو تَه ماهی دَأریم.» ¹⁸ عیسی بوگوفت:«اوشَأنَ بأورید می ورجَه.» ¹⁹ بعدْ مردمَ بوگوفت کی سبزه یانِ رو بینیشیند و پنج تَه نان و دو تَه ماهی یَ بیگیفت، و آسمانَ فَأندرست و برکت بدَه، بعد نانَ پارَه کود و فَأدَه شاگردانَ و شاگردانم فَأدد مردمَ. ²⁰ همه بوخوردد و سِئرَه بوستد، وختی خورده نانانَ جمعَ کودد، دوازدَه سبد پورَه بوست. ²¹ اون جمعیتِ دورون به غیرِ زنَأکأن و زَأکأنْ فقط پنج هیزار مرد ایسَه بو.

عیسی آبِ رو راه شِه

²² اونموقع عیسی شاگردانَ بوگوفت تا کشتی یَ سوارَ بود و بوشود دریا اوطرف تا خودش مردمَ مُرخصَ کونه. ²³ وختی مردمَ مُرخصَ کود بوشو کوه جُر تا تنهایی دوعا بوکونه. اونْ تا شب اویَ تنها بو. ²⁴ هَ موقع کشتی دِ فأرسه بو دریا وسط و موجَأنَ گرفتار بو، چون بادِ مخالف اَمویه. ²⁵ بینِ ساعت سه تا شیشِ صبح بو کی عیسی، هَطو کی آبِ رو راه اَمویه اوشَأنَ نزدیکَ بوست. ²⁶ وختی شاگردان اونَ بیدد کی دریا رو راه شِه بترسد و بوگوفتد:«روحه» و از ترس فریاد بزد. ²⁷ ولی عیسی فوری اوشَأنَ دخَأد و بوگوفت:«شیمی خیال جمع بیبه، منم، نترسید.» ²⁸ پطرس اونَ جواب بدَه:«خداوندا، اگر تویی دستور بدن تا منم آبِ رو راه بوشوم بأیم تی ورجَه.» ²⁹ عیسی بوگوفت:«بیَأ» هو لحظه پطرس قایقِ جَه بیجیر بأمو و آبِ رو راه دکفت عیسی طرفْ. ³⁰ ولی وختی دریا کولاکَ بیده بترسه و آبِ دورون فرو بوشو و نزدیک بو غرقَ بِه، اون فریاد بزَه:«خداوندا، مرَه نجات بدن» ³¹ عیسی فوری اونِ دسَ بیگیفت و بوگوفت:«ای کم ایمان، چره شَک بوکودی؟» ³² وختی عیسی و پطرس قایقَ سوارَ بوستد باد قطعَ بوست. ³³ کسانی کی قایقِ دورون نیشته بود اونَ پرستش بوکودد و بوگوفتد:«تو واقعاً خدا پسری»

مریضانِ شفا جِنیسارتِ میَأن

³⁴ اوشَأنْ فأرسد سرزمینِ جِنیسارتَ و ساحلِ دورون بیجیر بأمود. ³⁵ وختی اون محلِ مردم عیسی یَ بشناختد، کسانی یَ اوسَه کودد و همۀ اون منطقه مردمانَ خبر بدد و اوشَأنم همۀ خوشَأنِ مریضانَ بأوردد اونِ ورجَه. ³⁶ اوشَأنْ اونَ مِنّت کودد کی فقط وَأله اونِ ردَا گوشه یَ دس بزند، و هر کسی کی دس زَئه، شفا پیدا کوده.